28
Is Pelanu ni David para te Baley te Nengazen
1 Dutun he timpu, impetawag ni Hadì David diyà te Jerusalem is langun he menge upisyal te Israel: Is menge upisyal te menge tribu, is menge peremandar te kada grupu te menge sundaru he ebpenilbi te hadì, is duma pa he menge peremandar te menge linibu wey ginatus he menge sundaru, is menge upisyal he menge sineriǥan te langun he menge azen wey menge layud dutun te hadì wey te menge anak din, is menge upisyal ziyà te turuǥan is menge gehemanen he menge etew, wey langun he memetau he menge sundaru.
2 Hein nengevurun dan en ne midhitindeg si David he migkaǥi te, “Pemineǥa a keniyu, menge suled wey menge keet-etawan ku. Egkesuat a he ebangun te valey te Nengazen para egkesevukan duen te Kavan te Kebpekid-uyun te Nengazen he Megbevayè tew, para zuen egkeuntuzan te paa zin. Ne neisip ku is edtukuzen en heini.
3 Piru migkeǥiyan a te Megbevayà te, ‘Kenè ka iyan ebpeketukud te valey te Nengazen para te zengeg ku tenged te sevaha ka he sundaru wey mezakel is mibpenhimetayan nu.’
4 Piru minsan te iring dutun, mibpilì a te Nengazen he Megbevayà te Israel, he ebpuun te tivuuk he pemilya zey he egkehimu he hadì te Israel te wazà pidtemanan. Mibpilì din is tribu te Juda he iyan pengulu he tribu. Ne ebpuun kayi he tribu, mibpilì din is pemilya ku, ne ebpuun te pemilya ku ingkelipey zin is kebpilia zin kedì he hadì te tivuuk Israel.
5 Mibeǥayan e zin te mezakel he menge anak he menge maama, ne ebpuun dutun te kandan mibpilì din si Solomon he edhadì te ginhedian din he iyan is Israel.
6 Migkeǥiyan e zin te, ‘Is anak nu he si Solomon iyan ebpekepetukud te valey ku wey te menge lama kayi. Su mibpilì ku sikandin he egkehimu he anak ku, ne egkehimu a zaan he amey zin.
7 Ne emun ebpedayun sikandin he edsunud te menge suǥù ku iring te ebeelan din guntaan, ne ibpahadì ku is menge kevuwazan din te wazà pidtemanan.’
8 “Umbe ǥuntaan, ebmenduan ku sikiyu kayi te etuvangan te langun he menge Israilihanen, he menge etew te Nengazen, wey ziyà te etuvangan te Megbevayè tew, he tumana niw purungi is langun he menge suǥù te Nengazen he Megbevayè niw. Emun ebeelan niw heini, ne pedayun he egkaangken niw heini is meupiya he tanà, he igkepepengevilin niw te menge kevuwazan niw te wazà pidtemanan.
9 “Ne sikew, Solomon he anak ku, kilelaa nu wey silbiyi nu is Megbevayà te amey nu te tivuuk he ǥehinawa nu wey isip nu, su naahà te Nengazen is kada ǥehinawa wey netuenan din is tuyù tew wey ked-isip-isip tew. Emun ed-aput ka ziyà te kandin, ne edtevangan ke zin; piru emun ed-iniyug ka kandin ne ebeleǥazen ke zin te wazà pidtemanan.
10 Umbe, is-isipa nu heini purungi. Mibpilì ka te Nengazen he ibpetukud duen te valey te Nengazen. Pekelig-en ka, wey terebehuwa nu heini he vuluhaten.”
11 Ne imbeǥey ni David ki Solomon is langun he pelanu te kebpetukud te valey te Nengazen wey te menge varkun kayi, menge bilding, menge budiga, menge ruǥu ziyà te zivavew, menge ruǥu ziyà te seled, wey te Utew Segradu he Lugar he zutun ebpeseyluwa is salà te menge etew.
12 Imbeǥey ni David heini is langun he pelanu he impenurù kandin te Mulin-ulin para te kebaal te menge lama te valey te Nengazen, wey te langun he menge ruǥu he nekelingut kayi wey te menge budiga te valey te Megbevayà, ragkes en is menge budiga te menge vutang he impenhalad.
13 Mibpenurù ni David daan si Solomon mehitenged te kegrupu te menge memumuhat wey te menge Levihanen wey te langun he menge vuluhaten te kebpenilbi zutun te valey te Nengazen, wey te langun he menge gelemiten te kebpenilbi.
14 Impenurù din daan ke pira is kezakel te menge pelata wey vulawan is egkeǥamit te kebaal kayi he menge gelemiten:
15 te menge sulù he vulawan wey menge selevukà kayi; te menge sulù he pelata wey te menge selevukà kayi;
16 te menge lemisahan he vulawan te selevukà te supas he ibpemuhat diyà te etuvangan te Megbevayà; te lemisahan he pelata;
17 te vulawan he menge tinidur he dezekelà; te menge yehung he vulawan wey pitsil; te vulawan wey pelata he menge pinggan,
18 wey pemuhatà he vulawan he edtutungan te veyewà. Mibpenurù daan ni David si Solomon ke ebmenmenuwen te ebaal is bulawan he kirubin he ebpekelambung is pakpak dan duen te divavew te Kavan te Kebpekid-uyun te Nengazen.
19 Migkaǥi si Hadì David te, “Heini he menge pelanu ne insurat pinaaǥi te kegiya te Nengazen, ne mibpenurù e zin ke ebmenmenuwen heini te ebaal is langun.”
20 Migkeǥiyan daan ni David is anak din he si Solomon, “Mebpekelig-en ka wey mebpekevurut ka. Puuni nu en is kebpeterebahu. Kenè ka mahandek wey mebmeluya, su is Nengazen he Megbevayà, he Megbevayè ku, eduma kenikew. Kenè ke zin ed-ewaan wey ebey-anan taman te egkepasad is langun he terebahu para te valey te Nengazen.
21 Ne andam en is grupu te menge memumuhat wey menge Levihanen te langun he terebahu para zuen te valey te Megbevayà wey zuen daan menge etew he zuen menge ketau te kedterebahu te minsan hengkey he vuluhaten he andam te ked-uǥup kenikew. Is menge upisyal wey is langun he menge etew ne andam he ebpezumazuma kenikew.”