14
1 Baing Toxoratamona harua na Moses ba,
2 “Ubala Isreldi ba duxugia mala ditongtongia tabalaxaya haxek mana longga Pihahirot, liwe mana longga Mikdol xaung tega. Bing ditongtongia tabalaxaya tek rubinia, longga wa hataina mana longga Baal-Sepon.
3 Baing Pero bagula hatum ba, ‘Isreldi dahaxa mauli titia, dahasuxi baing. Long xolian(o)a soxautidi.’
4 Baing bagula ngalibu Pero toxonoa haring, saing bagula xu manadi. Ne Pero gabu lipuxing haungingam longgalo bagula (duwa) daxanga mana ngaxap yaya sabanga, saing Isipdi bagula daxabia ba nga ba Toxoratamona.” Binabu Isreldi dilibu bila ba.
5 Bungina Isip(di) xaitamoxidinga xap haruangua ba lipuadi digiti mala, Pero gabu yanamindi duxugia hatumingadinga manadi saing daharua ba, “Tayunga Isreldi ba dila baru? Bagula dituxu oxataroa muli te!”
6 Binabu Pero (tabina ba da)xauxau wilka inia xaung lipuxing haungingamdi.
7 Xap wilka xai sibung 600, xaung Isip wilka baruamtadi duwauyu, taining tainina bing yanaming tela wa etua mana.
8 Toxoratamona libu Pero Isip(di) xaitamoxidinga toxonoa haring, binabu xu Isreldi mala. Isreladi ba disok mala dimaxuwa te.
9 Isipdi duxudi mala, adi bila Pero hosindi xaung wilka iniadi, lipuadi dirung etua mana hosdi xaung lipu haungingamdi dahaxa kinia. Disok manadi mana longga Isreldi ditongtongia tabalaxaya tek rubinia, haxek mana Pihahirot, wa hataina mana Baal-Sepon.
10 Pero (di)ma (di)ma haxek, baing Isreldi dibagu mahaing. Baing ina naga dibagu Isipdi dima dima haxek manadi. Dimaxuwa sibuna baing daxaba doa sibuna mana Toxoratamona.
11 Baing daharua na Moses ba, “Baruta? Isip xola mana gobagobadi, binabu oxopkam ma long xoliania bu am gamati la li? Uria mam baru bungina oxopkam ma sangua Isip?
12 Ina naga am gabalaung ba bungina tawa Isip baing! Am gaharua ba, ‘Usup mana utautiti mam! Uyungam ba am gatuxu Isipdi oxatadinga. Xai buk mana am gatuxu Isipdi oxatadinga. Nam am gamati long xoliania!”
13 Moses haxuya na lipuadi ba, “Labu amaxuwau tai. Ali haringina saing bagula abagu axamana xapkang muli Toxoratamona bagula libu mang hatata. (Namua na) Isipkadi abagu hatata(u), bagula abagudi muli te!
14 Toxoratamona bagula haung bu hauliang. Ahixiya mana awa mosiu ing ganina.”
15 Baing Toxoratamona harua na Moses ba, “Uxaba doa sibuna manga baru? Ubala Isreldi ba dimesa dila!
16 Ung ba uiti ung tukima saing uraria rimama etua mana tegu saing utu tega bu Isreldi sanga ba dahaxa makisi mala mana titi mamasana.
17 Bagula ngalibu Isipdi toxodingdi daharing bu diluxu duxudi mala. Ne Pero gabu lipuxing haungingam longgalo xaung wilka iniadi xaung lipuxing hosiamdi bagula (duwa) daxanga mana nga ba ngaxap yaya sabanga.
18 Baing Isipdi bagula daxabia ba nga ba Toxoratamona bungina ngaxap yaya sabanga mana axa sok mana Pero gabu wilka iniadi xaung lipuxing hosiamgadi.
19 Baing Urana uleginama ina muga mana Isrel lipu haungingamdi ba, yunga yabanoa saing ila li kimu manadi. Mugap maxaxaya xauna yunga yabanoa muga manadi ba saing ila li kimu manadi,
20 li liwe mana Isip xaung Isrel tabalaxayadingdi. Mana yambongga baguba mugaba sina labiana na hataing tela xaung luliana na tela. Binabu soxauti hataing tela ba ma haxek mana hataing tela laing yambonga sup.
21 Baing Moses raria rimanoa etua mana tega, saing Toxoratamona yu yu tega mala karaga haringinia yambonga ila sup, saing xugia tega namua masok titi mamasana. Tega utuina,
22 saing Isreldi dikisi maluxu tega mala titi mamasania, tega li bila ramang tela rimamo (xaung) xong.
23 Isipdi duxudi mala, saing Pero hos xaung wilka xaung lipu hosiam longgalo disu manadi maluxu tegia.
24 Buraraging sibuna, labianauyu, baing Toxoratamona bagu mari sangua mugap yabing maxaxaya mana Isip (lipu) haungingamdi saing libudi dahasuxi (buk).
25 Libu wilkadingidi banggemidingdi dirabang bu diluki mauxana. Baing Isipdi daharua ba, “Tahaya sangua Isreldi! Toxoratamona haulidi haungingia saing haunggana kira Isipdi.”
26 Baing Toxoratamona harua na Moses ba, “Uraria rimama etua mana tega bu tega goxoya muli yabania etua mana Isipdi xaung wilka dingiadi xaung lipu hosiamdi.”
27 Moses raria rimanoa etua mana tega, saing (mana) bungina long usianam tegu goxoya mala yabania. Isipdi dituba ba digiti mala sangua malinganoa, ne Toxoratamona sogoxoyadi mari tek lunia.
28 Tega luki muli yabania saing kaukau wilkadi xaung lipu hosiamdi—lipu haunginam longgalo Pero tabinadi ba disu mana Isreldi maluxu tegia. Tela wa te. Ding longgalo dimati.
29 Ne Isreldi dikisi tega lang mamasania, tega li bila ramang tela rimamo (xaung) xong.
30 Bila balau xaidapka ba Toxoratamona xap Isreldi muli sangua Isipdi rimadingia, saing Isreldi dibagu Isip matiandi dikinu tek rubinia.
31 Baing bungina Isreldi dibagu Toxoratamona rimang haringinoa hatanga mana Isipdi, lipuadi dimaxuwa mana Toxoratamona saing dahatum haringina mana xaung (dahatum haringina mana) lipuxing oxatama Moses.