32
Midsurung is menge Tig-Asiria ziyà te Juda
(2 Menge Hadì 18:13-37; Isaias 36:1-22)
Hein nepasad ni Hezekia is buluhaten din duma is kebmetinumanen din, midsurung ni Hadì Senakerib he hadì te Asiria is Juda. Duma sikandin te menge sundaru zin ne midliǥuyan dan is binerengbeng he menge inged, su neisip din he egkezaag din heini para te keugelingen din. Ne hein netuenan ni Hezekia he ragkes en is Jerusalem te edsurungen ni Senakerib. Mibpekidlalag sikandin te menge upisyal zin wey te menge pengulu te menge sundaru zin. Ne iyan nepesazan dan is ibpeengked dan is kedtudà te menge wahig diyà te gawas te Jerusalem. Umbe, midtiǥum dan is mahabet he menge etew ne midtembuan dan is tudeey te menge wahig pehendiyà te menge tanà he ebpuun diyà te menge serebseb. Su ke sikandan te, “Emun ebpekeume en kayi is menge hadì te Asiria, ne wazè dan en egkekuwaan te wahig.”
Ne mid-umanan pa ni Hezekia is kelig-en te menge pengalang din pinaaǥi te kebpepurungi zin te menge verengbeng wey kebpehitindeg te menge turi. Mid-umanan din peliǥuwi te verengbeng is inged diyà te gawas duen te nehuna he verengbeng, ne mibpetembuan din is mevavà he vahin dutun te Inged ni David. Mibpevaal zaan sikandin te mezakel he menge ǥumaan wey menge kelasag.
Midsavuk sikandin te menge peremandar te menge etew, ne impetiǥum din sikandan diyà te pelasa, he ziyà te pultahan he kilid te inged. Midasig din sikandan he ke sikandin te, “Mebpekelig-en kew wey mebpekevurut. Kenè kew mahandek wey mebpenluyaluya tenged te kegkeevek niw te hadì te Asiria wey te mahabet he menge sundaru zin. Su zuen lavew he gemhanan he ebpekiduma kenitew. Menge etew zà is duma keniyan te hadì, piru is kenitew he zuma, ne iyan is Nengazen he Megbevayè tew. Iyan sikandin edtavang kenitew wey ebpekidtebek para kenitew.” Umbe mibmelig-en is menge etew tenged dutun te migkaǥi ni Hadì Hezekia he hadì te Juda.
Ne zutun te kedliǥuyi ni Hadì Senakerib wey te menge sundaru zin te Lakish, midsuǥù din is menge upisyal zin pehendiyà te Jerusalem te kegkaǥi kayi he menge lalag diyà te ki Hadì Hezekia wey te menge etew zutun:
10 “Iyan heini migkaǥi ni Hadì Senakerib he hadì te Asiria: Hengkey is edseriǥan niw, maan is kenè niw ed-ewaan is Jerusalem minsan edliǥuyan kew en? 11 Migkaǥi si Hezekia ziyà te keniyu he edlibriyen kew te Nengazen he Megbevayè niw puun te gehem te hadì te Asiria. Piru edliveǥen kew zin dà, su emun kenè kew ed-awà kayi te Jerusalem ne ebpematey kew te kegkevitil wey kegkemezahi. 12 Kenè be iyan man si Hezekia mibperundus te menge ed-ezapan te Nengazen diyà te metikang he menge lugar, ragkes en is menge pemuhatà kayi? Midsuǥù kew zin pa is menge tig-Juda wey menge tig-Jerusalem he kinahanglan he azap kew wey tutung kew te menge pemuhat diyà te sevaha zà he pemuhatà.
13 “Netuenan niw en ke hengkey is mibeelan ku wey mibeelan te menge kepuun ku ziyà te menge etew ziyà te menge nasyun. Nelibri ve sikandan te menge ed-ezapen dan puun te gehem ku? 14 Wazà minsan sevaha zutun te menge ed-ezapen diyà te menge nasyun he midezeetan ku etawa midezeetan te menge kepuun ku he nekelibri te menge etew zin puun te gehem ku. Ne kenà daan ebpekelibri keniyu is megbevayè niw. 15 Kenè kew peliveg wey petuntu ki Hezekia. Kenè niw sikandin tuuwi, su wazà ed-ezapen diyà te minsan hendei he nasyun etawa ginhedian he ebpekelibri te menge etew zin puun te gehem ku etawa gehem te menge kepuun ku. Ne tuwas pa he kenà ebpekelibri is keniyu he megbevayà!”
16 Ne zuen pa zuma he mezaat he menge lalag he migkaǥi zutun te menge upisyal ni Senakerib he ebpekesuǥat te Nengazen he Megbevayà wey te suluǥuen din he si Hezekia. 17 Mibpeuwit pa si Hadì Senakerib te menge surat he ed-insultu te Nengazen he Megbevayà te Israel. Iyan heini insurat din: “Is menge ed-ezapen diyà te zuma he menge nasyun ne wazè dan melibri is menge etew zan puun te ǥehem ku. Umbe is megbevayà he ed-ezapen ni Hezekia ne kenà daan ebpekelibri te menge etew zin puun te menge gehem ku.” 18 Ne mezaǥing is kegkeǥiya kayi te menge upisyal ni Senakerib te Hebriyuhanen he kegkaǥi su wey mahandek is menge meǥinged te Jerusalem he midtiǥum duen te uvey te verengbeng. Su emun egkahandek en is menge etew ne melemu zan dà egkaaǥew haazà is inged. 19 Heini he menge upisyal mezaat is menge lalag dan he ebpekesuǥat te Megbevayà he ed-ezapen te menge tig-Jerusalem iring te menge lalag dan he ebpekesuǥat daan diyà te menge ed-ezapen diyà te zuma he menge nasyun he bineelan dà te etew.
20 Nengumew-umew te Megbevayà diyà te langit si Hadì Hezekia wey si Isaias he ebpeneuven he anak ni Amos. 21 Ne midsuǥù te Nengazen is belinsuǥuen he mibpurung medezaat te menge memetau he menge sundaru, menge peremandar, wey te menge upisyal te Asiria ziyà te kampu te hadì te Asiria. Umbe mid-ulì si Hadì Senakerib he nepeel-elezan utew. Ne hein midseled sikandin diyà te simbahan he ed-ezapan te ed-ezapen din, midhimetayan sikandin te zuma he menge anak din pinaaǥi te ispada.
22 Midlibri te Nengazen si Hezekia wey is menge etew ziyà te Jerusalem te gehem ni Hadì Senakerib he hadì te Asiria wey te gehem te zuma pa he menge kuntada zan. Ne melinawen dan su wazè en sikandan tebeka te menge kuntada zan diyà te peliǥuy zan. 23 Mahabet he menge etew is mid-uwit te menge halad diyà te Jerusalem he para te Nengazen. Mid-uwit dan daan te mahalen he menge gasa para ki Hadì Hezekia. Puun dutun mibeǥayan te zengeg si Hezekia te langun he menge nasyun.
Is Kedaru ni Hezekia
(2 Menge Hadì 20:1-11; Isaias 38:1-8)
24 Dutun he timpu midaru si Hezekia ne henduen be te ebpatey en sikandin. Nengemuyù sikandin diyà te Nengazen, ne mibeǥayan sikandin te Nengazen te tuus he egkeulian sikandin. 25 Piru mebpagalbu si Hezekia ne wazè din beliya is keupiya he impaahà te Nengazen kandin. Umbe nepeukan sikandin te Nengazen wey is menge tig-Juda wey menge tig-Jerusalem. 26 Ne mid-engkezan ni Hezekia wey te menge tig-Jerusalem is kebpelavew zan. Umbe wazà ipeseǥazi kandan te Nengazen is rimeǥas te pauk din dutun te uuyag pa si Hezekia.
27 Sepian wey nevantug si Hezekia. Mibpevaal sikandin te menge budiga te menge azen din he menge pelata, menge vulawan, mahalen he menge vatu, menge penaket, menge kelasag, wey zuma pa he mahalen he menge azen. 28 Mibpevaal zaan sikandin te menge budiga para te trigu zin, binu, wey lana. Ne gawas kayi mibpevaal zaan sikandin te menge tudil para te menge uyaǥen din, 29 su utew mahabet is menge uyaǥen din. Mibangun daan sikandin te menge inged, su mibeǥayan sikandin te Megbevayà te zekelà he ketiǥeyunan.
30 Si Hezekia is midsuǥù te kedtambun te lepawà te wahig he ziyà te zivavew he vahin te serebseb diyà te Gihon ne ziyà heini ipetudà te zapit te edsenlepan dutun te Inged ni David. Midlampus si Hezekia te langun he mibeelan din. 31 Piru mibey-anan sikandin te Megbevayà hein nekeuma is menge upisyal he ebpemuun te Babilonia he nenginginsà mehitenged te egkein-inuwan he nehitavù diyà te Juda. Mibeelan heini te Megbevayà su wey metueni ke hengkey is diyà te gehinawa ni Hezekia.
Is Ketepusan te Kedhadì ni Hezekia
(2 Menge Hadì 20:20-21)
32 Is duma pa he ǥuǥud mehitenged te kedhadì ni Hezekia wey is kebmahala zin te Nengazen, ne ingkesurat diyà te insurat he nelewasan te ebpeneuven he si Isaias he anak ni Amos, he elin ingkesurat diyà te Libru he Midsuratan te Kaaǥi te menge Hadì te Juda wey Israel. 33 Hein minatey en si Hezekia, inleveng sikandin diyà te egkevuvungan he vahin te penlevengà te menge kevuwazan ni David. Mibeǥayan sikandin te zengeg te langun he menge etew te Juda wey Jerusalem dutun te kebpatey zin. Ne iyan is anak din he si Manase iyan nekeilis kandin te kedhadì.