ጌኤዦ ማፃኣፖ ቢያፓ ባሼ ዓይኑሞ 5

ዑኡታሢ ዓይኑሞ

1 ታኣኮ ናሽኪንታ ዑኡቴሌ!

ሃይሾ ታኣኒ ታኣኮ ዱማ ዱማ ባኮ ቱኮና ጎዦ ጋሮ ጌሌኔ፤

ኬርቤንታ ዱማ ዱማ ሳውቃ ቡኖ ታኣኒ ማንፄኔ፤

ዔኤዞ ፆሎሎ ሾፖና ዎላ ታኣኒ ሙዔኔ፤

ዎይኖ ዑዦንታ ዲኢቆንታ ታኣኒ ዑሽኬኔ።

ዑኡቴሎ ላጎንሢ ዓይኑሞ

ኑ ላጎንሢዮቴ!

ናሹሞ ዒንሢ ዒና ዓኣሣንዳያ ሄላንዳኣና

ሙይ፥ ዑሽኩዋቴ።

ዖይዳሳ ዓይኑሞ

ዑኡቴሎ ዓይኑሞ

2 ታኣኒ ጊንዓዛ፥ ዒና ታኣኮ ጋዓንቴ ጴቺኬ፤

ታ ዒሼ ሂዚ ጌይ ዔኤሊንታንቴ ታ ዋይዜኔ፤

«ታኣኮ ናሽኪንታ ዑኡቴሌ!

ሃይማ ፓጬኔ ጌይሳ ባኣዚ ባኣ ዶኦሌሌ!

ሃዳራ ካሮ ታኣም ቡሌ፤

ቶኦካ ታኣኮ ዖልካዼኔ፤

ጋማኣ ታኣኮ ዋንታኣ ቃኣያሢና ዎዔኔ።»

3 ማኣዓሢ ታኣኮ ታኣኒ ኬሴኔ፤

ማይ ጊንሣ ታኣኒ ማኣዖንዶ?

ቶኮዋ ታኣኮ ታኣኒ ማስቴኔ፤

ዓካሪ፥ ጊንሣ ዎዲ ፑርቲሶንዶይ?

4 ታ ዒሼ ፂኢኖና

ኩጮ ፔኤሲ ዳኬኔ፤

ዒና ታኣኮ ዒዛ ጋይቴ ዱጴኔ።

5 ዬያሮ ታ ዒሾም ካሮ ቡላኒ ታኣኒ ዔቄኔ፤

ካሮ ጎቺ ቡሎ ባኮ ታኣኒ ዓርቃዛ

ኩጫ ታኣኮ ኬርቤ ፆዺሴኔ፤

ኬኤላኣ ታኣኮ ዬያ ሌሊ ማዔኔ።

6 ታ ዒሾም ካሮ ታኣኒ ቡሌኔ፤

ጋዓንቴ ታ ዒሼ ባኣሴ፥ ዴንዴኔ፤

ዬያሮ ዒና ታኣኮ ኮሺ ዱጴኔ፤

ሚርጌና ታ ኮዔኔ፥ ጋዓንቴ ዒዛ ዴንቃኒ ዳንዳዒባኣሴ፤

ታ ዒዛ ዔኤሌኔ፥ ጋዓንቴ ዒ ታኣም ዬሂባኣሴ።

7 ካታሞ ሳዞ ሃንቲ ሃንቲ ካፓ ዓሳ ዒማና ታና ዴንቄኔ፤

ዔያታ ታና ጳርቂ ማኣሳንሤኔ፤

ኬኤሎ ዲፆ ዑፃ ዴዒ ካታሞ ካፓ ዓሳ

ዖዶዞ ማኣዓሢ ታኣኮ ጉሲ ዔኬኔ።

8 ዒንሢ ዬሩሳላሜ ዉዱራሢ

ታ ዒሾ ዒንሢ ዴንቄያ ማዔቴ

ታኣኒ ዒዛ ማሊፃፓ ዔቄያና ሃርጊንቴያታሢ

ዒንሢ ዒዛም ኬኤዛንዳጉዲ ታ ሺኢቃኔ።

ዑኡቴሎ ላጎንሢ ዓይኑሞ

9 ኔኤኒ ላኣሎ ቢያይዳፓ ሚዛጴሌ!

ጎኔና ዒሼ ኔኤኮ ሃንጎ ዓሶይዳፓ ዱማዻ?

ኔ ዒዛ ዛሎ ሃያይዲ ሃዳርሳሢ?

ዒዚ ሜሌ ዓሶይዳፓ ዱማዻሢ ዓይጎናዳይ?

ዑኡቴሎ ዓይኑሞ

10 ዒሼ ታኣኮ ኮሺ ሚዛጳያ ሃሣ ሃርጌ ባኣያኬ፤

ታጶ ሺያ ዓቲንቄ ባኣካፓ

ዒዛ ሄላያ ባኣሴ።

11 ቶኦካ ዒዛኮ ጌኤሺ ዎርቄ ማላኔ፤

ጋሞ ዒዛኮ ጋምፒ ማዦናያ ቁራኬጉዲ ካርታያኬ።

12 ዓኣፓ ዒዛኮ ዎርዚ ዓቺዳ ዓኣ

ዑፆ ፔኤኮ ዲኢቂና ማስቴ ዶኦሌ ማላኔ።

13 ጋንጋሮ ሚዛጱማ ዒዛኮ ዱማ ዱማ ሳውቃ ዼኤሻ

ባቃሊ ዓኣ ጎሺጉዲኬ።

ሙሱራ ዒዛኮ ቃራ ሳውሞ ዓኣ ኬርቤ ጌይንታ ዼኤሾ

ፆዺሳ ሚዛጶ ቡኖጉዲኬ።

14 ቃሳ ዒዛኮ ሚዛጶ ሹዎና ሚዛጲሶና ዎርቄ ኮኦሎጉዲኬ፤

ዑፃ ዒዛኮ ሴንፔሬ ጌይንታ ሚዛጶ ሹዎና ሚዛጲሶና ዳርሲ ዓቺጉዲኬ።

15 ቶካ ዒዛኮ ዎርቄይዳ ዾቂንቴ

ዒብኔቤሬዴ ጌይንታ ሹዎ ቱርቱሮ ማላኔ፤

ማላሢ ዒዛኮ ሊባኖኦሴ ሚፆና ሚዛጲሶና

ሊባኖኦሴ ዹኮጉዲኬ።

16 ዻንጋ ዒዛኮ ዔኤሲጉዲ ዓኣፃያኬ፤

ጉቤና ዒዚ ኮሺ ሚዛጳኔ፤

ዒንሢ፥ ዬሩሳላሜ ዉዱራሢዮቴ

ታኣኮ ዒሼ ያዺኬ፤ ታ ላጋሢያ ዒዛኬ።