29
Is menge Gasa te Kedtukud te Baley te Nengazen
1 Ne migkeǥiyan ni Hadì David is langun he menge Israilihanen te, “Si Solomon he anak ku he mibpilì te Megbevayà, betan-en pa ne wazè din pa kesinetian. Dekelà is buluhaten, su is edtukuzen he vilding ne kenà para te etew, kekenà, para te Nengazen he Megbevayà.
2 Mibeelan ku is taman te egkehimu ku te ked-andam te menge gamit para te valey te Megbevayè ku: menge vulawan, pelata, brunsi, putew, kayu, mahalen he menge vatu he uniks, ismiralda, menge vatu he nekedseselekawà is barek, wey zuma pa he utew menge mekempet he menge vatu wey mehabet he menge marmul.
3 Ne tenged te kebmahala ku zutun te valey te Megbevayè ku, ne ibeǥey ku is keugelingen ku he vulawan wey pelata para te kebangun kayi, wazà lavet duen te menge gamit he inteǥana ku en para te segradu he valey te Nengazen.
4 Is ibeǥey ku 100 he tunilada he vulawan he ebpuun te Ofir, wey menge 250 he tunilada he pelata. Egemiten heini para id-apid te menge elavat dutun te valey te Nengazen,
5 wey para te langun he menge gelemiten he ebeelan te menge platiru. Guntaan hentei is egkesuat he ebeǥey para te Nengazen?”
6 Ne zutun, is menge pengulu te menge pemilya, is menge pengulu te menge tribu te Israel, is menge peremandar te linibu wey ginatus he menge sundaru, wey is menge upisyal he menge sineriǥan te azen te hadì, mibeǥey zan daan he ebpuun te keputian te atey zan.
7 Mibeǥey sikandan para te kebeeli zuen te valey te Megbevayà te menge 175 he tunilada he vulawan, 10,000 he selapì he vulawan, 350 he tunilada he pelata, 630 he tunilada he brunsi, wey 3,500 he tunilada he putew.
8 Duen daan mibeǥey te mahalen he menge vatu, ne intaǥù heini ziyà te budiga zuen te valey te Nengazen he iyan edumala zuen si Jehiel he kevuwazan ni Gershon.
9 Utew nengelipey is menge etew su mibeǥey is menge pengulu zan he ebpuun te keputian te atey zan para te Nengazen. Utew zaan nelipey si Hadì David.
Is Ked-ampù ni David
10 Midalig ni David is Nengazen dutun te etuvangan te tivuuk he keet-etawan. Migkaǥi sikandin te,
“He Nengazen, he Megbevayà te kepuun dey he si Jacob, ereg ka he edeliǥen te wazà pidtemanan.
11 Gemhanan ka, telehuzen ka, dungganen wey ereg he edeliǥen. Su kenikew is langun diyà te langit wey zini te tanà. Iyan ka hadì, he Nengazen, wey lavew ka te langun.
12 Is menge ketiǥeyunan wey zengeg ne ziyà ebpuun te kenikew. Iyan ka edumala te langun. Gemhanan ka, wey iyan ka ebpekeveǥey te zesen wey ǥehem diyà te minsan hentei.
13 “He Megbevayè dey, guntaan ebpeselematan dey sikew wey edeliǥen dey is telehuzen he ngazan nu.
14 Piru hentei key, siak wey is keet-etawan ku, he ebpekeveǥey key te utew subra he iring kayi? Langun he menge vutang ne ziyà ebpuun te kenikew, ne ibeǥey zey kenikew is ebpuun ded kenikew.
15 Netuenan nu he humuhulevungà key zà kayi te kelibutan iring te menge kepuun dey. Is untung dey ne iring dà te alung he egkehanew zà.
16 “He Nengazen he Megbevayè dey, heini is langun he imbeǥey zey para te kedtukuza te valey nu, ne para te zengeg te waǥas he ngazan nu ne ebpuun ded kenikew. Kenikew heini is langun!
17 He Megbevayè ku, netuenan ku he iyan ka edsusi te menge ǥehinawa zey, ne igkelipey nu ke egkeehè nu he metazeng heini. Umbe tutuu wey ebpuun te keputian te atey is kebeǥaya ku kayi he menge vutang. Wey minsan is menge keet-etawan nu he kayi ǥuntaan ne neehè ku he mibeǥey zan daan te ebpuun te keputian te atey zan. Umbe utew a nelipey.
18 “He Nengazen, he Megbevayà te menge kepuun dey he si Abraham, si Isaac, wey si Jacob, deyzey ke lelayun nu heini idtaǥù diyà te menge ǥehinawa te menge keet-etawan nu, wey tevangi nu sikandan he mebmepezumdumahan kenikew.
19 Wey iveǥey nu zaan diyà te anak ku he si Solomon is dekelà he tinguhà te kedtuman te menge suǥù nu, menge penurù, wey te menge sulunuzen, wey te kebaal te langun he ibpetuman ku mehitenged te kedtukuza te valey te Nengazen he mibpurungan ku pengendami.”
20 Ne migkeǥiyan ni David is tivuuk he keet-etawan te, “Deliǥa niw is Nengazen he Megbevayè niw.” Ne zutun midalig dan is Nengazen, he Megbevayà te menge kepuun dan. Midluhud dan wey midungul he tuus te kebeǥayi zan te zengeg te Nengazen wey te hadì.
Migkilala is Kegkahadì ni Solomon
21 Sunud he andew ne mibpemuhat dan is Nengazen te menge pemuhat he edtutungen: 1,000 he menge tudu he vaka, 1,000 he memeǥurang en he menge meemahan he kerehidu, wey 1,000 he meemahan he menge nati pa. Nemuhat daan sikandan te menge pemuhat he inumen wey mezakel pa is impemuhat dan para te tivuuk he menge Israilihanen.
22 Nemengaan dan wey nemen-inum he melipayen diyà te etuvangan te Nengazen te haazà he andew.
Ne sunud dutun, intubuy zan en si Solomon he anak ni David he iyan hadì dan. Midlenahan si Solomon he anak ni David diyà te etuvangan te Nengazen he tuus he iyan en hadì dan, midlenahan daan si Zadok he tuus te kegkememumuhat din.
23 Umbe, mibpinuu si Solomon duen te pinuuwey te Nengazen te kedhadì he ilis te amey zin he si David. Mid-uswag si Solomon wey mibpezumazuma kandin is tivuuk he Israel.
24 Nenangdù is langun he menge upisyal, wey menge gehemanen he menge etew, wey is langun he anak ni Hadì David he ebpesakup dan ki Hadì Solomon.
25 Midhimu te Nengazen he mevantug si Solomon te tivuuk he Israel wey mibeǥayan din sikandin te zengeg he wazà maangken te zuma he menge hadì te Israel.
Is Kebpatey ni David
26-27 Nehimu he hadì si David he anak ni Jesse te tivuuk he Israel seled te 40 he tuig–7 he tuig diyà te Hebron ne 33 he tuig diyà te Jerusalem.
28 Mibmeluǥayad is untung din wey sepian sikandin wey dungganen. Minatey sikandin he meǥurang en utew, ne neilisan sikandin te anak din he si Solomon te kedhadì.
29 Is guǥud mehitenged te kedhadì ni Hadì David, puun te puunà taman te ketepusan, ne ingkesurat heini ziyà te menge libru te menge ebpeneuven he si Samuel, Natan wey Gad.
30 Ingkesurat dutun ke mibmenumenu zin is kedhadì din, wey ke sengemenu is kegkegemhanan din, wey is langun he nehitavù kandin wey te Israel, wey te nekelingut he menge ginhedian.