22
Xalaxala Wasangang Hanaunaungandi
1 “Nabu lipu tela hanai kau kimbo sipsip, saing ung mati kimbo sina siangia, lipu hanaunggama bing haxuya rianoa kau luwadi luwadi hiliadinga sanga mana kau taininau, kimbo sipsip luwadi luwadi sanga mana sipsip taininau.
2 “Nabu yambong lipu hanaunggam tela luxu mana numa tela ba hanai saing dituxu ditaha mati, bing lipu ungingam mauxangan te.
3 Ne nabu alaba sok xaidabia, bing lipu ungingam mauxangana.
“Lipu gaxarea hanai bing haxuya. Ne nabu xola xalingindi, bing disina lipua ba siangia wa lipu oxata olanggama bu haxuya baraxingbaraxinta hanai.
4 Nabu asaxua hanai ba wa gamatana rimania, heku kau kimbo donki kimbo sipsip, bing haxuya axasa luwa baruamta hanai.
5 “Nabu lipu tela xap morundi mala ba daxang umangia kimbo wain umangania, ne yungadi ba didali halinga ragunoa mala daxang lipu tela umanginia, bing haxuya na umanga moxonoa axamang xai sibundi dima sangua ing sibung umanginoa kimbo waining umanganoa.
6 “Bola lipu tela tung umangia saing yaba xap tatubanga kisi mala tau lipu tela witing bunundi kimbo witindi diliyu kimbo umangang urungina sup. Lipu tungingam bing haxuya baruamta longgalo disup.
7 “Bola lipu tela sina sianging silba kimbo xalingindi mala rangua rianoa bu wasa manadi, saing dahanggalang lipua ba numania. Nabu dituxu lipu hanaunggama bing xibua xalaxala giminaginoa.
8 Ning nabu disai lipu hanaunggama susu, bing numa moxonoa ila li lipu suxuyangamdi maxadingia, saing disuxuya (ba) nabu rimandi dimaxaxaya mana rianoa xalingindi.
9 Bola hakhaxinga mesa liwe mana lipu luwa mana gaxarea moxona mana kau, donki, sipsip, imang, kimbo xalaxala tela hanggalang daharua ba, “Ngayua.” Bing tang daxap haruangadinga mala lipu suxuyangamdi maxadingia. Baruamta lipu suxuyangamdi dibaxanga ba dimogu mauxangana namua bing xibua xalaxala giminagina na rianoa.
10 “Bola lipu tela sina donki, bulmakau, sipsip kimbo moru tela rangua rianoa bu wasa mana, saing mati kimbo xap doa kimbo sup lipu hanaunggamdi rimadingia, saing lipu tela bagu te.
11 Bing mauxanganoa wa liwe madingtang bing sup bila li: Dahau haruangua Toxoratamona maxania ba moxong riang rimandi dimaxaxaya mana riang xalinginoa te. Moxonoa bing lungu haruanga baguba, saing rianoa bagula haxuya te.
12 Ning nabu maxuna morunoa hanggalang hanaingia, bing rianoa haxuya.
13 Nabu asaxa abungina sing saha, bing rianoa bagula xap sanggang hataindi dima bu hatanga maxuna, saing bagula haxuya moxonoa mana morung singina te.
14 “Nabu lipu tela xap riang morunoa, saing xap doa kimbo mati bungina moxonoa wa rangua te, bing lipua xap ba haxuya rianoa masup.
15 Ning nabu moxonoa wa rangua morunoa, bing lipua xap ba bagula haxuya te. Nabu rianoa gim moru oxatanoa na rianoa, sianga ba sanga mana mauxangang haxuyanganoa.
Hanaunaungadi Mana Lipudi Dirung Rangua Ding
16 “Nabu lipu tela xai haing nanuna (ina/gaxarea) kinu rangua lipu tela teguyu xaung dahau gabisia mana teguyu, saing kinu rangua, bing gim gotiga saing yau.
17 Nabu tibuna hauxana ba sina na, bing gim gotiga sanga mana haingdi dikinu rangua lipu tela teguyu.
18 “Haing gaxarea ditingu, bing aungdi mati.
19 “Lipu gaxarea dikinu rangua asax(u)a, bing aungdi mati.
20 “Lipu gaxarea dahanania na urana tela ina Toxoratamona te, bing ahanggalangiadi mati.
21 “Labu alibu doa mana lipu titi telamgu tai kimbo alibu mauxana manau tai, namua na muga awa lipu titi telamdi mana titia Isip.
22 “Labu alibu doa mana tapdi kimbo hagudiu tai.
23 Nabu alibu doa manadi, saing daxaba manga, bagula ngalungu xabangadinga baing.
24 Atigu salianoa bagula mesa, saing bagula ngaunggang waxang sabangia. Hainimdi bagula disok tapdi saing garaimdi bagula disok hagudi.
25 “Nabu uhauli lipuxigu tela wa haxugina liwe mang siangia, labu ulibu bila lipu siang xabinganamdi nau tai, saing labu oxop siang dalingam ranguau tai.
26 Nabu oxop riama imanging maxaxaya bila mogungua hau haruangua haxuyanganoa maung, bing uhaxuya muga mana xaidaba ri to.
27 Namua na ing imanging xabubungam ba ing ganina. Bungina kinu bagula xabubu mana baraxinta? Bungina xaba manga, bagula ngalungu, namua na ngausi lipudi bila ba.
28 “Labu aharungia Uranau tai. Labu asina guxam dianoa na yanamimdiu tai.
29 “Labu asoxauti axamang tela bungina asina hananiangadi nanga mana umangaimdi xaung wainimdiu tai.
“Bing ata matuauim (lupdi) rimagia.
30 Alibu taininau mana bulmakauimdi xaung sipsibimdi. Ayungadi ba duwauyu rangua baudingdi sanga mana xaidap 7. Ne asinadi nanga mana xaidap 8.
31 “Bing ahatanga ba axap mogungagua. Binabu labu axang asaxa mututunganoa asaxa abungindi dising sahau tai. Ating mala na komadi.