26
Is menge Ebantey te menge Gemawan te Baley te Nengazen
1 Iyan heini menge grupu te menge ebantey te menge ǥemawan dutun te valey te Nengazen.
Is ebpuun te pemilya ni Kora, si Meshelemia he anak ni Kore he sakup te pemilya ni Asaf,
2 wey pitu he anak din he menge maama, ne iyan si Zacarias is kinekekayan, sunud si Jediel, Zebadia. Jatniel,
3 Elam. Jehohanan, wey si Eliehoenai
4 Si Obed Edom wey kes walu he menge anak din he menge maama he iyan si Shemaya is kinekekayan, sunud si Jehozabad, Joa, Sacar, Netanel,
5 Amiel, Isacar, wey si Peuletai. Midtuvazan te Megbevayà si Obed Edom.
6 Is kinekekayan he anak ni Obed Edom he si Shemaya duen menge anak din he menge maama he menge pengulu te menge pemilya, su zuen dan menge ketau.
7 Iyan heini sikandan si Otni, Refael, Obed, wey si Elzabad. Is kezuzumahi zan he si Elihu wey si Semakia, ne zuen dan daan menge ketau.
8 Iyan heini langun menge kevuwazan ni Obed Edom. Sikandan wey is menge anak dan wey menge kezuzumahi zan, ne zuen dan egkehimu wey nengetuenan he menge terebahu. Is kahabet dan 62 langun.
9 Is 18 he menge anak wey menge kezuzumahi ni Meshelemia, ne zuen dan daan menge ketau.
10 Si Hosa he ebpuun te pemilya ni Merari, ne zuen din daan menge anak. Midhimu ni Hosa si Shimri he lavew he pengulu te pemilya zan minsan te kena sikandin kinekekayan he anak.
11 Ne is ikezuwa ki Shimri ne si Hilkia, is iketelu ne si Tebalia, ne is ikeepat ne si Zacarias. Ne 13 is langun he menge anak wey kezuzumahi ni Hosa he menge vantey zuen te ǥemawan te valey te Nengazen.
12 Migrupu is menge vantey zutun te menge ǥemawan te valey te Nengazen sumalà is pengulu te pemilya zan, ne zuen dan menge ketengdanan te kebpenilbi zutun te valey te Nengazen, iring te menge iring dan he menge Levihanen.
13 Midripa sikandan ke hendei zapit he ǥemawan ebpekevantey is menge pemilya zan, betan-en etawa meǥurang en.
14 Is dapit te edsilaan, ne iyan dutun neripahan si Shelemia, ne is dapit te zizaya he ǥemawan, ne iyan neripahan dutun is anak din he si Zacarias. Heini si Zacarias ne metau he edsambag.
15 Ne is dapit te egkezivavà he ǥemawan ne iyan dutun neripahan si Obed Edom, ne iyan midseriǥan is menge anak din te menge budiga.
16 Is dapit te edsenlepan he ǥemawan wey is gemawan he beyeey te idtekezeg dutun te valey te Nengazen, ne iyan dutun neripahan si Shupim wey si Hosa.
Ebpesembayè dan dutun he ebantey sumalà te midtendek dan:
17 Is dapit te edsilaan ne heenem is ibpevantey zutun kada andew, is dapit te zizaya ne heepat, is dapit te divavà ne heepat, ne is kada budiga ne tig-dezuwa.
18 Is dapit te edsenlepan ne heepat is ibpevantey te ibayà he edtekezeg dutun te valey te Nengazen, ne dezuwa is ibpevantey zutun te lama.
19 Iyan heini sikandan grupu te menge vantey te menge ǥemawan te valey te Nengazen he menge kevuwazan ni Kora wey ni Merari.
Is menge Trisuriru wey is Duma pa he menge Upisyal
20 Is duma he menge Levihanen ne iyan midseriǥan duen te menge budiga zuen te valey te Megbevayà, ragkes en dutun is menge budiga te menge azen he inhalad diyà te Megbevayà.
21 Si Ladan, kevuwazan ni Gershon, ne mahabet is menge kevuwazan ni Ladan he menge pengulu zaan te kevuwazan dan.
22 Is menge anak ni Jehieli he si Zetam wey si Joel ne iyan midseriǥan te menge budiga zutun te valey te Nengazen.
23 Iyan heini menge upisyal he ebpuun te menge kevuwazan ni Amram, Izhar, Hebron, wey si Uziel:
Is ebpuun te menge kevuwazan ni Amram:
24 si Shebuel, he kevuwazan ni Gershon he anak ni Moises, iyan pengulu he upisyal zutun te menge budiga te valey te Nengazen.
25 Is menge kezuzumahi zin he menge kevuwazan ni Eliezer ne iyan si Rehabia, Jeshaya, Joram, Zicri, wey si Shelomit.
26 Is menge budiga he zutun idtaǥù is menge inhalad ni Hadì David wey te menge pengulu te menge pemilya, te menge peremandar te menge linibu, wey te menge ginatus he menge sundaru, wey te zuma pa he menge peremandar, insarig ki Selomit wey is menge kezuzumahi zin.
27 Inhalad dan is duma he nengaaǥew zan te kebpekidtebek dan para egemiten dutun te valey te Nengazen.
28 Si Shelomit wey is menge kezuzumahi zin ne iyan ed-atur te langun he inhalad ni Samuel he ebpeneuven, ni Saul he anak ni Kish, ni Abner he anak ni Ner, wey ni Joab he anak ni Zeruya. Is duma pa he inhalad ne mid-atur zan daan.
29 Is ebpuun te menge kevuwazan ni Izhar: si Kenania, wey is menge anak din he menge maama, menge administradur wey menge meghuhusey te Israel. Wazè dan ketengdanan dutun te valey te Nengazen.
30 Ebpuun te menge kevuwazan ni Hebron: si Hashabia wey is 1,700 he menge kezuzumahi zin he zuen dan menge ketau. Insarig kandan is kedumala te menge tanà he zapit te edsenlepan te wahig te Jordan. Iyan sikandan mid-atur te menge vuluhaten te Nengazen wey vuluhaten te hadì dutun he lugar.
31 Si Jeria is pengulu te menge kevuwazan ni Hebron sumalà diyà te listahan te pemilya zan. Hein ike-40 he tuig te kedhadì ni David, ne mibpen-ahà is listahan, ne naahà dutun he zuen menge kevuwazan ni Hebron diyà te Jazer he sakup te Gilead, ne heini sikandan, duen dan menge ketau.
32 Si Jeria ne zuen din 2,700 he menge kezuzumahi he zuen dan menge ketau wey menge pengulu sikandan te menge pemilya. Iyan sikandan impezumala ni Hadì David te menge kevuwazan ni Reuben, ni Gad, wey ketengà he tribu ni Manase. Ne iyan sikandan mid-atur te langun he vuluhaten te Megbevayà wey vuluhaten te hadì dutun he menge lugar.