PILIPAI
KUIMP TEPA IK KɄⱠ
Ya Buk Ei Nga Pʉⱡ Ei:
Pol ndi, mon ei ropa mondpa pili wamp mbʉ, mbun mindil om mbila, ronduⱡ puk muⱡeing ei mel nimba ronduⱡ mundrum.
Ya Buk Ei, Nam Ndi Rurum:
Ya buk ei, Pol ndi, mon rurum.
Mon Ropa Nam Ngurum:
Got nga Pilipai rapa tenda ila wamp ngurum.
Ui Nant Ila Rurum:
Buk kʉⱡ Pol Rom kona ila kan manga pepa rurum. Ei, Kraist metʉng ei kʉn, mbuldung pana 61 ila mon kʉⱡ rurum.
Ik Ronduⱡ: Pilipai 4:4
Enim ndi, ui mbila rʉk rʉk Nuim ei kʉn, kai pilik muⱡʉi! Na aldpa nʉnt ku, enim ambulk palk muⱡʉi!
IK PENG KɄⱠ
Rump
1:3-1:7 - Pol Got kʉn angge nitim
1:12-30 - Kont mul uⱡ ei Kraist
2:1-2:4 - Tʉn mep mana mbun Kraist itim ei mel itʉmin
2:5-2:18 - Kraist elim nga orunga mepa mana oⱡnga, Got ndi, elim nga orunga mepa oⱡa purum
2:19-2:30 - Timoti kʉn Epaprondaitas raⱡ
3:1-3:7 - Wamp ti, Kraist mondpa pilim ndam, wamp ei kun kai moⱡmba
3:8-3:21 - Tʉkrʉp mbun mel muⱡ ei, ⱡar nʉmp tʉmin
4:1-4:8 - Wamp mbʉ numan tenda pangga, numan kai pilik, pilpa kungʉndi kai mbʉ ting
4:10-4:23 - Pol mel titim mbʉ nga angge nitim
1
1 Pol kʉn Timoti raⱡ, tʉl Kraist Jisas nga kongun wu raⱡ ndi, mon ei ropʉⱡ, enim Got nga wamp Pilipai kona ila Kraist Jisas nga mondpa pili wamp kʉⱡ kʉn, rʉp wamp na, kongun wamp mbʉ pora rop ngunmbʉⱡ.
2 Tʉn nga, Wuta Got kʉn, Nuim Jisas Kraist raⱡ nga wamp poⱡ ti uⱡ ei kʉn, numan wang ndui uⱡ raⱡ, enim kʉn kan piyangga!
Pol Got Kʉn Angge Nitim
3-6 Ui mbila rʉk na enim nga nimp pilip, na nga Got kʉn angge nimp, rʉk rʉk numan kai pilip, enim nga nimp atinga rop mint mor. Nambuⱡ emel, na Rʉnang Ik Kai ei nga, unt kongun puⱡ mondʉp it ei kʉn, omba akup ui ila, na tʉk rapʉndʉrmʉn. Na kupa punt ei, Got ndi, kongun kai ei, enim kʉn puⱡ mundrum ei, etpa mepa mba, Kraist Jisas nga ui ou ila, etpa pora ndumba.
7 Na nga numan ei, enim kʉn tetʉm ei nga, wote na enim nga nʉmp pilip mor. Enim kep, na kep, Got nga poⱡ ti uⱡ ei tʉtmʉn. Ei nga, na kan manga ila pep, wote Rʉnang Ik Kai ei nʉmp kep, enim tʉp, na nga numan ila ambʉⱡʉp gi ndup mor.
8 Na Got nga kuimp keta ila ik kupa ei nʉnt. Kraist Jisas nga kont kaimp kul uⱡ ei ndi, na nga numan orunga ropa rut nduⱡnga, wote na enim omp kʉnimp ei nga kundʉⱡnga mor.
9-10 Na enim nga atinga rondʉp kʉn, enim nga wamp numan ngui uⱡ ei, tepa mba ou ndangga kʉn, wote pilpa kungʉndi tʉk, numan ila kʉmp tʉk kandʉk, uⱡ kun kai mbʉ pilik mbi nduk, wote Kraist nga ui ei om ei kʉn, enim wamp kun kai mbʉ muⱡeing.
11 Enim nga numan ila, Jisas Kraist nga uⱡ kun kai mbʉ, tepa peka rangga. Uⱡ ei ndi, Got mbi ou tangga kʉn, wote tʉn ndi, Got nga mbi ei, paka rundʉmin.
Kont Mul Uⱡ Ei Kraist
12 Wote angmʉn, enim pilʉi! Uⱡ na kʉn enim mbʉ ndi, Rʉnang Ik Kai ei, ropa mana ndui nandʉrʉm mon. Uⱡ ei ndi, Rʉnang Ik Kai ei, etpa mepa int int purum.
13 Ei kʉn, Rom gapman nga manga ila, el wu mbʉ pora, wote wu mat kunda, na Kraist nga mbi ila kan manga ila pet. Ei nambuⱡ emel, na Kraist nga kindmant wu ei nʉk pʉtmin.
14 Wamp ou nduk, Wu Nuim ei mondʉk pʉtʉng. Ei kʉn, na kan manga ila pit ui ei kʉn, wamp kʉⱡ nga mondpa pili orunga ronduⱡ tʉtʉng. Wote, mundmong etʉng uⱡ ei, wak rok, ronduⱡ mondʉk, Got nga Rʉnang Ik Kai ei nʉndʉtʉng.
15 Kupa, wamp mat ndi, Kraist nga Rʉnang Ik Kai ninmin ei nga pilik, kit pilik, wʉlʉk rok etmin. Wamp mat ndi, pilpa kungʉndi kai mbʉ, tʉk Kraist nga Rʉnang Ik Kai ei ninditmʉn.
16 Wu kʉⱡ pʉtmin ei, na wamp nga kuimp keta ila moⱡʉp, Got nga ik ei nʉmp ronduⱡ mundʉr ei nga, wamp mbʉ ndi, na numan nguk, Got nga ik ei nitmin.
17 Wote wu mat, en enim mbi ou ting pilik, Kraist nga ik ei nitmin. Wu mbʉ, numan kun mat kandʉk tʉk, ni nanʉnmʉn mon. Na kan manga ila pʉnt ei kʉn, na mbun ou ndupa nguing pilik ninmin.
18 Wote kep, nui uⱡ ei kep, kupa ni uⱡ mbʉ kep, uⱡ mbʉ pora, Kraist nga mbi paka rundʉnmʉn ei, na rʉk rʉk, numan mint etmba.
19 Wote, na pʉnt ei, enim na tʉk rapʉndʉk, atinga rormin ei ndi, Jisas Kraist nga Muⱡnga Wingti na ronduⱡ ngangga! Ya uⱡ pʉnmʉn mbʉ ndi, na tʉpa rʉpʉndangga moⱡʉp, kai mundimp.
20 Na numan mam ti enim uⱡ, wote orunga pemba mbʉ, nokundʉp mor. Na ronduⱡ mbo uⱡ etʉp mor ei mel itimp ku, pipil kuⱡi nʉⱡimp. Wote, na kunt ndam kep, kont munt ndam kep, na uⱡ int ei ndi, Kraist nga mbi paka rundimp.
21 Na pʉnt ei, na kont munt ndam, Kraist nga kongun ei, indimp muna kunt ndam, mel muⱡ ti timp.
22 Wote, na kont munt ndam, na kapⱡa wamp ou ndupa tʉp rʉpʉndimp. Uⱡ raⱡ nga na itimp ei, na pili napʉnt.
23 Na ila numan raⱡ etʉp pʉnt ei. Na Kraist kʉn mbo munt ndam, ei ama uⱡ kai mel ti pʉnt!
24 Ei ama uⱡ kai ti pʉnt. Wote na kont munt ndam, enim kapⱡa tʉp rʉpʉndimp.
25 Na numan ronduⱡ ti pʉnt ei, enim kʉn moⱡʉp mint mbo enim tʉp rʉpʉndamba kʉn, enim nga mondpa pili ronduⱡ pangga, ambulk palk muⱡeing.
26 Wote, na enim kʉn unt ei kʉn, enim na kʉn ambulk palk, Kraist Jisas nga mbi paka runding.
27 Namba uⱡ mat em ndam, Kraist nga Rʉnang Ik Kai ei, nʉtʉm ei mel pep rui! Na enim omp kʉnt ndam kep, wote enim mormun ei nga timan ik ei, pint ndam kep, na ti pʉnt ei, enim numan tenda pangga, numan tenda ei mint ambulk molk, Rʉnang Ik Kai ila mondpa pili uⱡ ei, etʉk ronduⱡ mundʉi.
28 Enim nga el rui wamp mbʉ nga mundmong iti nʉtʉi! Rʉk rʉk ronduⱡ mundʉk molk, wamp mbʉ uⱡ kupa mbʉ tʉk ora ndʉi. Wamp mbʉ nila muⱡing, wote enim muⱡ ping. Nambuⱡ emel, Got ndi, enim itʉi nʉtʉm uⱡ ei mel etʉm.
29 Got ei ndi, enim Kraist nga kongun indeing nimba uⱡ kai mbʉ ngurum. Enim Kraist kʉn mondpa pili uⱡ ila mint ngui ngʉnggʉrʉm mon. Wote, elim nga mbi ila molk, mbun koma ruing uⱡ ei kunda ngurum.
30 Unt enim na kandrʉng ni, na el rur. Akup ei kʉn, na el rop mint mor timan ik ei pʉnmin. Enim na kʉn rup rop moⱡpʉn el rʉmin.