19
Duwa Bimbia Sainai
1 Sobak tuwa kimuya mana Isreldi disauya Isip, mana xaidabing mugamugangam, mana xaidapka naga disok mana long xoliana Sainai.
2 Disauya longga Repidim, baing diluxu mana long xoliana Sainai, saing Isreldi ditongtongia tabalaxaya la ba long xoliania bimbia maxania.
3 Baing Moses haing mala rangua Urana, saing Toxoratamona wagi bimbia mala mana saing harua ba, “Ubaxanga bila li na Isreldi, (adi) Yekop garandi baing:
4 ‘Ang sibuim abagu ngaraxata mana Isip, xaung ngaxoxiang bila matikomkom xoxi garandi banggitonginia xaung ngaxapkang ma rangua nga baru.
5 Baing hatata, nabu alungu haruangagua saing asu mana haruangua ngahau maringing sibuna, bing maluxuʼm numanuma longgalo bagula awa lipuxigudi atigu mang. Namua na titi longgalo ngayua,
6 ne bagula awa yongga lipu hananianganamdi manga xaung bakbagigu maringing sibundi.’ Haruangadi bagudi li bing ubaxanga na Isreldi.”
7 Binabu Moses goxoya mala saing wagi lipudi yanamidingdi dima (digugunia) saing baxanga haruanga longgalo nadi Toxoratamona tabina ba harua.
8 Lipu longgalo digugunia suxungudingdi daharua ba, “Bagula am galibu axamang longgalo Toxoratamona harua ba.” Binabu Moses xap haxuyangadinga ma (muli) rangua Toxoratamona.
9 Baing Toxoratamona harua na Moses ba, “Ulungu to. Bagula ngama ranguaung maluxuʼm mugap mutungana, bu lipuadi bagula dilungu nga ngaharua ranguaung saing bungingbunginalo bagula dahatum haringina maung.” Saking Moses baxanga na Toxoratamona lipuadi haruangadinga.
10 Baing Toxoratamona harua na Moses ba, “Ula rangua lipuadi saing ulibudi disigixinga maxagia hatata xaung buragina. Ubaladi didamia imangidingdi
11 xaung mana xaidap tuwa daxauxau masup. Namua na mana xaidapka ba bagula Toxoratamona ri ma mana Bimbia Sainai lipudi maxadingia.
12 Uta ragundi taxiya mana bimbia saing ubaxanga nadi ba, ‘Amaxania nam ahaing mana bimbia kimbu aringring rubinoa. Lipu gaxarea diringring bimbia bing aungdi mati.
13 Labu lipu tela ringringdiu tai. Ne axatudi mati siangia kimbo ahangdi mati gulia. Heku lipu kimbo asaxa, sanga ba wa te.’ Bungina alungu toxia sau, bing sangau, sanga ba dahaing ma bimbia.”
14 Moses ri bimbia mala masup rangua lipudi, baing libudi duwa sigixinga, saing didamia imangidingdi.
15 Baing harua na lipuadi ba, “Axauxauang (sanga) mana xaidap tuwa. Asaha mana kinu(nga) rangua haingdi kubolunoa.”
16 Xaidap tuwa burararagina baing kaxaba taha xaung bilikbiliga mua, xaung mugap mutungana kau bimbia, xaung toxia sau sabanga. Lipu longgalo duwa tabalaxaya dilulu.
17 Baing Moses xai lipudi sangua tabalaxaya mala ba digugunia Urana, saing dili bimbi namuya.
18 Bunuyuxang sabanga kaukau Bimbia Sainai, namua na Toxoratamona wa yabia ri ma mana. Bunuxuyana buxuixui mahaing mana bila yaba tau raxanga, saing bimbi urungina lulu doa sibuna.
19 Toxia saunganoa tubu tubu mala, baing Moses harua saing Urana waxungtuanoa haxuya.
20 Toxoratamona ri ma mana Bimbia Sainai uruxunoa saing wagi Moses ba haing ma bimbi uruxunia. Binabu Moses haing mala
21 saing Toxoratamona harua na ba, “Uri mala uharua haringina lipuadi ba dimaxania, nam dihixi dalinga ba dibagu nga Toxoratamona ba, saing xumana dahanggalang.
22 Xauna, lipu hananiangamgadi dima haxek mana Toxoratamona ba, bing dilibu ding sigixingading to, nam Toxoratamona hanggalangiadi.”
23 Moses harua na Toxoratamona ba, “Lipuadi sanga ba dahaing ma Bimbia Sainai te, namua na ung sibung uharua haringina nam ba, ‘Uta ragundi taxiya mana bimbia ba mogu ba bilingam.’ ”
24 Toxoratamona haxuya ba, “Uri mala saing oxop Aron mahaing ranguaung. Ning lipu hananiangamdi digabu lipuadi labu dihixi dalinga ba dahaing ma rangua nga Toxoratamona ba, nam ngahanggalangiadi.”
25 Binabu Moses ri mala rangua lipuadi saing baxanga nadi.