2
Tʉn Mep Mana Mbun Kraist Itim Ei Mel Itʉmin
1-2 Enim nga, numan ila Kraist kʉn ronduⱡ tʉtmʉn muna? Wote, elim nga kaimp kul uⱡ ei ndi, enim nga numan orunga etpa wang ndurum muna? Muⱡnga Wingti nga mul uⱡ ila rukrʉng orunga mormin muna? Enim nga numan ei, wamp ʉngʉnʉl kʉⱡ nguk kaimp kurmin ei? I etʉk kʉn, na nga ambuⱡpa puⱡi uⱡ ei, etʉk ou indʉi! I etʉk numan tenda mundʉk, wote kaimp kul uⱡ tenda ambulk, numan tenda pangga muⱡʉi!
3 Enim nga numan orunga mint pilik, kara pi nʉpʉi mon! Wote, wamp mat tʉk ou nduk, enim mana orunga muⱡʉi!
4 Enim nga kʉng orunga mint pili nʉpʉlʉi mon! Wamp mat nga kunda pilʉi ku!
Kraist Elim Nga Orunga Mepa Mana Oⱡnga, Got Ndi, Elim Orunga Mepa Oⱡa Purum
5-6 Enim Kraist Jisas nga numan pʉtʉm ei mel ku pilʉi!
Elim ni Got ku, wote elim ni, Got Tipam murum ei mel muⱡimp nimba, pili nʉpʉtʉm, mon!
7-8 Elim nga numan ei wak ropa, kongun kindmant wamp mel raⱡpa moⱡpa, elim nga orunga mepa mana omba, Got nga ik ei pep ropa mba kurum. Nde peta ila ruing nimba pitim ndam kep, koⱡmba ei nga numan ngumba kurum.
9-11 Ei nga, Got ndi, Jisas oⱡa tʉpa, elim nga ki mbo orunga mundrum. Wote, mbi ti ngurum ei, mbi wei mbʉ mel mon, mbi ou ti ngurum. Mbi ei Jisas. Nambuⱡ emel, wi muⱡ kona kep, ya mʉi kona kep, mʉi min mana orunga kep, wamp mbʉ, Jisas nga mbi ei tek, mura rok mondʉk, wote wamp ik nuim kan elpa elpa mbʉ ndi, pora keta tenda puⱡnga, Jisas Kraist ei Nuim ei nangina, Got Tipam nga mbi ei mon pangga! Tʉn ndi, Got nga mbi ou ei paka rundʉmin.
Tʉn rʉⱡang Ei Mel Muⱡʉmin
12 Ei kʉn, na nga wamp mʉn kʉⱡ, na unt enim kʉn, mur ei kʉn, na nga ik ei rʉk rʉk pep rorung, ei mel ku akup, na enim wak rur ei kʉn, ik ei pep ku rʉi! Enim kongun ronduⱡ mundʉk etʉk, Got ndi, tʉn rukʉr titim ei nga, mundmong etpʉn angge nimbun, Got nga mbi paka rundmin.
13 Nambuⱡ emel, Got ndi, enim nga numan orunga pilpa kongun etʉm. Uⱡ ei nga, elim ndi, enim nga numan ei, ropa rot nduⱡnga, enim ndi, elim nga kongun numan ngorum ei mel kun kulk etmin.
14-16 Uⱡ mbʉ kump kʉm enim iting etʉk kʉn, popʉⱡ mundi namʉndʉk, el rui narʉk eng ei kʉn, uⱡ ⱡawa mat pi nʉpangga! Wote, enim Got nga kangambuⱡa kun kai ralk muⱡing. Wote enim ndi, kont mba mul uⱡ ei, ambulk gi nduk, enim ya mana mʉi ila wamp rʉⱡaip uⱡ kit etmin mbʉ nga ruk ting ila ui muⱡ ila mipil mel, rʉlang pangga muⱡing. Enim ndi, wamp mat kʉn, Rʉnang Ik kont pi kʉⱡ nʉk ngung ndam, wote Kraist nga ui ou ila, na enim kʉn numan etmba. Ei nambuⱡ emel, na nga kongun enim kʉn, it uⱡ mbʉ wei ai iti natʉmba.
17 Ei nga, na nga kʉng kʉⱡ enim nga, mondpa pili ei nga, nʉndʉp uⱡ kunt ndam, na enim kʉn ambʉⱡʉp paⱡʉp muⱡimp.
18 Wote ei mel ku, enim ndi, i ku etʉk, na kʉn ambulk palk muⱡʉi!
Timoti Kʉn Epaprondaitus Raⱡ
19 Wote, pilim ndam, ui nondpa ti kʉn, Timoti enim kʉn omba moⱡpa, enim nga enmin uⱡ mbʉ na kundpa nangga, numan kai pilip muⱡimp.
20 Wu tenda ei ndi, na nga numan pʉt ei mel pilpa, enim tʉp rʉpʉndimp ku nimba pʉtʉm.
21 Wote, wamp minal ndi, en enim nga kʉng orunga nga nʉk pilik, Kraist Jisas nga kongun mbʉ pili napʉtmʉn.
22 Wote, enim pilik mormun ei, Timoti na kʉn tipam kangʉm mel moⱡpʉⱡ, Rʉnang Ik Kai ei, nʉmp mep andrʉmbʉⱡ kangʉm ndi, tipam tʉpa rapʉndurʉm ei mel.
23 Wote, na nanim moⱡʉp pilamba uⱡ mbʉ, kapⱡa em ndam, Timoti enim kʉn ui nondpa tila tʉp mundimp.
24 Wote, na kupa pʉnt ei, Nuim ei ndi, nombuⱡa mam ti tʉpa kun tangga, na enim kʉn ui nondpa tila uimp.
25 Na pʉnt ei, na nga ʉngʉn Epaprondaitus, wote kongun rʉp wu, wote el nde wu, nombuⱡa rʉng wu Epaprondaitus ni, enim kʉn ngump int ndont.
26 Wu ei, enim kanʉmba ei nga numan elinga morum. Ei nambuⱡ emel, elim kui rurum ei nga enim numan ou nduk pilik mormun ei nga.
27 Ei kupa, unt elim kui rurum. Ei kʉn, koⱡpa pora nduⱡnga, ei wote, Got ndi, wu ei kont kurum. Wote, na kont kurum ku. Ei nambuⱡ emel, Got elim ndi, na mbun mam ti, koma rui nʉreimp nimba pitim.
28 Ei kʉn, na numan mam ti pʉnt ei, Epaprondaitus enim kʉn ngump int ndamba, enim kandʉk numan wang nduk kai pilangina, na numan ou ndup pili nʉpʉleimp.
29 Wote, wu ei om ei kʉn, Nuim ei nga mbi ila numan mam ti nguk, rawe etʉk tʉi!
30 Ei nambuⱡ emel, Kraist nga kongun indimp nimba etpa, elim koⱡmba itim. Elim koⱡmba ei, nga pili napilpa itim ei, enim ndi, iti natilingina mel itim.