25
Is Kedhadì ni Amazia ziyà te Juda
(2 Menge Hadì 14:1-20)
1 Mibpenuiǥen si Amazia te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 29 he tuig. Is iney zin iyan si Jehoadan he tig-Jerusalem.
2 Meupiya is ulaula ni Amazia ziyà te etuvangan te Nengazen, piru kurang is kedsunud din te Nengazen.
3 Ne hein melig-en en is kedhadì ni Amazia, ne mibpehimetayan din sikan is menge upisyal he midhimatey te amey zin he hadì.
4 Piru wazè din mulà pehimetayi is menge anak dan, su sumalà is ingkesurat diyà te Libru te Kesuǥuan ni Moises he migkaǥi is Nengazen te, “Kenà ereg he edhimetayan is menge ginikanan tenged te salà te menge anak dan, ne is menge anak, kenà ereg he edhimetayan tenged te menge salà te menge ginikanan dan. Iyan dà idhimetayi te etew is keugelingen din he salà.”
5 Mid-urgenisar ni Amazia is menge sundaru zin he ebpuun te Juda wey Benjamin. Mibpunduk din sikandan sumalà te pemilya zan ne zuen menge peremandar he impezumala zin te tig-100 wey tig-1,000 he menge sundaru. Ne mibilang din is menge sundaru zin he ebpenuiǥen te 20 wey subra pa, ne is kezakel zan ne 300,000. Memetau heini he egawed te vangkew wey kelasag.
6 Migkuwa zaan sikandin te 100,000 he memetau he menge sundaru he ebpuun te Israel. Mibayad sikandin te 3,500 he kilu he pelata he idsuhul kayi te menge sundaru.
7 Piru zuen sevaha he suluǥuen te Megbevayà he midhendiyà te ki Amazia he egkaǥi te, “Mahal he Hadì, kenè ka kuwa te menge sundaru he ebpuun te Israel, su wazè en mebpekiduma is Nengazen kayi he nasyun. Heini is keet-etawan te Efraim ne wazè en uǥupi te Nengazen.
8 Emun edumahan niw sikandan ke ebpekidtebek kew, egkezaag kew minsan utew kew en ebpenigudu. Iyan dà is Megbevayà ebpekepezaag etawa ebpekepezezaat keniyu.”
9 Midtavak ni Amazia haazà is suluǥuen te Nengazen te, “Ne ebmenmenuwen ku en be haazà is ingkeveǥey ku he 3,500 he kilu he pelata?” Midtavak haazà sikandin te, “Subra pa keniyan is ibeǥey kenikew te Nengazen.”
10 Umbe, impeulì ni Amazia is menge sundaru he tig-Efraim. Ne nemen-ulì dan ne utew zan egkepeuki is Juda.
11 Mibpekevurut si Amazia te kebpenurung, ne mibpenguluwan din is menge sundaru zin te kedhendiyà te menge suǥud he egngezanan te Timus, ne zutun dan mekepatey te 10,000 he menge Edomanhen.
12 Nekezakep pa sikandan te 10,000 he menge sundaru, ne mid-uwit dan heini ziyà te zempilas ne impen-ulug dan, ne utew nengeruntek is menge lawa kayi.
13 Ne haazà mulà is menge sundaru he impemeulì ni Amazia su wazè dan dumaha te tebek ne nemenurung dan diyà te menge inged te Juda ebpuun te Samaria pehendiyà te Bet Horon. Nekepatey zan te 3,000 he menge etew, wey mezakel he menge azen is mibpenguwa zan.
14 Hein midlikù si Amazia he ebpuun te kebpenhimetayi zin te menge Edomanhen, mibpen-uwit din is menge ed-ezapen te menge Edomanhen. Midhimu zin heini he menge ed-ezapen din, mid-azap din, wey mibpemuhat din te menge pemuhat.
15 Umbe, utew nepauk is Nengazen ki Amazia. Mibpeveyaan din si Amazia te ebpeneuven he migkaǥi te, “Maan is midangep ka keniyan te menge ed-ezapen he wazè dan man ganì melibri is menge ed-azap kandan he mibpenhimetayan nu?”
16 Dutun te kemulu pa egkaǥi haazà is ebpeneuven, ne midtavak haazà is hadì te, “Maan is edsembaǥan a kenikew? Midhimu ku ve sikew he peresambag? Mebpereremek ka, emun kenè ka egkesuat he ebpatey.” Umbe, mibpereremek haazà is ebpeneuven hein nekepasad sikandin he egkaǥi kayi: “Siguradu he edèdeetan ka te Megbevayà tenged te mid-azap nu is duma he menge ed-ezapen ne wazè ka mebpemineg kedì.”
17 Mibpekidlalag si Hadì Amazia te menge sumesambag din ne hein nepasad din haazà, mibpeuwit sikandin te lalag diyà te hadì te Israel he si Jehoash he anak ni Jehoahaz he apù ni Jehu. Ne midhinggat din si Jehoash he ebpetebekè dan.
18 Piru midtavak sikandin ni Hadì Jehoash pinaaǥi kayi he menge lalag: “Diyà te Lebanon duen duǥiyen he sagbet he mibpeuwit te lalag diyà te kayu he sidru he ke sikandin: ‘Ipeesawa nu is anak nu he vahi te anak ku he maama.’ Piru zuen nekevayà dutun he leew he langgam ne midtekutakan din haazà is duǥiyen he sagbet.
19 Amazia, tutuu he nezaag nu is Edom ne ibpahambug nu heini. Piru zeyzey pa ke kenè ke en ebpekidtebek kenami, kekenà, tireneb ke zà keniyan te kenikew he lugar. Maan is ebpen-ehè ke pa te samuk he ebpekeuwit te kezeetan nu wey te Juda?”
20 Piru kenà ebpemineg si Amazia, su ketau te Megbevayà he mezezeeti sikandin ni Jehoash tenged te ked-azap din te menge ed-ezapen diyà te Edom.
21 Umbe, midsurung sikandin ni Hadì Jehoash wey te menge sundaru zin. Diyè dan medtebek te Bet Shemesh he sakup te Juda.
22 Nezaag is Juda te Israel, ne nekedsusuwey is menge sundaru te Juda he nemelaǥuy pehendiyà te ed-ulian dan.
23 Nezekepan ni Hadì Jehoash si Hadì Amazia diyà te Bet Shemesh, ne miduma zin sikandin diyà te Jerusalem. Ne zutun mibengkag ni Jehoash is menge verengbeng te Jerusalem puun te Pultahan te Efraim pehendiyà te Pultahan diyà te Suyuk, he 600 he ǥiek is keluǥayad din.
24 Mibpenguwa zin is langun he menge vulawan, pelata, wey menge gelemiten he neehè din duen te valey te Megbevayà he ed-etimanen dengan ni Obed Edom. Mibpenguwa zin daan is menge ketiǥeyunan diyà te turuǥan. Mid-uwit din heini wey is menge vihag din te ked-ulì din diyà te Samaria.
25 Nengungubpaan pa seled te 15 he tuig si Hadì Amazia he hadì te Juda puun te kebpatey ni Hadì Jehoash he hadì te Israel.
26 Is duma pa he ǥuǥud mehitenged te kedhadì ni Amazia, puun pa te puunà taman te ketepusan, ne ingkesurat diyà te Libru he Midsuratan te menge Keguǥuza te menge Hadì te Juda wey Israel.
27 Hein mid-iniyuǥan en ni Amazia is Nengazen, ne zuen menge etew he mibpelanu te kedhimetayi kandin diyà te Jerusalem, umbe mibpelaǥuy sikandin diyà te Lakish, piru mibpetelukunan dan sikandin ne midhimetayan dan.
28 Is lawa zin ingkarga te kudà ne inlikù diyà te Jerusalem ne inleveng diyà te midlevengan te menge kepuun din diyà te Inged ni David.