36
1 Besalel, Oholiap xaung lipu longgalo xabiangading oxatam, adi Toxoratamona sina hatumingua xaung xabiangua nadi bu dituxu xai sibuna oxata longgalo mana ditongtongia xahia, ding ba bing dilibu oxatua bila Toxoratamona tabina ba.”
2 Baing Moses wagi Besalel Oholiab tang digabu lipu longgalo Toxoratamona sina xabiangua nadi ba dima dituxu oxatua, adi muruding ba dima.
3 Moses sina nadi yahanga longgalo Isreldi daxapdi ma mana xahi tongtongianganoa bu dituxu oxatua manadi. Daxapxap yahangadi muruding ba disinadi ba ma buraraging taining tainina.
4 Binabu lipu oxata xabianganamgadi dituxu oxata xangxana mana xahia ba diyunga oxatadinga
5 saing daharua na Moses ba, “Lipuadi daxapxap xalaxala xumana buk dima, saing sanga sibuna mana oxatua Toxoratamona tabina ba!”
6 Baing ina naga, Moses sina tabinangua mala rangua lipuadi duwa tabalaxaya ba, “Labu ang haing lup axauxau yahanga teladi muli ma mana xahi tongtongianganoau tai.” Binabu dibili lipuadi ba daxap xalaxaladi muli dima,
7 namua na xalaxaladi digugunia masup ba sanga sibuna mana oxatua.
Urana Xahinoa
8 Adi longgalo xabiangading xai sibuna mana oxatua liwe mana lipu oxatamdi ditongtongia xahia mana imang xai sibung 10. Diyauyaudi xaung yau mutuxu monga, sikokop xaung sabuxana, xaung diraga kerubim babundi manadi xai sibuna.
9 Imang longgalo sabangading taininau. Maxaxayading mita 12 xaung tubungading mita luwa.
10 Disigi imang luwadi luwadi hiliadinga, saing dilibu taininau mana imang luwadi luwadi hiliadinga teladi.
11 Baing ditongtongia rima raxuamdi mana imanga mutuxu monga mana imang siginga kimuam rubinoa. Bila balau ditongtongia rima raxuamdi mana imang siginga kimuam tela rubinoa.
12 Ditongtongia rima raxuam 50 mana imang siginga rubing tela xaung 50 mana imang tela rubinoa.
13 Ditongtongia raxu gol 50 saing disigi imangdi bu xahia urungina.
14 Ditongtongia imang 11 mana meme buxana bu dikaukau xahia.
15 Imang 11 bagudili sabangading taininau. Maxaxayading mita 13 xaung tubungading mita luwa.
16 Diraga imang luwadi luwadi hiliadinga disigi bu disok taininau, xaung imang 6 teladi bu disok taininau.
17 Baing ditongtongia rima raxuam 50 mana imang siginga kimuam rubinoa. Bila balau ditongtongia rima raxuam 50 mana imang siginga kimuam tela rubinoa.
18 Ditongtongia raxu bras 50 bu disigi imangdi bu xahia sok bila imang taininau.
19 Baing ditongtongia moki luwa muli bu dikaukau xahia. Tela bing sipsip monindi sanggadingdi disamidi sabuxana. Tela etua mana alaba asaxa sanggang xai sibundi (dimagoxidi).
20 Ditongtongia xahi barotindi mana xaiya akasa.
21 Ramang hataing taining tainina maxaxayanganoa mita luwadi luwadi xaung tubunganoa sentimita 66.
22 Taining tainina muxumuxung luwa wa hawa mana rubing rubinoa, bu dirang ramangdi disigidi. Ditongtongia xahi ramang hataing taining tainina bila balau.
23 Ditongtongia ramang tuandi mana xahia: ramang tuang 20 mana rubing bukang,
24 xaung ditongtongia namu silba 40 dila hawa mana ramang tuandi, namu luwa hawa mana ramang tuang taining tainina sanga mana muxumuxung luwa, saing namu luwa hawa mana ramang tuang tela sanga mana muxumuxung luwa.
25 Bila balau ditongtongia ramang tuang 20 mana hataing tela, rubing kanggua,
26 xaung namuxiding silba 40, namu luwa hawa mana ramang tuang tela, namu luwa hawa mana ramang tuang tela.
27 Ditongtongia ramang tuang 6 mana ubunoa, rubing yuwaxa,
28 xaung ditongtongia ramang tuang luwa mana yoyoandi ubunia.
29 Mana yoyoang luwadi li disigi hawa haing mala etua mana rimang raxuamdi. Dingtang duwa bila ba.
30 Binabu ramang tuang 8 xaung namu silba 16 duwa, luwa hawa mana ramang tuang taining tainina.
31 Xauna, ditongtongia xai sigingamdi mana xaiya akasa: Luwadi luwadi hiliadinga mana xahi ramang tuandi duwa mana rubing tela,
32 luwadi luwadi hiliadinga mana rubing tela, xaung luwadi luwadi hiliadinga mana ramang tuandi duwa sangga yuwaxa, mana xahi ubunia.
33 Ditongtongia xai sigingam liama ila ramang subinganoa mala mana subinganoa lia mana ramang tuandi.
34 Dihip gol mana ramang tuandi xaung ditongtongia rima raxuamdi bu disimbaxang xai sigingamdi maluxu manadi. Xauna, dihip gol mana xai sigingamdi.
35 Ditongtongia imang soxautingama mana imang xai sibuna diraga mana yau mugixingamdi: mutuxu monga, sikokop xaung sabuxana. Lipu ubung bisamanam tela raga xai sibuna keribumdi babudingdi mana.
36 Dingelia xaung gauyak goldi mana tuxa luwadi luwadi ditongtongiadi mana xaiya akasa xaung dihipdi mana gol xaung dirangdi mali mana namu silba luwadi luwadi.
37 Mana xahi xuanoa ditongtongia imanga mana imang xai sibuna diraga mana yau mugixingamdi: mutuxu monga, sikokop xaung sabuxana. Lipu ragangam raga.
38 Ditongtongia tuxa luwadi luwadi hiliadinga xaung gauyagindi. Dihip tuxa toxondi mana gol, xaung raxudingdi gol xauna. Ne namuxiding luwadi luwadi hiliadinga duwa bras.