15
Moses Olainganoa
1 Baing Moses gabu Isreldi duwaya olaya li na Toxoratamona:
“Bagula ngawaya na Toxoratamona
namua na dali sibuna bixuandi.
Hos lipua rung etua mana tang
tingdi mari tegia.
2 “Toxoratamona (ina) haringingagua xaung olayagua,
ina (wa) xabingagua muli.
Ina Urana ngayua, saing bagula ngaiti yanoa,
ina Urana mana tibugu, saing bagula ngaiti yanoa (mahaing).
3 Toxoratamona (ina) lipu haungingam,
Toxoratamona (ina) yanoa.
4 Pero wilka iniadi xaung lipuxing haungingamdi
tingdi mari tegia.
Pero yanaming haungingam xai sibundi
dingara Tek Sabuxania.
5 Miawa(di) (di)kaukaudi,
dida tek lung sibunia bila sianga.
6 O Toxoratamona, rimam rimamo
haring sibuna buk.
O Toxoratamona, rimam rimamo
hamunanggia bixuamdi (masup).
7 “Mana yabama eta lo sibuna
uhanggalangia sibuna adi duxukxugiaung.
Uyunga atim salianoa mala,
taudi masup bila lik yoxondi.
8 Mana yungxam ginangindi yubuangadinga
tega xuru bunu.
Tek dudungama li bila ramanga
miawa nanggaxukgaxuk tek lung sibunia.
9 Bixua(m)di dahasua ba,
‘Bagula ngaxudi mala, bagula ngasok manadi.
Bagula ngatuxu sinaga mana xalingidingdi,
bagula ngaxap laing murungagua baxagi.
Bagula ngaxai waxangigu sabanga masok,
rimagua bagula hanggalangiadi masup.’
10 Ning uyubua yangimia,
saing tega kaukaudi.
Dida bila sianga
maluxu tek haringinia.
11 O Toxoratamona, liwe mana uranadi gaxarea bila ung? (Tegu.)
Gaxarea bila ung—
Kubolum maringindi daharing sibuna,
Kubolum yanam itinganamdi lipudi dimaxuwa manadi,
Ung lipu axamang haringing sibunamdi.
12 “Uraria rimam rimamo (mala),
saing titia ngaru bixuamdi masup.
13 Murungam sibunoa xung mari te,
bila balau umuga mana lipuadi ugimdi muli.
Uxaidi mala haringingamia,
bila balau disok mana yabama uwa mana ba.
14 Numanumadi dilungu (ulibu baru) saing dilulu,
maxuwanga sabanga xap adi dirung mana Pilistia.
15 Idom toxondi dimaxuwa buk,
lulunga xap Moap yanamindi,
Adi longgalo dirung mana Kenan dimauta mala.
16 Maxuwanga sabanga xaung lulunga xapdi.
Dibagu rimam haringinoa,
binabu dirung dimumguti bila sianga
laing lipuximdi dahaxa dalinga manadi, O Toxoratamona,
laing lipuadi ugimdi ba dahaxa dalinga manadi.
17 Bagula oxopdi maluxu ma saing uxumadi
mana ung sibum bimbiama,
longga ba utongtongia bu urung mana ba, O Toxoratamona,
numam sabungama rimamdi dirang mali, O Toxoratamona.
18 Toxoratamona wa xaitamoxi
bungingbunginalo (mala).”
19 Bungina Pero hosindi, wilkandi xaung lipuxing hosiamdi diluxu tegia, Toxoratamona xap tega goxoya ma etua manadi, ne Isreldi dahaxa makisi tega titi mamasania.
20 Saking Urana lipuxing suxunguxunguama Miriam, Aron hamunganoa, xap wagu (kaxukana) rimania, saing haing longgalo disu mana ditaha wagudingdi disiga.
21 Baing Miriam waya nadi ba:
“Awaya na Toxoratamona,
namua na dali sibuna bixuandi,
Hos lipua rung etua mana tang
tingdi mari tegia.”
Lang Mabiana
22 Baing Moses libu Isreldi dimesa Tek Sabuxania dila diluxu mana Long Xoliana Sur. Dahaxa xaidap tuwa, ne disai langa susu.
23 Disok mana longga Mara, baing sanga ba dinung langinoa te namua na mabiana. (Namua naga duxu longga ba Mara.)
24 Binabu lipuadi dahati Moses ba, “Am ganung baraxinta?”
25 Baing Moses xaba mana Toxoratamona, saing Toxoratamona hatanga xai gamo na. Moses ting mari langia, saing langa sok xai bu dinung.
La ba Toxoratamona ta hanaunaungandi masok bu disu manadi, saing la ba tadi tubaingia.
26 Harua ba, “Nabu amaxania alungu Toxoratamona Urana angia waxungtuanoa saing alibu kubolu maringindi maxania, nabu alungu xai tabinangandi saing asu mana hanaunaungang longgalo, busingadi ngaxap mari mana Isipdi bagula ngaxapdi mari mang te, namua na nga Toxoratamona ba, ang lipuxima libu asok xai muli.”
27 Baing disok mana longga Elim, longga lang maxamaxang 12 xaung xaiya det 70 duwa mana ba, saing ditongtongia tabalaxayadinga la ba lang rubinia.