26
Is Kedhadì ni Uzia ziyà te Juda
(2 Menge Hadì 14:21, 22; 15:1-7)
1 Is in-ilis te keet-etawan te Juda ki Amazia te kedhadì ne iyan is anak din he si Uzia he ebpenuiǥen te 16 he tuig.
2 Iyan sikandin nekehawì te Elat ne mid-umanan din tukuza hein minatey en is amey zin he si Amazia.
3 Mibpenuiǥen si Uzia te 16 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 52 he tuig. Is iney zin iyan si Jecolia he tig-Jerusalem.
4 Meupiya is ulaula ni Uzia ziyà te etuvangan te Nengazen, iring te mibeelan te amey zin he si Amazia.
5 Midangep sikandin te Megbevayà hein timpu ni Zacarias, he iyan mibpenurù kandin te kedtahud te Megbevayà. Te kebpedayun din te kedangep te Nengazen, ne ibpeuswag sikandin te Megbevayà.
6 Mibpekidtebek sikandin te menge Filistihanen ne midrundus din is menge verengbeng he nekelingut te inged he Gat, Jabne, wey Ashdod. Ne midtukud sikandin te veǥu he menge inged uvey te Ashdod wey te zuma pa he menge lugar ziyà te Filistia.
7 Mid-uǥupan sikandin te Megbevayà te kebpekidtebek din te menge Filistihanen, menge Meunhanen, wey te menge Arabo he ziyà med-ubpà te Gur Baal.
8 Mibayad te vuhis is menge Amonihanen diyà te kandin, ne nevantug sikandin taman te Ehipto, tenged te mibmelig-en utew sikandin.
9 Midlig-enan pa utew ni Uzia is Jerusalem pinaaǥi te kedtukuza te menge turi ziyà te Pultahan diyà te Suyuk, kes Pultahan he Ebpekesinaru ziyà te Suǥud-suǥud, wey nepekùan duen te verengbeng.
10 Midtukud daan sikandin te menge turi ziyà te sibsivayan ne mibpekalut te mezakel he menge vudsi he punduwà te wahig su utew mezakel is menge ayam din diyà te menge mibuntud-buntud diyà te edsenlepan wey ziyà te menge suǥud. Mevasuk daan sikandin. Duen din menge sakup he ebantey zutun te menge vevesukè din wey menge pemuleey te paras diyà te menge vuvungan wey ziyà te egkeveluyan he menge suǥud.
11 Duen daan menge sundaru ni Uzia he menge metau he andam he ebpekidtebek. Heini sikandan ne mid-urgenisar wey migrupugrupu ni Jiel he sikritaryu wey ni Maasea he upisyal, he dizalem te kedumala ni Hanania he sevaha te menge upisyal zutun te hadì.
12 Is menge peremandar te memetau he menge sundaru iyan is menge pengulu te menge pemilya he 2,600 langun.
13 Is kezakel te menge sundaru ne menge 307,500. Heini sikandan ne memetau he ebpemekidtebek, ne andam he edtavang te hadì te kebpekidtebek te menge kuntada zin.
14 Mibeǥayan sikandan ni Uzia te menge kelasag, bangkew, wey kalù he putew, bisti he limbutung te lawa, panà wey limpawes.
15 Mibpevaal zaan si Uzia te menge gelemiten diyà te memetau he ebpemaal he para gelemiten te kebpanà wey kedtimbag te zezekelà he menge vatu puun te menge turi wey menge suyuk te menge verengbeng. Nevantug si Uzia ziyà te minsan hendei, tenged te midtevangan sikandin te Nengazen taman te nehimu sikandin he gemhanan.
16 Piru hein gemhanan en sikandin, ne mibpegalbu en sikandin. Ne iyan heini nekezezaat kandin. Wazà sikandin mebmetinumanen te egkesuatan te Nengazen he Megbevayè din, su midseled sikandin diyà te valey te Nengazen he nenguney medtutung te veyewà duen te pemuhatà.
17 Midtelukunan sikandin ni Azaria he lavew he memumuhat wey te 80 he menge mevurut he menge memumuhat te Nengazen
18 ne midawey zan si Uzia. Ke sikandan te, “Uzia, kenè ka engayan he edtutung te veyewà para te Nengazen. Heeyan he vuluhaten ne para zà te menge memumuhat he menge kevuwazan ni Aaron. Iyan sikandan mibpilì te Nengazen he edtutung te veyewà. Gawas ka keniyan te valey te Nengazen, su wazè ka medsunud te Nengazen. Kenè ka egkezeliǥan te Nengazen he Megbevayà kayi te mibeelan nu.”
19 Utew nepeuki ni Uzia is menge memumuhat. Ne te kemulu zin pa egewezi kes teleǥuey te veyewà he zutun te pemuhatà he ziyà te seled te valey te Nengazen, ne midtuvuan is buked din te zaru te lundis.
20 Hein naahà ni Azaria he lavew he memumuhat wey zuen te zuma zin he menge memumuhat he midtuvuan is buked ni Uzia te zaru te lundis, ne impeǥaanggaan dan ipeǥawas dutun te valey te Nengazen. Ne egkezeǥusu zaan sikandin he egawas tenged te midsilutan sikandin te Nengazen.
21 Ne midtuvuan te zaru te lundis si Hadì Uzia taman te andew te kebpatey zin. Diyà sikandin med-ubpà te sevaha he valey he nekesivey, ne wazà sikandin tuǥuti he ebpekeseled duen te valey te Nengazen. Si Jotam he anak din ne iyan mibpengulu ziyà te turuǥan wey te menge keet-etawan te Juda.
22 Is duma pa he ǥuǥud mehitenged te kedhadì ni Uzia, puun pa te puunà taman te ketepusan, ne insurat te ebpeneuven he si Isaias he anak ni Amoz.
23 Hein minatey en si Uzia, inleveng sikandin diyà te uvey te midlevengan te menge kepuun din he menge hadì. Wazà sikandin i-amur kandan, su zuen daru te lundis din. Si Jotam he anak din ne iyan nekeilis kandin te kedhadì.