34
Siang Haung Luwa
1 Baing Toxoratamona harua na Moses ba, “Utaxiti siang hataing luwa muli bila mugamugangamdi, saing bagula ngabung mana siang hatainadi ba haruangadi duwa mana mugamugangamdi, adi uxunggatidi.
2 Uxauxau buraragin to, saing buraragina uhaing ma mana Bimbia Sainai, saing uli maxagia la ba bimbia subinganoa.
3 Labu lipu tela haing ma ranguaunggu tai. Labu tela wa bimbia mongau tai. Morudi xauna, labu daxang bimbi namuyau tai.”
4 Binabu Moses taxiti siang hataing luwa bila mugamugangamdi. Baing mesa buraraging sibuna saing haing mala mana Bimbia Sainai, bila Toxoratamona tabina ba, saing xap siang hataing luwadi ba rimania mala.
5 Baing Toxoratamona ri ma mugabia saing li la ba rangua saing uxu yanoa ba, Toxoratamona.
6 Toxoratamona dali Moses maxania saing wagi ba,
“Toxoratamona, Toxoratamona,
Ina Urana kubolu usingangama xaung ati manama!
Atina sala sap te
saing baxagi mana kubolu murungang sibuna xung mari te
xaung baxagi mana kubolu maxunam(a).
7 Murungang sibuna xung mari te saing xap lipu 1,000 xumana.
Yunga kuboluadi didoa xaung kubolu dudungamdi xaung kubolu diandi.
Ning adi mauxanganamdi (bing) yunga salagidingdi te.
Baungtibundi salagidingdi dila daxap garadingdi xaung garading garadingdi
sanga mana bakbak tuwa xaung luwadi luwadi dima kimu manadi.”
8 Moses gung kidingdi mari sap turu mari titia saing sabu mana.
9 Baing harua ba, “O Lipu Sabanga, nabu hatata uyaha manga, bing ngaxusungaung ba ula ranguam. Maxuna lipuadi li toxodingdi daharing sibuna, ne ngaxusungaung ba uyunga kubolumamgadi didoa xaung kubolumam diandi, saing oxopkam ba am gawa ung sibum lipuximdi.”
10 Baing Toxoratamona harua ba, “Bagu hatata ngahau haruangua ranguaung. Lipuxim longgalo maxadingia, bagula ngalibu axamang haringinadi na bila lipu tela bagu mana numanuma tela waleu ma te. Lipu longgalo uwa liwe manadi ba bagula dibagu axamang xangxana bagula nga Toxoratamona ngalibudi maung saing dimaxuwa dihixi manadi.
11 Umaxania (ba usu) mana axadi ngatabinadi naung hatata. Bagula ngamuga maung ngasuka Amordi, Kenandi, Hitdi, Peresdi, Hibdi xaung Yebusdi (mala).
12 Umaxania, nam uhau haruanga rangua adi duwa mana titia ula mana ba. Nam sok bitinga tuxung.
13 Tegu. Bing uxui kabukabuding hananiangamdi mari xaung uxatiti siangiding mogungamdi xaung utaxiti babudingdi mana urana haing dingia Asera.
14 Labu usabu mana urana telau tai. Namua na Toxoratamona, yanoa Bagulinga, wa Urana bagulingangam.
15 “Umaxania, nam uhau haruanga rangua adi duwa mana titia ba. Nam bungina dahaxa mauli rangua ding bu diti urana dingiadi yadingdi xaung dahanania nadi, bagula duxusungaung ba ugabudi saing bagula oxong taungading hananiangamdi.
16 Baing bungina oxop nanuhainiding teladi ba disok garam lup hainidingdi, saing nanuhainidinggadi ba dahaxa mauli rangua urana dingiadi, bagula daxai garam lupdi ba dilibu taininau.
17 “Labu utongtongia babu mautangamdiu tai.
18 “Utuxu Taunga Mana Salanga Salalangang Teguama. Oxong salanga salalangang teguama sanga mana xaidap 7 bila ngatabinaung ba. Ulibu bila li mana sobaga ngamogu ba Abip, namua na mana sobakka Abip usok ma sangua Isip.
19 “Matuau longgalo ngayuadi. Morum matuau longgalo xauna ngayuadi. Heku bulmakau, sipsip kimbo meme, ding longgalo ngayuadi.
20 Sanga ba utuxu donki matuaunauyu, ne ugim muli sipsip tutubing hanananiangania to. Nabu ugim muli te, bing urambaxuti waxungtuanoa. ﴾Bing﴿ Ugim garam lup matuaua longgalo muli.
“Labu lipu tela ma rangua nga xola hananianganau tai.
21 “Laing xaidap 6 bagula uwaxata, ne mana xaidap 7 bing uyagua. Heku bunging xumangam kimbo xauyangam, bing uyagua.
22 “Utuxu Taunga Xauyangama xaung anginga mugamugangamdi axapdi bungina witdi dimoya. Xauna, utuxu Taunga Xauyanga Kimuama bungina umangamdi disup.
23 Bunging tuwa bing lubim longgalo dili Toxoratamona Urana maxania, Urana mana Isrel baing.
24 Bagula ngamuga mang ngasuka numanumadi mala xaung ngalibu titima tubu. Binabu lipu tela bagula xawa xap titima te bungina uhaing mala bunging tuwa niani taining tainina bu uli Toxoratamona Urana ungia maxania.
25 “Bungina uhanania asaxa tela nanga, labu usina sibina xaung anginga tela utongtongia xaung yisu tai. Xauna labu uyunga Taunga Dalingam angian tela wa laing buraraginau tai.
26 “Anginga xai sibundi oxop bungina uxauya mugamugangamdi bing oxop ma Toxoratamona Urana ungia numania.
“Labu ubori meme tutubina maluxuʼm baung suinau tai.”
27 Baing Toxoratamona harua na Moses ba, “Ubung haruangadi li mari, namua na mana haruangadi li ngahau haruangua ranguaung xaung Isreldi.”
28 Moses wa la ba rangua Toxoratamona xaidap 40 xaung yambong 40. Xang nung axamang tela te. Bung haruanga haungamdi mari mana siang hatainadi—Hanaunaunga 10.
Moses Ramramong Ralanoa
29 Bungina Moses ri ma Bimbia Sainai xaung siang hataing luwa haruanga haungam wa mana ba rimania, xabia ba ramramonoa sina te. Sina namua na harua rangua Urana.
30 Bungina Aron gabu Isrel longgalo dibagu Moses, bagu ramramonoa sina, saing dimaxuwa ba dima haxek rangua.
31 Ning Moses wagi manadi, binabu Aron gabu lipudi yanamidingdi digoxoya ma rangua, saing Moses harua ranguadi.
32 Kimuya Isrel longgalo dima haxek rangua, saing sina tabinanga longgalo Toxoratamona sina na ba mana Bimbia Sainai.
33 Moses harua ranguadi laing sup, baing yameng ramramonoa imangia.
34 Ning bungingbungina luxu mala Toxoratamona maxania ba harua rangua, unia imanga laing sok ma muli. Baing bungina sok ma muli saing bala Isreldi axadi Toxoratamona tabinadi ba,
35 dibagu ba ramramonoa sina. Baing ina naga, bagula Moses yameng ramramonoa imangia muli laing luxu mala bu harua rangua.