19
Is Kedtebek Kuntra te menge Amunihanen wey menge Aramihanen
(2 Samuel 10:1-19)
1 Dutun te huziyan he timpu, minatey si Nahash he hadì te menge Amunihanen. Ne is anak din he si Hanun iyan nekeilis kandin te kedhadì.
2 Migkaǥi si David te, “Ibpeehè ku ki Hanun is meupiya he kebpekidepitè ku kandin tenged te meupiya zaan is kebpekidepità te amey zin kedì.” Umbe impehendiyà ni David is menge upisyal para ibpeehè din is kebpekid-unung din te kelised ni Hanun dutun te kebpatey te amey zin.
Piru hein nekeume en haazà is menge upisyal ni David diyà te ki Hanun diyà te tanà te menge Amunihanen,
3 migkaǥi is menge upisyal te menge Amunihanen diyà te ki Hanun te, “Kunaan nu vuwa ke egketenuzan ni David is amey nu kayi te kedsuǥù din te menge etew para ed-unung kenikew te kelised? Kenà, su iyan inhendini zan su para ibpepeniid kayi te kenitew he nasyun su wey kiw zin mezezeeti?”
4 Ne zutun impezakep ni Hanun is menge sakup ni David ne migkiskisan is menge sumpè dan. Impetavas din daan is menge kumbalè dan puun te hawak pehendiyà te dizalem ne human ipeulì sikandan.
5 Egkeeled dan he ed-ulì. Hein netuenan ni David is nehitavù te menge sakup din, ne midsuǥù sikandin te menge menunudtulà he ebpekeǥiyan haazà is menge sakup din te diyè dan dà dèpa te Jerico taman te ebmelayat haazà is menge sumpè dan, ne human dan med-ulì.
6 Neisip te menge Amunihanen he nererengitan si David dutun te mibeelan dan. Umbe mibayad dan te menge 35,000 he libu he kilu he pelata su id-erkila zan te menge kerwahi wey menge perekerwahi, he menge tig-Aram Naharaim, Aram Maaca, wey Zoba.
7 Is kezakel te menge kerwahi wey menge perekerwahi 32,000. Nekidsevaha zaan kandan is hadì te Maaca wey is menge sundaru zin. Diyà heini megkampu te uvey te Medeba. Migawas daan is menge Amunihanen puun te menge inged dan su ed-andam dan daan te kebpekidtebek.
8 Hein nezineg heini ni David, impehendiyè din si Joab wey is langun he menge sundaru he memevurut he ebpekidtebek.
9 Mibpelastar en is menge Amunihanen diyà te pultahan te inged dan para te kebpekidtebek, ne is menge hadì he edlavan kandan, ne mibpelastar en daan diyà te menge suǥud.
10 Hein naahà ni Joab haazà is menge kuntada zan diyà te egkesineruwan dan wey ziyà te egkeiniyuǥan dan, mibpilì din is utew menge metau he sundaru te Israel ne iyan en sikandin mibpengulu te kebpekidtebek te menge Aramihanen.
11 Ne is nesamà dutun he menge sundaru ne impepenguluwan din ki Abishai he suled din para te kebpekidtebek te menge Amunihanen.
12 Migkeǥiyan ni Joab si Abishai te, “Emun egkeerangan nu he egkezaag key te menge Aramihanen ne tevangi key keniyu, ne emun daan egkeerangan dey he egkezaag kew te menge Amunihanen edtevangan dey zaan sikiyu.
13 Ebpekezesen kiw! Ebpekevurut kiw he ebpekidtebek para te menge keet-etawan tew wey te menge inged te Megbevayè tew. Su ebeelan te Nengazen ke hengkey is meupiya para kandin.”
14 Ne zutun midsurung en si Joab duma is menge sakup din, ne nekepelaǥuy is menge Aramihanen.
15 Hein naahà te menge Amunihanen he mibpemelaǥuy en is menge Aramihanen, mibpeleǥuyan dan daan si Abishai is suled ni Joab, ne nemeneled dan diyà te inged dan. Umbe nemen-ulì ensi Joab diyà te Jerusalem.
16 Hein naahà te menge Aramihanen he nezaag dan te menge Israilihanen, ne midsuǥù dan te ibpepenudtul te menge zuma zan he menge Aramihanen diyà te divaluy te wahig he Eufrates su ebpeuǥup dan. Nekeuma heini he grupu he iyan pengulu zan si Shofac he iyan peremandar te menge sundaru ni Hadadezer.
17 Hein netuenan haazà ni David, midtiǥum din is langun he menge sundaru te Israel para te kebpekidtebek. Ne midrapas dan te Wahig he Jordan ne mibpelastar zan he ed-etuvang te menge Aramihanen, ne zutun midtebek en sikandan.
18 Piru nepeleǥuyan te menge Aramihanen is menge Israilihanen. Ne 7,000 he ebpemen-untud te kerwahi is nengepatey eni David wey 40,000 he menge sundaru he ebpemenhipanew zà. Nepatey zan daan si Shofac is peremandar te menge sundaru.
19 Hein naahà ni Hadadezer he nezaag en sikandan te menge Israilihanen, ne nekid-emiǥu zan ki David, ne mibpesakup dan kandin. Umbe puun dutun ne kenè en ed-uǥup is menge Aramihanen te menge Amunihanen.