31
Besalel Xaung Oholiap
1 Toxoratamona harua na Moses ba,
2 “Bagu ngamogu Besalel. Uri garang luba xaung Hur garang ranggina. Bakbaginoa Yuda baing.
3 Ngalibu baxagi mana aningogua haringinganoa, mana xabianga maringina xaung hatuminga xai, mana xabianga xai xaung oxata xangxang xabianganoa.
4 Baing ina naga, sanga ba xap hatuminga masok bu tongtongia babu xaidi mana gol, silba xaung bras.
5 Sanga ba taxi siang giminak sabanggamdi saing tagadi xai, sanga ba waxata xai xaiya. Lipu bisamanam xai mana oxata xangxana!
6 Xauna, bagu ngamogu Oholiap ba waxata rangua. Ahisamak garang luba. Bakbaginoa Dan baing. Xauna, ngasina oxata xabiangang maringina na lipu oxatam longgalo, bu sanga ba ditongtongia axamang longgalo ngatibina naung manadi ba.
7 Axaman(a)di (ba) bing: xahi gugunianganama, bokis hanaunaungama xaung xuanoa, long kubolu diang sisianganama wa etua mana ba, xaung xahi xalinging teladi li:
8 kabukabu salangama xaung xalingindi, kabukabu nagunggam gol (sigixingang sibuna) xaung xalingindi, kabukabu bunuxuyang saminam,
9 kabukabu hananianga taungam xaung xalingindi, mina damiangam xaung kabukabunoa,
10 xaung imang gumangindi, imang maringindi mana Aron lipu hananiangama xaung imangdi mana garang lupkadi disau bungina dituxu lipu hananiangam oxatanoa,
11 xaung guxenga sabaxayangama mogu axamang ngayuadi, xaung bunuxuyang saminam mana Urana Yabang Maringina. Bing ditongtongiadi taxa mana haruangua ngatabina naung mana ba.”
Xaidap Yaguangam
12 Baing Toxoratamona harua na Moses ba,
13 “Uharua na Isreldi ba, ‘Amaxania ba asu maringina mana Xaidabigu Yaguangam hanaunaunganoa. Namua na wa mogungua liwe manga xaung mang sanga mana adi dima kimu mang, bu sanga ba axabia ba nga ba Toxoratamona, ngamoguang (awa) ngayuadi.
14 “Amaxania ba asu mana Xaidap Yaguangam hanaunaunganoa, namua na xaidapka ba ngayua. Lipu gaxarea ditatua bing aungdi mati. Lipu gaxarea duwaxata mana bing ahitixiyadi bu duwa ranguang lipuxindi te.
15 Xaidap 6 duwa sanga mana atuxu oxata manadi, ne xaidap 7 bing Xaidap Yaguangam, xaidapka Toxoratamona inia ba. Lipu gaxarea dituxu oxata tela mana Xaidap Yaguangam bing aungdi mati.
16 Binabu ang Isrel mana asu mana Xaidap Yaguangam hanaunaunganoa, atuxu mala sanga mana adi dima kimu mang. Hanaunaunga li wa bungingbunginalo.
17 Ina mogungua wa bungingbunginalo liwe manga xaung mang Isreldi, namua na laing xaidap 6 Toxoratamona tongtongia sabalunoa xaung titia, saing mana xaidap 7 yagua xaung xap haringinga.’ ”
18 Toxoratamona harua na Moses mana Bimbia Sanai laing sup, baing sina siang hanaunaungam luwa na, sianggadi Urana rimang uxunoa bung mana dingtang ba.