13
Dimogu Matuauadi (Ba) Toxoratamona Iniadi
1 Toxoratamona harua na Moses ba,
2 “Amogu (lup) matuau longgalo ba (duwa) ngayuadi. Matuau longgalo dahayau liwe mana Isreldi bing ngayuadi, lipu xaung asaxa.”
3 Baing Moses harua na lipuadi ba, “Xaidapka li amogu ba wa xaidap hatuminga muliama, xaidapka asok sangua Isip, sangua titi oxata olanggama, namua na Toxoratamona xapkang ma sangua xaung rimang haringinoa. Labu axang anginga tela yis wa manau tai.
4 Hatata mana sobaga Abip, asok mala.
5 Bungina Toxoratamona xapkang ma maluxuʼm Kenandi, Hitdi, Amordi, Hibdi xaung Yebusdi titidingdi, titia hau haruangua rangua mugangaimdi ba sina nang, titi(a) orana, baxagi mana su xaung dungungu langina—(mana) bungina baguba bing atuxu taunga li mana sobaga baguli:
6 Axang salanga salalangang teguama sanga mana xaidap 7. Baing mana xaidap 7 bing atuxu taungua bu aiti Toxoratamona yanoa.
7 Axang salanga salalangang teguama (sanga) mana xaidap 7 ba. Anginga tela yis wa mana ba labu wa ranguanggu tai. Xauna labu yis tela wa maluxu mana titima ragundiu tai.
8 Mana xaidapka baguba bing abaxanga na garaimdi ba, ‘Ngalibu bila li bu ngahatumia muli axamana Toxoratamona libu manga bungina ngasok ma sangua Isip.’
9 Taunga baguli bagula wa bila mogungua wa rimaimia xaung bila axamang tela wa ramramoimia bu hauliang ahatumia alali muli: Toxoratamona hanaunaunganoa bing wa suxunguimia. Namua na Toxoratamona xapkang ma sangua Isip rimang haringinia.
10 Bing niani taining tainina asu mana hanaunaunga li mana bungina Toxoratamona mogu.
11 “Kimuya mana Toxoratamona xapkang ma maluxuʼm titia mana Kenandi saing sina nang, bila hau haruangua ranguang xaung rangua mugangaimdi ba,
12 bing asina (lup) matuau longgalo na Toxoratamona. (Lup) matuau longgalo mana moruimdi (xauna) bing Toxoratamona iniadi.
13 Sanga ba atuxu donki matuaunauyu, ne agim muli sipsip tutubing hanananiangania to. Nabu agim muli te, bing arambaxuti waxungtuanoa. (Bing) Agim garaim lup matuaua longgalo muli.
14 “Mana xaidapkadi dimayu, bungina garama xusungaung ba, ‘Alali baru namuxinta?’ bing uharua na ba, ‘Mana rimang haringinoa, Toxoratamona xap kira masok sangua Isip, sangua titi oxata olanggama.
15 Bungina Pero toxonoa haring, hauxana ba yunga kira ba tala, bing Toxoratamona ung matuau longgalo mana lipudi xaung asaxadi mana titia Isip. Namua naga am gahanania na Toxoratamona matuau longgalo mana moruimdi xaung am gagim muli matuaumam longgalo.’
16 Bagula (wa) bila mogungua wa rimamia xaung bila babua wa ramramomia bu tahatum muli, namua na mana rimang haringinoa Toxoratamona xap kira masok sangua Isip.”
Dikisi Mala Tega Hataina (Lo)
17 Bungina Pero yunga lipuadi ba dila, Urana xaidi mala mana daxangua kisi mala mana titia Pilistia te, heku raxabiana. Namua na Urana harua ba, “Nam duxugia hatumingadingdi bungina dibagu haungingua saing digoxoya mala mana Isip.”
18 Binabu Urana xai lipuadi mauli mana daxanga long xolianama ila mana Tek Sabuxana. Baing Isreldi dirai axamang haungingamdi bungina dahaing masok sangua Isip.
19 Moses xap Yosep tuandi rangua namua na Yosep haxi mana Isreldi dahau haruangua mana alaba. Harua ba, “Maxung sibuna Urana bagula hauliang, saing mana bungina baguba bing asia tuagudi mahaing ranguang sangua titia li.”
20 Kimuya mana diyunga longga Sukot, baing ditongtongia tabalaxaya mana longga Etam (wa) long xoliana rubinia.
21 Xaidabia Toxoratamona muga manadi mana mugap maxaxaya bu saxungdi daxangia, saing yambongia muga manadi mana yap maxaxaya bu saxungdi daxangia, bu heku xaidap kimbo yambong, sanga ba dahaxa mala.
22 Mugap maxaxaya sauya yabanoa xaidabia te. Yap maxaxaya sauya yabanoa yambongia te. Bungingbunginalo muga mana lipudi.