33
Is Kedhadì ni Manase ziyà te Juda
(2 Menge Hadì 21:1-18)
Mibpenuiǥen si Manase te 12 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 55 he tuig. Mezaat is ulaula zin diyà te etuvangan te Nengazen. Mid-iringan din is utew mezaat he menge vaal te menge etew ziyà te menge nasyun he impesegseg te Nengazen te menge Israilihanen. Mid-umanan din benguna is menge simbahan diyà te metikang he menge lugar he imperundus dengan te amey zin he si Hezekia. Mibaal zaan sikandin te menge pemuhatà he para te menge ledawan ni Baal wey mibpevaal te menge tukud he simbulu te vahi he ed-ezapen he si Ashera. Midluhuzan din wey mid-azap din is langun he egkaahà diyà te langit. Mibpevaal zaan sikandin te menge pemuhatà diyà te valey te Nengazen, he sumalà te Nengazen haazà he valey ziyà te Jerusalem iyan kes lugar he zutun sikandin ebeǥayi te zengeg taman te taman. Impelastar zin heini he menge pemuhatà diyà te zezuwa he lama zuen te valey te Nengazen ne egemiten haazà he menge pemuhatà te ked-azap te langun he merayag he egkengaahà diyà te langit. Impemuhat din is menge anak din diyà te hapuy diyà te Suǥud-suǥud te Ben Hinom. Mibeelan din daan is baal te menge veyilan, menelagnà wey menge mememarang, ne ebpenginginsà daan diyà te menge veyilan he ebpekidlalag te ǥimukud te nemematey en. Utew subra is kebaal zin te salà diyà te Nengazen, ne ingkepauk heini te Nengazen.
Insavuk din diyà te valey te Megbevayà is ledawan he mibpeveelan din he iyan man pezem heini sikan is simbahan he migkaǥi te Megbevayà diyà te ki David wey ziyà te anak din he si Solomon, he ke sikandin te, “Wazà pidtemanan te kebeǥayi kedì te zengeg kayi te valey ku wey kayi te Jerusalem he iyan kes lugar he nepilì ku ziyà te langun he menge lugar te langun he menge tribu te Israel. Emun edtumanen te menge etew te Israel is langun he menge kesuǥuan ku wey menge sulunuzen he imbeǥey kandan ni Moises, kenè ku idtuǥut he mekaawà sikandan kayi te tanà he imbeǥey ku ziyà te menge kepuun dan.” Piru mid-iniyat ni Manase is menge etew ziyà te Juda wey Jerusalem te kebaal te mezaat, ne edhuna pa he mezaat is kandan he menge vaal kenà te menge vaal te menge etew ziyà te menge nasyun he mibpezezeetan te Nengazen te menge Israilihanen.
10 Minsan mibpetizeenan en te Nengazen si Manase wey is menge etew zin, wazà gihapun sikandan mebpemineg te Nengazen. 11 Umbe, impesurung sikandan te Nengazen te menge sundaru te Asiria. Mibihag dan si Manase, migkew-itan dan is izung din, migkedinahan dan te brunsi, ne miduma zan diyà te Babilonia. 12 Ne tenged te kedlised din, ne wazè en human sikandin mebpelavew, ne mibpehizuhizu sikandin te Nengazen he Megbevayè din, he Megbevayà daan te menge kepuun din. 13 Ne zutun te kebpengemuyù din, nemineg is Nengazen kandin. Newaleng is Nengazen dutun te kebpehizuhizu ni Manase. Umbe impelikù sikandin te Nengazen diyà te Jerusalem wey ziyà te ginhedian din. Ne zutun nepurung meisip-isip ni Manase he iyan dà Megbevayà is Nengazen.
14 Ne puun dutun, mibpepurungan ni Manase sikan is berengbeng diyà te gawas dutun te Inged ni David, puun te zapit te edsenlepan te serebseb diyà te Gihon he ziyà te zal-ug taman te Pultahan te menge Isdà, ne impevulegkù heini ziyà te menge mibuntud-buntud he egngezanan te Ofel. Mid-umanan din daan is ketikang kayi. Ne mibpepelestaran din te menge peremandar is langun he vinerengbeng he menge inged te Juda. 15 Is menge ed-ezapen te zuma he menge nasyun wey sikan is ledawan, impepen-awè din diyà te valey te Nengazen. Impaawè din daan is menge pemuhatà diyà te vuvungan he iyan kes epehitindeǥan te valey te Nengazen wey is menge pemuhatà diyà te zuma he vahin te Jerusalem, ne impetimbag din heini ziyà te gawas te inged. 16 Ne zutun mibpepurungan din sikan is pemuhatà he para te Nengazen ne mibpemuhatan heini te menge pemuhat he para te meupiya he kedepità wey menge pemuhat he para te kebpeselamat. Migkeǥiyan din is menge meǥinged diyà te Juda he mebpenilbi zan te Nengazen he Megbevayà te Israel. 17 Piru ebpemuhat gihapun is menge etew ziyà te menge simbahan diyà te metikang he menge lugar, piru ibpemuhat dan heini ziyà te Nengazen he Megbevayè dan.
18 Is duma pa he ǥuǥud mehitenged te kedhadì ni Manase, ragkes is kebpengemuyù din diyà te Megbevayà wey is menge migkaǥi te menge ebpeneuven diyà te kandin pinaaǥi te ngazan te Nengazen he Megbevayà te Israel, ne ingkesurat diyà te Libru he Midsuratan te menge Keguǥuza te menge Hadì te Israel. 19 Is pengemuyù ni Manase wey is tavak te Nengazen kandin, ragkes en is langun he menge salè din wey menge kedsupak din te Nengazen, ne ingkesurat diyà te libru te menge ebpeneuven. Ingkelista zaan kayi is menge lugar he mibpehitindeǥan din te menge simbahan, te menge tukud he simbulu te vahi he ed-ezapen he si Ashera, wey is duma pa he menge ed-ezapen he mid-azap din dutun te kemulu pa sikandin ebpelavew ziyà te etuvangan te Megbevayà. 20 Hein minatey en si Manase, inleveng sikandin diyà te turuǥan din. Ne iyan nekeilis kandin te kedhadì is anak din he si Amon.
Is Kedhadì ni Amon diyà te Juda
(2 Menge Hadì 21:19-26)
21 Mibpenuiǥen si Amon te 22 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te zezuwa he tuig. 22 Mezaat is baal ni Amon diyà te etuvangan te Nengazen, iring te mibeelan ni Manase he amey zin. Mid-azap din wey mibpemuhat din is menge ed-ezapen he mibpeveelan ni Manase. 23 Piru kenà sikandin iring te amey zin, su wazè din mulà ibpekevavà is keugelingen din diyà te etuvangan te Nengazen, kekenà, mid-umanan din pa is kebaal zin te salà.
24 Ne zutun, mezaat is pelanu te menge upisyal ni Amon diyà te kandin, ne midhimetayan dan sikandin diyà te turuǥan din. 25 Piru pudu midhimetayi te menge etew ziyà te Juda sikan is midhimatey ki Hadì Amon. Ne iyan in-ilis dan he hadì is anak ni Amon he si Josia.