21
1 “Hanaunaungadi bagudili bing usinadi nadi:
Hanaunaungadi Mana Hibrudi Duwa Lipu Oxata Olanggamdi
2 Nabu ugim Hibru lipu oxata olanggam tela, bing bagula tuxu oxatua naung sanga mana niani 6. Ne (mana) niani 7, bagula sok mala olang, giminaging (naung) te.
3 Nabu gananuna bungina oxop, bagula sok mala bila ba. Nabu (lipu) yaungam bungina oxop, bagula (haininoa) sok mala rangua.
4 Nabu lipuxing haringina sina hainga na saing hayau gara lupdi kimbo nanuhangindi na, bing hainga gabu garandi bagula lipuxing haringina iniadi, saing lipua ing ganina bagula sok mala olang.
5 “Ning nabu lipu oxata olanggama harua ba, ‘Murugu sibuna mana lipuxigu haringinoa xaung hainigua xaung garagudi saing murugu ba ngasok mala olang te,’
6 bing lipuxing haringinoa bagula xap mala Urana maxania. Xap mala mana xalua kimbo xalu yabanoa. La ba bagula simbaxang(guti) tangangliana nilia. Baing ina naga, bagula wa lipuxing oxata olanggama laing mati.
7 “Nabu lipu tela sina nanuhanginoa siangia bu sok haing oxata olanggama, bing sanga ba sok mala olang bila lup oxata olanggamdi dilibu te.
8 Nabu lipua gim bu wa bila haininoa, saing yaha mana te, bing yunga hainga mala rangua tibuna ba gim muli. Ne labu lipua ba sina na bakbak titi telam siangiau tai, namua na kubolunoa libu na hainga maring te.
9 Nabu mogu ba wa garang lup haininoa, bing libu kubolua na bila ing sibung nanuhanginoa.
10 Nabu lipua ba yau haing tela muli, bing labu tatua hainga angianoa, imingindi kimbo kinunganoa ranguau tai.
11 Nabu libu kubolu tuwa ba mana te, bing hainga sanga ba sok mala olang, giminaging te.
Hanaunaungadi Mana Lipuadi Daxap Doa
12 “Lipua gaxarea ditaha lipu tela bu mati, bing aungdi mati.
13 Ning, nabu dituba ba ung mati te, ne Urana yunga ba sok, bing diluki mala mana longga bagula ngamogu.
14 Ning nabu lipu tela atin disala, sai daxanga saing ung lipu tela mati, bing heku lipua ba luki mala mana kabukabugu hananiangama bu wa sangau, axap mala aung mati.
15 “Lipu gaxarea ditaha baudingtibudingdi bing aungdi mati.
16 “Lipu gaxarea dahanai lipu tela bing aungdi mati, heku lipua ba wauyu ranguadi kimbo disina siangia masup.
17 “Lipu gaxarea digamia tibuna kimbo bauna, bing aungdi mati.
18 “Nabu lipu luwa tang dahaung, saing tela taha tela siangia kimbo rimania, saing rianoa mati te ne sanggang didoa bu wa uxaingia mua,
19 saing nabu lipua doa ba mesa muli saing haxa mala ma sabasabia tukinia, bing lipua tahangama bagula xap salaga te. Ning gim rianoa (mana) ganangana sanga ba waxata te xaung wasa mana laing sanggang daxai muli to.
20 “Bungina lipu tela taha lubing kimbo haining oxata olanggama xaung xaiya, saing lipu oxata olanggama ba mati rimania, bing (lipu haringinoa) xap salaga (to).
21 Ne nabu lipu oxata olanggama ba wauyu laing xaidap taininau kimbo luwa, bing xap salaga te, namua na lipu oxata olanggama (lipuxing haringinging) xalinginoa.
22 “Nabu lipu luwa tang dahaung saing ditaha haing tela gamona bu hayau doa, ne haingga ba xap doa muli te, bing lipua taha (ba) gim (to), bila hainga ayuanoa mogu xaung lipu haruanga suxuyanganamdi dinai mana.
23 Ning nabu xap doa muli, bing lipua taha ba bagula xap (doa) maxang taininau. Nabu hainga mati, bing ung lipua ba mati xauna.
24 Bila balau, nabu maxana xap doa bing uhanggalangia maxanoa, waina tauna waina, rimana tauna rimana, kina tauna kina,
25 yaba tau tauna yaba tau, saxana tauna saxana, soxuna bing soxuna.
26 “Nabu lipu tela taha lubing kimbo haining oxata olanggam maxanoa saing hanggalangia, bing yunga lipu oxata olanggama ba sok mala olang mana maxang haxuyanganoa.
27 Xauna, lipu haringing gaxarea tahauti lubing kimbo haining oxata olanggam wainoa, bing yunga lipu oxata olanggama ba sok mala olang mana wainoa giminaginoa.
28 “Nabu kau ung lup kimbo haing tela mati salaminia, bing axatu kaua ba mati siangia. Labu axang mututunganau tai. Ning kau moxonoa mauxangan te.
29 Ning nabu kaua ba kubolunoa bila ba bungingbunginalo, saing moxonoa xap haruanga haringina ba soxauti gamgamingia, saing ung lup kimbo haing, bing axatu kaua ba mati siangia, saing aung moxonoa mati xauna.
30 Ning nabu lipu matiama bakbaginoa dahaxi mana haxuyangua, bing moxonoa gim haxuyanga baruamta dimogu ba bu mati te.
31 Nabu kaua ung lipu tela garang luba kimbo nanahanginoa mati salaminia, bing asu mana hanaunaunga baguli xauna.
32 Nabu kaua ung lup kimbo haing oxata olanggam tela mati salaminia, bing moxonoa gim lipu oxata olanggama lipuxing haringinoa siang silba 30, saing daxatu kaua ba mati siangia.
33 “Nabu lipu tela xaxa banggum maxanoa, kimbo bungina ki banggum tela bing kaukau te, saing kau kimbo donki tela xung mari lunia,
34 bing banggum moxonoa haxuya asaxa moxonoa (to). Tauna, asaxa mati ba inia.
35 “Nabu lipu tela kaunoa hanggalangia lipu tela inia, saing mati, bing tang disina kau gamatanauyu siangia saing tang dituxu sinak mana giminaginoa. Kau mati ba xauna bagula dituxu sinak mana.
36 Ning nabu daxabia ba kau ba kubolunoa bila ba (bungingbunginalo), saing moxonoa soxauti gamgamingia te, bing haxuya asaxa gamatang tela mana asaxa mati ba, saing matia bagula inia.