6
ዑኡቴሎ ላጎንሢ ዓይኑሞ
1 ኔኤኒ ላኣሎ ቢያይዳፓ ሚዛጴሌ!
ኔ ዒሼ ዎዚም ዓኣዼይ?
ኑ ዎላ ዒዛ ኮዓንዳጉዲ
ዒ ዴንዴ ባንፆ ኔ ኑም ኬኤዜ።
ዑኡቴሎ ዓይኑሞ
2 ታኣኮ ዒሼ ማራቶ ሄንቃኒና
ሚዛጶ ቡኖ ዔካኒ
ዱማ ዱማ ሳውቃ ዼኤሻ ቱኪንቴ ቤዞ ዓኣዼኔ።
3 ታ ዒሼ ታኣሮኬ፥ ታኣኒያ ዒዛሮኬ፤
ዒዚ ሚዛጶ ቡኖ ባኣካ ቆልሞ ሄንቃኔ።
ዶንጋሳ ዓይኑሞ
ዑኡታሢ ዓይኑሞ
4 ታ ሚሼሌ! ኔኤኒ ቲርፃ ካታሞጉዲ ሚዛጳኔ፤
ዬሩሳላሜ ካታማ ኮሽካሢጉዲ ኔኤኒ ኮሽካኔ፤
ዖሎ ባንዲሮ ዓርቂ ኬስኬ ዓሶጉዲ
ዓውካራ ኔኤሲ ዓሲ ዲቃሣያኬ።
5 ታ ሚሼሌ፥ ሃዳራ ዓኣፖ ኔኤኮ ታጊዳፓ ሺርሼ፤
ዬይ ዓኣፓ ኔኤኮ ታና ዲዒ ዔኪ ቱኡሲ ዓሲ ማሄኔ።
ቶኦኮ ጋማ ኔኤኮ ጌሌዓዴ ዹካፓ
ጎዒ ኬዳ ዋኣሪጉዲኬ።
6 ዓጫ ኔኤኮ ዔያቶ ባኣካ ፔቴታዖ ሴኤካባኣ
ሜንቴ ሜንቴ ሾዓያና ዋኣሢና ማስቴ
ቦኦሬ ማራይጉዲ ዎዛሳያኬ።
7 ኔኤኮ ላምዖ ዛሎ ጋንጋራ
ዓኣፖ ካሮ ካንቆና ባኮ ባኣኪና ጴዻኣና
ላምዖ ፓቂንቴ ሮኦማኔ ዓኣፒ ማላኔ።
8 ላሂታሚ ጌኤሾንሢንታ ሳሊታሚ ሌጎንሢንታ
ፓይዳ ዔርቱዋያ ማዔ ሚዛጲ ዉዱሮ ናይ ዓኣያ ማዓኒ ዳንዳዓኔ፤
9 ጋዓንቴ ታኣኒ ናሽካዛ ፔቴዞ ሌሊኬ፤
ዒዛ ሃይማ ፓጬኔ ጌይንታ ባኣዚባኣ
ዶኦሌጉዲ ሚዛጳያኬ፤
ዒዛ ፔ ዒንዶኮ ፔቴኬ፤
ዒዞ ሾኤ ዒንዳ ቢያፓ ዑሣ ዓኣሢ ዒዞ ናሽካኔ፤
ዉዱሮ ናኣታ ዒዞ ዛጊ ዛጊ «ኔ ዓንጂንቴያኬ» ጋዓኔ፤
ጌኤሾንሢንታ ሜሌ ሌጎንሢ ማዔ ካኣቲ ላኣላ ዒዞ ሄርሻኔ።
10 ሃና ፖዒጉዲ ፖዒ ጴዻዛ
ዓጊኒ ዖይዺ ፖዓያጉዲ ፖዓዛ
ዓቢጉዲ ፖዒ ጴዻዛ
ዖሎ ባንዲሮ ዓርቂ ኬስኬ ዖሎ ዓሶጉዲ
ዓውካራ ዒጊቻያ ማዔዛ
ሃና ዖናዳይ?
11 ዶኦጮይዳ ባቃሊ ዋርቂ ዓኣ ባኮ ታኣኒ ዛጋኒ
ዎይና ቱሼቴ፥ ሮኦማናኣ ቡኔቴ ዛጋኒ
ሌውዞ ጎዦ ታኣኒ ኬዴኔ፤
12 ታ ዬያ ዔሪባኣንቴ፥ ታኣኮ ዓፃዺፃ ታና
ሳርጌሎ ዖይቶይዳ ካኣቲ ናይጉዲ ዔኪ ዴይሤኔ።
ዑኡቴሎ ላጎንሢ ዓይኑሞ
13 ኔኤኒ ሱላሜ ዓሲ ማዔዜሌ! ዔዞ ሃኒ ማዔቴራ፤
ኔና ኑ ኮሺ ዛጎም ሃዳራ ማዔቴራ።
ዑኡቴሎ ዓይኑሞ
ማሃናይሜ ኮፆ ዛጋ ዓሲ ማሂ
ሱላሜ ዓሴሎ ዒንሢ ዓይጋ ዛጋይ?