10
Hahelaḡa karadia
Varavaragu e, na uramu ba diba, seneda iboudiai na ori henunai e nohova, bena unu amo ma iboudiai davara lalona amo e raka raka hanai. Iboudiai Mose enai bapatiso e abia, ori bona davara amo. Iboudiai danu lauma anianina tamona e aniava, bona iboudiai lauma ranuna tamona e inuava; badina be e ḡavadia nadina ranuna tamona e inua loulouva, nadina be Keriso. To Dirava ese idia hutuma bada se lalo namo henidia dainai, tano ḡaḡaena ai eha mase.
Unu ḡau na toa, ita eda; kara dikadia basita ura heni, idia ese e ura heni na heto. Kaivakuku danu basio toma henidia diho, idia haida heḡereḡeredia; Buka Helaḡa ai e torea heḡereḡerena eto, Taunimanima na e ege diho, e aniani, e inuinu; bena e tore isi, e mavaru. Ita na basita lebulebu, idia haida e lebulebu na heto, bena dina tamona ai gerebu-rua daha-toi vada e mase. Lohiabada danu basita dibagania, idia haida ese e dibaḡania na heto, bena gaigai ese e koridia mamase. 10 Bona basio maumau, idia haida e maumau na heto, bena ala-ala aneruna ese e aladia mamase.
11 Unu ḡau be idia ediai e vara, toa ai baela totona; sivaraidia danu vada e tore henida, ina tanobada dokona tauda isisibalai-henida. 12 Taunabunai, lalona e tomamu e gini tutuka-tutukamu tauna ese nahuana baine tohoa, baine keto na garina. 13 Vada e butumui laomu hedibaganidia na taunimanima iboudiai ese e haheaukalai hedibaḡanidia heḡereḡeredia. Bona Dirava na momokani; ia ese baine narimui, emui goada e hereaiamu hedibaḡanina ta ese baine butumui tao na garina; hedihaḡani negana ai ia ese emui roho mauri dalana baine henimui, bena ba haheaukalaqia diba.
14 Taunabunai, egu lalokau e, kaivakuku itomadiho-henidia na ba heautani. 15 Lalo-parara taumui na hereva henimuimu; egu hereva ba haeroa. 16 Hahenamo keherena ta hanamoamu na hetura, Keriso rarana ai, ani? Ataga ta bakiamu na hetura, Keriso tau-anina ai, ani? 17 Badina be ataga be tamona, ita danu ena be hutuma to tau-ani tamona, taunabunai ita iboudai ataga tamona ta ania heboumu.
18 Israel ena kara ba itaia: boubou vamudia e animu taudia na boubou patana ai asie heturamu a? 19 Bena dahaka bainato? Kaivakuku ihaboulaina ḡauna na mai anina a? Bona kaivakuku danu mai anina a? 20 Lasi. Bese idau-idau ese e hahelaḡa ḡaudia na e aladiamu lauma dikadia ihaboulaidia, dia Dirava ena ihaboulaina. Asina uramu lauma dikadia ida ba hetura. 21 Lohiabada ena kehere bona lauma dikadia edia kehere ruaosi basio inu diba; Lohiabada ena pata anianina bona lauma dikadia edia pata anianidia ruaosi hasio ani diba. 22 Lohiabada ena vaḡege baita havaraia, a? Be, eda goada ese iena e hereaiamu a?
23 Ḡau iboudiai na asi taravatudia ita edai; to basitato ḡau iboudiai na nanamo. Ḡau iboudiai na asi taravatudia ita edai; to dia ḡau iboudiai ese basie hagoadada. 24 Ta sibona ena namo basine tahua, a dekena tauna ena namo danu baine tahua. 25 Hoihoi gabuna ai e hoimu vamudia iboudiai na bavani, basio henanadailai, lalomui bae hekwakwanai na garina. 26 Badina be tanobada mai anidia iboudiai ida Lohiabada ena. 27 Murimuri tauna ese baine boirimui, bena ba ura baola, vada baola, vairamui ai bae dabara ḡaudia iboudiai bavani, basio henanadailai, lalomui bae hekwakwanai na garina. 28 A tau ta ese baine hamaoromui, baineto “Inana na boubou vamuna”, basio ania, ia dainai bona lalo-hekwakwanai garina; 29 dia oi lalomu asina gwauraiamu, to ia lalona.
Be! Dahaka dainai lauegu ura-kwalimu na idau tauna lalona ese baine laoa ahu? 30 Dirava bama hanamoa, bena bama aniani. Dahaka dainai mai ihanamona ida na ania ḡauna dainai baine gwau henigu? 31 Benaini, bavaniani eiava ba inuinu eiava dahaka dahaka ba kara, ḡau iboudiai ba kara Dirava iheatolaina ai. 32 Iuda taudia bona Helene taudia, bona Dirava ena ekalesia taudia danu, basio hahekwakwanaidia; 33 lau heḡereḡeregu, taunimanima iboudiai ḡau idoidiai na hamoalelaidia tohomu, sibogu egu namo asina tahuamu, a taunimanima loḡora edia namo na tahuamu, ihamauridia helaoreana.