35
Xaidap Yaguangam Hanaunaungandi
1 Moses wagi Isrel longgalo ba dima digugunia saing harua nadi ba, “Axadi bagudili Toxoratamona tabinadi ba alibudi:
2 Xaidap 6 duwa sanga mana atuxu oxata manadi, ne xaidap 7 bing Xaidap Yaguangam mang, xaidapka Toxoratamona inia ba. Lipu gaxarea tuxu oxata tela mana bing aungdi mati.
3 Labu atung yap tela maluxuʼm numaim tela mana Xaidap Yaguangamau tai.”
Urana Xahing Xalingindi
4 Baing Moses harua na Isrel longgalo ba, “Axa baguli Toxoratamona tabina ba:
5 Liwe mang bing axap sinaga yahangamdi mana xalingimdi bu asina na Toxoratamona. Lipu gaxarea hatumingading dimesa ba disina, bing daxap axadi na bila li ma rangua: gol, silba, xaung bras,
6 yau mutuxu monga, sikokop xaung sabuxana, xaung imang meme buxanamdi,
7 sipsip moning sanggandi diburi saminga sabuxana manadi, xaung asaxa sanggang xai sibundi (dimagoxidi), xaiya akasa,
8 guxenga olip mana nagungdi, axamang saminamdi mana guxenga sabaxayanganamdi xaung mana bunuxuyang saminam,
9 xaung siang oniks xaung siang giminak sabanggam teladi mana atagadi mana lipu hananiangam imanging gamogamuam xaung imanging ringringinam.
10 “Lipuadi (gaxarea) ubuding bisamanam(di) liwe mang bing dima ditongtongia axamang longgalo Toxoratamona tabinadi ba:
11 xahinoa xaung mokindi, raxundi, barotindi, xaing sigingamdi, tuxandi xaung namuxidingdi,
12 bokis hanaunaungama xaung xaindi, xuanoa long kubolu diang sisianganama wa mana ba, xaung imanging soxautingama,
13 kabukabunoa xaung xaindi xaung xalingindi, xaung salanga wa maxagia bungingbunginalo,
14 kabukabu nagunggama saxaxangia xahi lunia, xaung xalingindi xaung nagungindi, xaung nagungdi guxengadinga,
15 kabukabu bunuxuyang saminam xaung xaindi, guxenga Toxoratamona mogunganama xaung bunuxuyang saminam, imanga kaukau xahi xuanoa,
16 kabukabu hananiangam xaung grate? bras, xaindi xaung xalinging longgalo, mina bras xaung kabukabunoa,
17 rubing gamgamingang imangindi xaung tuxandi xaung namuxidingdi, xaung xuang imanging soxautingama,
18 xahi bundigindi xaung rubing gamgamingang bundigindi, xaung waxudingdi,
19 imang gumangindi disau bungina dituxu oxatua Urana Yabang Maringinia, imang mogungaguamgadi Aron saudi, xaung imanggadi garang lupdi disaudi bungina dituxu lipu hananiangam oxatanoa.”
20 Baing Isrel longgalo diyunga Moses (maxanoa) dila.
21 Lipu gaxarea muruding, lipu gaxarea hatumingading dimesa, ding dima daxap yahangadingdi (di)ma disinadi na Toxoratamona mana xahi guguniangam tongtongianganoa, mana oxatanoa xaung mana imanging Toxoratamona mogunganamdi.
22 Adi muruding, haingdi xaung lupdi, dima daxap yauyaunga gol xangxanadi bila li dima: yauyaungadi ditaga imangidingia, tangalia raxundi, rima uxuna raxundi xaung rima raxundi. Ding longgalo disinadi na Toxoratamona, ditidi mahaing maxania bila hananianga rima itingamdi.
23 Lipu gaxarea yauding dimutuxu monga, sikokopdi kimbo sabuxading, kimbo imangiding xai sibundi, kimbo imangiding meme buxanamdi, sipsibiding moning sanggandi diburi saminga sabuxana manadi kimbo asaxading sanggang xai sibundi (dimagoxidi), ding daxapdi dima.
24 Lipu gaxarea dibo ba disina yahanga silba kimbo bras daxapdi ma disina na Toxoratamona, saing lipu gaxarea xaiding akasa sanga mana oxata hataing tela, ding daxap ma.
25 Haing gaxarea ubuding bisamanamdi daxalulia yau saing daxap baraxintadi daxaluliadi ma: yau mutuxu monga, sikokop kimbo sabuxana, kimbo imang xai sibundi.
26 Haing gaxarea muruding xaung ubuding bisamanamdi, ding ditongtongia yau meme buxanamdi.
27 Yanamdi daxap siang oniksidi xaung siang teladi bu ditagadi mana lipu hananiangam gamong imanginoa xaung ringringing imanginoa.
28 Xauna, daxap axamang saminamdi xaung guxenga olip ma mana nagungdi xaung mana guxenga Toxoratamona mogunganama xaung mana bunuxuyang saminam.
29 Isrel haing lup longgalo gaxarea muruding ba, ding daxap ma rangua Toxoratamona yahanggadi disu mana murungadinga sanga mana oxata longgalo Toxoratamona tabinadi Moses suxungunia ba dilibudi.
Besalel Xaung Oholiap
30 Baing Moses harua na Isreldi ba, “Bagu Toxoratamona mogu Besalel. Uxu yanoa. Uri garang luba xaung Hur garang ranggina. Bakbaginoa Yuda baing.
31 Ngalibu baxagi mana Urana Aningonoa xaung xabianga maringina, hatuminga xai, xabianga xai xaung oxata xabiangang xai sibuna.
32 Sanga ba xap hatuminga masok bu tongtongia babu xaidi mana gol, silba xaung bras.
33 Sanga ba taxi siang giminak sabanggamdi saing tagadi xai, sanga ba waxata xai xaiya. Lipu bisamanam xai mana oxata xangxana.
34 Xauna, Toxoratamona sina xabianga xai na Oholiap tang ba tang ditubatuba lipu teladi. Oholiap Ahisamak garang luba. Bakbaginoa Dan baing.
35 Libudi dibaxagi mana oxata xabianganoa ba dilibu oxata xangxana bila li: lipu siang buninganamdi, lipudi hatumingadingdi daxap babudi masok, lipudi ditongtongia imang xaidi, diraga imangdi mana yau mutuxu monga, sikokop xaung sabuxana, ding longgalo xabiangading mana oxata xai sibung xangxana.