32
Bulmakau Tutubing Gol Babuna
1 Lipuadi dibagu daxabia ba Moses halisi ba goxoya mari muli mana bimbia, baing digugunia taxiya Aron saing daharua na ba, “Umesa utongtongia urana teladi ba dimuga mam. Ne lipua Moses ba, lipua xap kira mahaing sangua titia Isip ba, am gaxabia baraxinta sok mana te.”
2 Baing Aron haxuya nadi ba, “Ahasia raxu goldi duwa mana hainimdi garaimdi tangadingliandi, saing axapdi ma rangua nga.”
3 Binabu lipua longgalo dahasia raxuding goldi duwa tangadingliania saing daxapdi ma rangua Aron.
4 Xapdi rimadingia saing tongtongia babua waxangia, mautadi saing bung bulmakau tutubing gol. Baing daharua ba, “Ang Isrela mana, axadi li urana angiadi, daxapkang mahaing sangua titia Isip!”
5 Aron bagu bila ba, baing tongtongia kabukabu hananiangam bulmakau tutubing maxania, saing habingia ba, “Buragin to tatuxu taungua na Toxoratamona.”.
6 Binabu buraging buraraging sibuna lipuadi dimesa dahanania hananianga taungamdi saing daxap hananianga gamogamu taininamdi dima. Baing lipuadi dirung bu daxang dinung, saking dimesa bu dahali ranguading.
7 Baing Toxoratamona harua na Moses ba, “Uri mala! Namua na lipuximdi, adi oxop mahaing sangua titia Isip, ding dita ding daxanga diang sibunia.
8 Disauya sap daxangua ngatabinadi ba disu mana ba. Ditongtongia nading bulmakau tutubing gol saing disabu mana saing dahanania na saing daharua ba, “Ang Isrel mana, axadi li urana angiadi, daxapkang mahaing sangua titia Isip!”
9 Baing Toxoratamona harua na Moses ba, “Ngabagu lipuadi li. (Bagu) Toxodingdi daharing sibuna.
10 Binabu usauya nga, bu atigu salianoa sala haringina nadi xaung ngasahidi, bu sanga ba ngalibung ba uwa numanuma sabanga.”
11 Ning Moses tuba ba libu Toxoratamona Urana inia atina xaringa, binabu harua na ba, “O Toxoratamona, atim salianoa sala haringina mana lipuximdi baru? Adi oxop mahaing sangua titia Isip mana haringinga sabanga xaung rimam haringinoa?
12 Nabu ulibu bila ba nadi, bagula usina gananga na Isipdi ba daharua ba, ‘Hatum doa manadi, binabu xapdi masok, bu ungdi mana bimbidi xaung sahidi etua titia ubunia bila ba.’ Uxugia mala sangua atim salianoa saing uxugia hatumingama mana hanggalangiangua uharua ba bagula ulibu na lipuximdi.
13 Uhatumia muli lipuxim oxatamdi Ebraham, Aisak, Isrel tung, adi uhau haruangua ranguadi ung sibum yamia xaung uharua nadi ba, ‘Bagula ngalibu bakbagimdi disok xumang sibuna bila hatungdi duwa sabalunia, saing bagula ngasina titia longga li na bakbagim(di) bila ngahau haruangua ranguadi, saing bagula (du)wa dingia bungingbunginalo.’ ”
14 Baing ina naga, Toxoratamona xugia hatuminganoa mana hanggalangiagua harua ba bagula libu na lipuxindi.
15 Moses xugia mala saing ri (mala mana) bimbia, tuxu siang hanaunaungam luwadi rimania. Sianggadi ba buninga wa hataing luwa, ramramonia ubunia buninga wa manadi ba.
16 Sianggadi Urana tongtongiadi ba, saing buninga Urana inia, bung mana sianggadi ba.
17 Yosua lungu lipuadi bibingadinga bungina dasaki, baing harua na Moses ba, “Bibinga haungingam wa (maluxuʼm) tabalaxaya.”
18 Ne Moses haxuya ba,
“Bibinga haunginga dalingam te,
bibinga haungingam dalinga teguam te.
Tegu, bibinga wayangam ngalungu baing.”
19 Bungina sok ma haxek mana tabalaxaya saing bagu bulmakau tutubina xaung sigangua, ating salianoa sala haringina, saing ting siang luwadi mari sangua rimania, saing xunggatidi bimbi namuya.
20 Baing xap bulmakau tutubinoa ditongtongia ba saing tau yabia saing lili saing ting mari langia saing libu Isreldi (ba) dinung.
21 Baing harua na Aron ba, “Lipuadi li dilibu baru naung bu uxaidi ba dilibu kubolu diang sibuna na bila li?”
22 Aron haxuya ba, “Lipu sabanga, sanga ba atim disala manga te. Uxabiau, lipuadi li dahaxi mana kubolu diana.
23 Daharua nanga ba, ‘Utongtongia uranadi ba dimuga mam. Ne lipua Moses ba, lipu xap kira mahaing sangua titia Isip ba, am gaxabia baraxinta sok mana te.’
24 Binabu ngabaladi ba, ‘Lipu gaxarea yauyaungang gol, bing hasia.’ Baing disina goldi ba, saing ngating mari yabia, saing bulmakau tutubina li sok ma!”
25 Moses bagu ba lipuadi kuboluding hasiading (namua na Aron yungadi kuboluding hasiading, laing daxap memaya masup bixuading maxadingia).
26 Binabu li tabalaxaya xaluya saing harua ba, “Lipu gaxarea Toxoratamona iniadi, ama rangua to.” Baing Libaidi digugunia taxiya.
27 Baing harua nadi ba, “Toxoratamona, Urana mana Isreldi, harua bila li: Lipu taining tainina goxi waxang sabanga ulenia. Ala hataing hataina maluxuʼm tabalaxaya hataing longgalo, ang taining tainina ung sabangamdi kixingimdi riamdi xaung lipu numam rubinamdi.’ ”
28 Baing Libaidi dilibu Moses haruanganoa ba, saing xaidapka ba bila lipu 3,000 dimati.
29 Baing Moses harua ba, “Hatata amoguang Toxoratamona iniadi bu atuxu oxatanoa bungina aung lipu kuboluding dianamdi, heku ding garaim sibuimdi, sabangaim sibuimdi xaung kixingim sibuimdi. Baing ina naga, hatata bagula sina guxama nang.”
30 Buragina baing Moses harua na lipuadi ba, “Alibu kubolu diang sibuna. Ning hatata bagula ngahaing mala rangua Toxoratamona. Bola ngaxai hatuminganoa ba sisia kuboluim dianoa.”
31 Binabu Moses goxoya mala muli rangua Toxoratamona saing harua ba, “Laku, lipuadi li dilibu kubolu diang sibuna baru! Ditongtongia urana goldi nading.
32 Ning hatata, ngaxusungaung ba uyunga kuboluding dianoa. Ne nabu tegu, bing usisia yagua sangua xailongima ubung ba.”
33 Ne Toxoratamona haxuya na Moses ba, “Lipu gaxarea libu kubolu diana manga, bing bagula ngasisia yadingdi sangua xailongigua.
34 Ne ula to. Umuga mana lipuadi mala mana longga ngaharua mana ba. Bagu bagula ulegigua muga maung. Ning, bungina bunging salak sinaikkama ma, bagula ngasina salaga nadi mana kuboluding dianoa.”
35 Baing Toxoratamona sina businga sabanga ba xap lipuadi mana namua dilibu bila ba mana bulmakau tutubinoa Aron tongtongia ba.