33
1 Baing Toxoratamona harua na Moses ba, “Ula, uhaing mala sangua longga baguli, ugabu lipuadi oxop mahaing sangua titia Isip, saing uhaing mala mana titia ngahau haruangua rangua Ebraham, Aisak xaung Yekop ba, titia ngaharua mana ba, ‘Bagula ngasina na bakbagima.’
2 Bagula ngasoxi ulegiguam tela muga mang saing bagula ngasuka bakbakkadi li mala: Kenandi, Amordi, Hitdi, Peresdi, Hibdi xaung Yebusdi.
3 Ahaing mala mana titia baxagi mana su xaung dungungu langina. Ning bagula ngahaing mala ranguang te, namua na ang lipuadi toxoimdi daharing sibuna. Nam ngahanggalangiang daxangia.”
4 Lipuadi dilungu haruanga haringinadi ba laing sup, baing dusinga sibuna saing disauya kubolua diyauyau ding.
5 Namua na Toxoratamona harua na Moses ba, “Ubala Isreldi ba, ‘Ang lipuadi toxoimdi daharing sibuna. Nabu ngala ranguang mongaita ing ganina, bagula ngahanggalangiang. Binabu hata sibuna li ahasia yauyaungaimdi saing bagula ngahau hatumingagua mana baraxinta bagula ngalibu mang.’ ”
6 Binabu Isreldi dahasia yauyaungadingdi mana Bimbia Horep namuya.
Xahi Guguniangam
7 Tauna, Moses kubolunoa bing xap xahi tela saing rang tabalaxaya singia hasoya monga. Uxu ba xahi guguniangam. Baing lipu gaxarea sai Toxoratamona murunganoa bagula sok mala mana xahi guguniangama, wa tabalaxaya singia.
8 Baing bungingbungina Moses sok mala mana xahia, lipu longgalo dimesa dili (mua) mana xahiding xuandi, saing dibagu mana Moses laing luxu xahia.
9 Moses luxu laing sup, baing mugap maxaxaya bagula ri ma wa (mua) xuania, saing bagula Toxoratamona harua rangua Moses.
10 Bungingbungina lipuadi dibagu mugap maxaxaya li mua xahi xuania, bagula dimesa digung kiding tuxundi, taining tainina wa xahing xuania.
11 Bila balau Toxoratamona bagula harua rangua Moses, tang dibagu ramramodingdi, bila riang tela harua rangua rianoa. Sup, baing Moses bagula goxoya mala tabalaxaya, ne lipuxing haulingam Yosua, gananuna, Nun garanoa, ina sauya xahia te.
Moses Xaung Toxoratamona Ralanoa
12 Moses harua na Toxoratamona ba, “Bagu uharuaharua nanga ba, ‘Oxop lipuadi li mahaing,’ ne ung ba ubaxanga nanga ba gaxarea bagula usoxi rangua nga te. Ung ba uharua nanga ba, ‘Ngaxabiaung ngauxu yama, saing ngayaha maung ba.’
13 Nabu uyaha manga, bing utubatuba nga kubolumdi bu sanga ba ngaxabiaung bu ngalibung uyaha. Xauna, uhatumia muli ba numanuma li, duwa lipuximdi.”
14 Toxoratamona haxuya ba, “Bagula nga sibugu ngala ranguaung, saing bagula ngasina yaguangua naung.”
15 Baing Moses harua na ba, “Nabu ung sibum ula rangua nga te, bing labu uxaiam mahaing sangua longga liu tai.
16 Bagula bakbak teladi daxabia ba uyaha manga ngagabu lipuximdi baru? Ne nabu ula ranguam, alaba bagula hatanga ba ngagabudi am xan tela (sibuna) mana bakbak teladi duwa titia, maxuna?”
17 Baing Toxoratamona harua na Moses ba, “Bagula ngalibu taxa mana xusungungama baing, namua na ngayaha maung saing ngaxabiaung ngauxu yama.”
18 Baing Moses harua ba, “Ngaxusunga ba uhatanga ralama nanga.”
19 Baing Toxoratamona harua ba, “Bagula ngalibu xailingagu longgalo (ba) daliung maxamia, saing bagula ngauxu yagua Toxoratamona naung. Baing bagula ngausinga lipu gaxarea bagula ngausinga, saing bagula atigu mana lipu gaxarea atigu mana.
20 Ning labu ubagu ramramoguau tai. Namua na lipu gaxarea dibagu nga bagula dimati.”
21 Baing Toxoratamona harua ba, “Bagu long tela wa haxek manga sanga ba uli siangia la ba.
22 Bungina ralagua daliung, bagula ngataung ginanging tela xaung kaukaung rimagia laing ngadaliung.
23 Baing bagula ngaunia rimagua saing bagula ubagu ubugua. Ning ramramogua labu ubagu tai.”