24
Mibelesbasan ni Joash kes Baley te Nengazen
(2 Menge Hadì 12:1-16)
Is penuiǥen ni Joash te kedhadì din ne pitu he tuig. Ne ziyà sikandin med-ubpà te Jerusalem, ne midhadì sikandin seled te 40 he tuig. Iyan iney zin si Zibia he tig-Beersheba. Meupiya is ulaula ni Joash diyà te etuvangan te Nengazen dutun te uuyag pa si Jehoyada he memumuhat. Mibpen-ahaan sikandin ni Jehoyada te zezuwa he esawa, ne zuen din menge anak he menge maama wey vahi.
Ne hein neiwas haazà ne midisisyun si Joash he ebpepurungan din is baley te Nengazen. Impetawag din is menge memumuhat wey menge Levihanen ne migkeǥiyan din te, “Pehendiyè kew te menge inged te Juda ne kuwaa niw is menge veleyazan te menge Israilihanen kada tuig, su para mepepurungi tew heini is baley te Megbevayè tew. Kinahanglan he segugunè niw veeli heini.” Piru is menge Levihanen midlanganlangan dan.
Umbe, impatawag ni Hadì Joash is lavew he memumuhat he si Jehoyada ne mid-insaan din te, “Maan is wazè nu ipekuwa te menge Levihanen is beleyazan te menge tig-Juda wey tig-Jerusalem? Kenè be insuǥù ni Moises he suluǥuen te Nengazen diyà te menge keet-etawan te Israel he iveǥey zan heini para te Tulda he midsevukan te Kesuǥuan?”
Dengan, is menge anak te vahi he mekesesalà he si Atalia, ne midseled dan dutun te valey te Megbevayà ne mibpenguwa zan te menge segradu he menge gelemiten para egemiten dan te ked-ezapa zan ki Baal. Umbe, midsuǥù si Hadì Joash he ebaal te kahun he selevukà te selapì, ne ziyà heini idsavuk te ǥawas te ǥemawan te valey te Nengazen. Ne impesavut din is menge tig-Juda wey menge tig-Jerusalem he kinahanglan he uwita te menge etew te Nengazen is menge veleyazan dan sumalà te insuǥù ni Moises he suluǥuen te Megbevayà diyà te keet-etawan te Israel hein diyè dan pa te sibsivayan. 10 Ingkelipey te langun he menge upisyal is kebeǥey zan wey is menge etew. In-ulug dan dutun te kahun is selapì dan taman te nepenù heini.
11 Emun egkepenù en haazà is kahun, ne ed-uwiten heini te menge Levihanen diyà te menge upisyal te hadì. Ne ebilangen heini te sikritaryu te hadì wey te upisyal te lavew he memumuhat, ne emun egkepasad ne idlikù dan ded kes kahun diyà te ǥemawan te valey te Nengazen he zutun ed-ezapa is Nengazen. Iyan heini ed-ul-ulahan dan kada andew taman te midekelà is netiǥum dan. 12 Ne imbeǥey ni Hadì Joash wey ni Jehoyada is selapì diyà te menge etew he edumala zutun te ebpepurungan he valey te Nengazen. Ne migkuwa zan te menge pandey wey menge memetau he ebpandey te menge putew wey brunsi. 13 Menge meǥied utew is edumala zutun te terebahu, umbe meǥaan is kedterebahu. Nepurungan dan haazà is baley te Megbevayà he iring ded is kegkeveeli zuen te zaan he kebeeli kayi, ne midlig-enan dan pa heini. 14 Hein nepasad is terebahu, ne in-ulì dan diyà te hadì wey ziyà te ki Jehoyada is nesamà he selapì. Ne migamit heini te kebpevaal te menge gelemiten dutun te valey te NENGAZEN–he egemiten para te ked-azap, te kebpemuhat te menge ibpemuhat he edtutungen, ragkes en is menge yehung wey menge teleǥuey he vulawan wey pelata. Dutun te uuyag pa si Jehoyada, ne wazè dan engkezi is kebpemuhat te menge pemuhat he edtutungen dutun te valey te Nengazen.
15 Midluǥeyazan utew te untung si Jehoyada, ne minatey sikandin he 130 is penuiǥen din. 16 Diyà sikandin ileveng te penlevengà te menge hadì diyà te Inged ni David, tenged te menge meupiya he nengeveelan din para te Israel wey para te Megbevayà wey para te valey zin.
17 Piru hein minatey en si Jehoyada, midhendiyà is menge upisyal te Juda te ki Hadì Joash. Ne midluhud dan su edtahud dan kandin. Ne migkeǥiyan dan sikandin te mebpemineg sikandin kandan. 18 Mid-isip dan he ed-iniyuǥan dan en haazà is baley te Nengazen, he Megbevayà te menge kepuun dan, ne iyan dan ed-ezapen is tukud he simbulu te vahi he ed-ezapen he si Ashera wey zuma pa he menge ed-ezapen. Tenged dutun te mibeelan dan ne nepeukan te Megbevayà is menge tig-Juda wey menge tig-Jerusalem. 19 Mibpevayaan te Nengazen te menge ebpeneuven din is menge etew su wey zan mekelikù diyà te kandin. Ne minsan mibpetizeenan sikandan te menge ebpeneuven, ne wazè dan mebpemineg.
20 Ne midumala te Mulin-ulin te Megbevayà si Zacarias he anak ni Jehoyada he memumuhat. Midhitindeg sikandin diyà te etuvangan te menge etew he egkaǥi te, “Iyan heini lalag te Megbevayà: Maan is wazè niw tumana is menge suǥù te Nengazen? Wazè niw en ed-iseǥan. Su mid-iniyuǥan niw is Nengazen, ne ed-iniyuǥan kew zin daan.”
21 Mibpen-ahaan te menge upisyal te paaǥi he mepatey zan si Zacarias. Ne tenged te suǥù mismu te hadì, mibpenuleng dan te vatu si Zacarias dutun te lama te valey te Nengazen, ne minatey sikandin. 22 Midlipatan ni Hadì Joash is kebpurungi kandin ni Jehoyada, he amey ni Zacarias, kekenà, mibpehimetayan din si Zacarias. Ne hein egkevidtawan en sikandin, ne ke sikandin te, “Berakat he seǥipaa te Nengazen is ebeelan niw, ne iyan sikandin mebales keniyu.”
23 Dutun te kebpuun te veǥu he tuig, ne midsurung te menge sundaru te Aram is Juda. Nezaag dan is Juda wey Jerusalem, ne mibpenhimetayan dan is menge upisyal te Juda. Ne mid-uwit dan diyà te hadì dan diyà te Damascus is menge azen he naaǥew zan. 24 Deisek dà is menge sundaru te Aram he midsurung kenà is menge sundaru te Juda. Piru impezaag te Nengazen kandan is Juda, su mid-iniyuǥan dan is Nengazen he Megbevayà te menge kepuun dan. Umbe nekeuma heini he silut ki Joash.
25 Hein migenat en is menge tig-Aram, ne negerebiyan te palì si Joash. Tenged te kedhimetayi zin te anak ni Jehoyada he memumuhat, mibpelanu zaan is menge upisyal zin he mepatey zan sikandin. Ne midhimetayan dan sikandin diyà te hizeǥaan din. Diyà sikandin ileveng te Inged ni David, piru kenà diyà te penlevengà te menge hadì.
26 Ne iyan heini midhimatey kandin, si Zabad he anak te sevaha he Amonihanen he vahi he si Shimeat, wey si Jehozabad he anak te sevaha he Moabitanhen he vahi he si Shimrit. 27 Is menge ǥuǥud mehitenged te menge anak ni Joash, is menge penagnà mehitenged kandin, wey te kebpepurungi zin te valey te Megbevayà ne ingkesurat diyà te Impesavut Mehitenged te Keguǥuza te menge Hadì. Si Amazia he anak din iyan nekeilis kandin te kedhadì.