17
Langa Sok Ma Sangua Sianga
1 Isrel hainglup longgalo dimesa diyunga Long Xoliana Sen, dahaxa mala long tela long tela bila Toxoratamona tabina. Ditongtongia tabalaxaya mana longga Repidim, ne xola mana langa ba dinung.
2 Binabu dahakhaxi rangua Moses saing daharua ba, “Asina langa nam ba am ganung!”
Moses haxuya ba, “Ahakhaxi rangua nga baru? Ata Toxoratamona tubaingia baru?”
3 Ne langa ung lipuadi la ba, saing dahati Moses. Daharua ba, “Baruta oxopkam mahaing sangua Isip ba am gagabu garamamdi morumamdi am gamati waxutu mamasania?”
4 Baing Moses xaba mala rangua Toxoratamona ba, “Bagula ngaria baru mana lipuadi li? Haxek sibuna bagula daxatu nga siangia mati.”
5 Toxoratamona haxuya na Moses ba, “Umuga mala lipuadi maxadingia. Oxop Isrel yanaming teladi ranguang xaung oxop tukia utaha Langga Nail mana ba rimamia, saing ula.
6 Bagu nga ba bagula ngali maxamia la ba mana sianga wa bimbia Horep. Utaha sianga, saing langa bagula sok ma sangua bu lipuadi dinung.” Binabu Moses libu bila ba Isrel yanamindi maxadingia.
7 Baing uxu longga ba Masa xaung Meriba namua na Isreldi dakhaxi xaung namua na dituba Toxoratamona bungina daharua ba, “Toxoratamona wa liwe mam kimbo tegu?”
Didali Amalekdi
8 Amalekdi dima dahaunggana Isreldi mana longga Repidim.
9 Binabu Moses harua na Yosua ba, “Umogu lubira teladi saing ula uhaunggana Amalekdi. Buragina bagula nga ba ngali haxagang uruxuna xaung Urana tukinoa rimagia.”
10 Binabu Yosua haunggana Amalekdi bila Moses tabina ba, saing Moses, Aron, Hur tung dahaing haxagang uruxunia.
11 Bungingbungina Moses iti rimandi mahaing, Isreldi didali, ne bungingbugina ta rimandi mari, Amalekdi didali.
12 Ne Moses rimandi dimalai, binabu tang daxap sianga dita hanggaxobinia saing rung mari mana. Aron Hur tang diti rimandi mahaing hataing hataina bu rimandi duwa mua laing xaidaba ri.
13 Binabu Yosua dali Amalek (lipu) haungingamdi sibuna waxangia.
14 Baing Toxoratamona harua na Moses ba, “Ubung alali mari xailongia bu wa haruanga hatuminga muliam tela, saing utiti Yosua tanganliania ba: Bagula ngasisia sibuna Amalekdi bu lipu longgalo duwa titia bagula dahatumiadi muli te.”
15 Baing Moses tongtongia kabukabu hananiangama saing uxu ba, Toxoratamona Plagigua.
16 Harua ba, “Diti rimadingdi ba dahaunggana Toxoratamona rung mana kabukabu xaitamoxiama. Binabu Toxoratamona bagula haunggana Amalekdi bungingbunginalo (mala).”