30
Kabukabu Bunuxuyang Saminam
1 “Utongtongia kabukabu hananiangam tela mana xaiya akasa bu utau bunuxuyang saminama (mana).
2 Rubing longgalo maxaxayading taininau—sentimita 45. Maxaxayanganoa bing sentimita 90. Salamindi duwa yoyoandi bing xai taininau rangua.
3 Uhip gol sigixingang sibuna mana, etuama xaung rubing longgalo xaung salamindi, saing utaga gol hataing maxaxaya taxiya mana rubinoa.
4 Utongtongia raxu gol luwa mana kabukabua hawa mana gol hataing maxaxaya. Luwa hataina, luwa hataina. Bagula dituxu xaiya haungamdi dahau kabukabua mana ba.
5 Utongtongia xaiyadi ba mana xaiya akasa saing uhip gol manadi.
6 Uta kabukabua ba imanga soxauti Bokis Hanaunaungama sabasabania, hataina mana bokisia xuanoa wa etua mana haruanga haungam siangindi, longga ba bagula ngagugunia ranguang.
7 “Buraraging taining tainina bungina Aron hamaringia nagungdi, bing tau bunuxuyuang saminama mana kabukabu hananiangam ba.
8 Tung bunuxuyang saminama muli bungina tung nagungdi bungbung sibuna, bu bunuxuyang saminama bagula tau Toxoratamona maxania bungingbunginalo mana bakbakdi dima kimu.
9 Labu uhanania bunuxuyang saminam bilingam tela kimbo hananianga taungam kimbo hananianga witam mana kabukabu hananiangamga liu tai. Xauna labu matu hananianga nungingam mari manau tai.
10 Niani taining tainina bing Aron tuxu oxatua libu kabukabu hananianmga li sigixingang sibuna. Libu bila li: Ta asaxa hananianga kubolu diang sisianganam sibing tela mana kabukabu hananiangamga li salamindi. Oxata li Aron xaung bakbagindi dituxu mana bakbak longgalo dimayu. Kabukabua li Toxoratamona inia, ngamogu sibuna nanga.”
Lipudi Digim Ding
11 Baing Toxoratamona harua na Moses ba,
12 “Bungina utiti Isreldi (titidinga), lipu taining tainina bing gim na Toxoratamona mana walinganoa. Bungina utiti(di) (di)gim. Nam mauxangang matiama xap lipuadi bungina utitidi.
13 Lipu taining tainina kisi mala rangua adi utitidi masup bing gim siang silba tela su mana siang maringina lipu hananiangamdi dimogu. Giminaga li hananiangua na Toxoratamona.
14 Adi longgalo dikisi mala, adi nianiding 20 saing haing, bing sina hananianga li na Toxoratamona.
15 Lipu xalaxalamdi labu didali siangga liu tai, saing lipu haxugindi labu ditatua siangga liu tai. Digim maxang taininau na Toxoratamona bu digim walingadingdi.
16 Oxop hananianga kubolu diang sisianganam giminagina ba rangua Isreldi saing oxatanoa bing gim xahi guguniangama oxatanoa. Baing bagula ngahatumiadi saing ngawasa manadi, nam dimati.”
Mina Damiangam
17 Baing Toxoratamona harua na Moses ba,
18 “Utongtongia mina tela (mana bras) xaung kabukabunoa mana bras, bu lipu hananiangamdi didamia rimadingdi kidingdi mana. Uta liwe mana xahi guguniangam xaung kabukabu hananiangama, saing uxu lang mana.
19 Aron gabu garandi bing didamia rimadingdi kidingdi xaung langga ba.
20 Bungingbungina diluxu xahi guguniangamia, bing didamia langia nam dimati. Xauna, bungina dima haxek mana kabukabu hananiangamia bu dituxu oxatadinga ba ditau hananianga angingam na Toxoratamona,
21 bagula didamia rimadingdi kidingdi nam dimati. Hanaunaunga li wa bungingbunginalo mana Aron xaung bakbagindi dima kimuya mana.”
Guxenga Sabaxayangam Mogu Axamandi Urana Iniadi
22 Baing Toxoratamona harua na Moses ba,
23 “Oxop axamang saminam xai sibunadi li: xaiya mer susuna mauxanganoa kilo 6, xai saminam sinamon sanggana mauxanganoa kilo tuwa, tabua saminam mauxanganoa kilo tuwa,
24 xaung xaiya kasia mauxanganoa kilo 6. Usu mana siang maringina lipu hananiangamdi dimogu bungina oxop mauxangadinga. Xauna oxop guxenga olip lita luwadi luwadi.
25 Baing ubala lipu saminga xaningxaninganam ba tongtongia guxenga saming xai sibunam. Bagula wa guxenga mogungaguam umatu mari mana axaman(a)di ngayuadi.
26 Baing utuxu oxatua mana bila li bu (u)mogu axadi bagudili nanga: umatu mari mana xahi guguniangama, Bokis Hanaunaungama,
27 kabukabu salangam xaung xalingindi, kabukabu nagungam xaung xalingindi, kabukabu hananianga bunuxuyang saminam,
28 kabukabu hananianga taungam xaung xalingindi, xaung mina xaung kabukabunoa.
29 Bagula umogudi bila ba bu duwa ngayua sibundi. Baing baraxingbaraxinta(di) dituxudi bagula ngayuadi xauna.
30 “Umatu guxenga mari mana Aron gabu garang lupdi bu mogudi ngayuadi bu sanga ba dituxu lipu hananianga oxatanoa nanga.
31 Baing uharua na Isreldi ba, ‘Alali guxenga mogungaguam, hatata saing ila mana bakbakkadi dima kimu mang.
32 Labu amatu mari mana lipu hananianga teguam tela sangganggu tai, saing labu axaningxaning guxenga tela maxang taininau bila liu tai. Ngayua, saing amaxania ba awasa mana bila ngayua.
33 Lipu gaxarea daxaningxaning guxenga saminam bila li saing ta mana lipu tela lipu hananianga teguam tela bing ahitixiyadi bu duwa rangua lipuxigudi te.’ ”
Bunuyuxang Saminam
34 Baing Toxoratamona harua na Moses ba, “Oxop axamang saminam xaiyadi li: xaiya storaks susuna, gomi gagabinoa xaung xai susuna galbanum, xaung xaiya boswelia susuna. Axadi li mauxangading taininau.
35 Baing ubala lipu saminga xaningxaninganam ba tongtongia bunuxuyang saminama. Uta mosak mana, bu sok sigixinga maxagia saing bagula xap mogungagua.
36 Tela bing ulili saing uta Bokis Hanaunaungam maxania maluxuʼm xahi guguniangama, longga bagula ngagugunia rangauang. Bunuxuyang saminamga li xap mogungagua sibuna. Amaxania ba awasa xai mana bila ba.
37 Labu atongtongia bunuxuyang saminam maxang taininau bila li manggu tai. Ngayua. Xap Toxoratamona mogunganoa baing.
38 Lipu gaxarea ditongtongia bunuxuyang saminam bila li bu yaha mana saminganoa bing ahitixiyadi bu duwa rangua lipuxigudi te.”