1 Lau ba haḡoigu, lau ese Keriso na haḡoiamu heḡereḡerena.

2 Lau na hanamomuimu badina be ḡau iboudiai o lalolaigu, hahediba herevadia na abi bena na henimui ḡaudia o badinamu. 3 To na uramu ba diba, tatau iboudiai kwaradia na Keriso; hahine kwarana na tau; Keriso kwarana be Dirava. 4 Tau e ḡuriḡurimu eiava e perovetamu negadia ai kwarana e kumiamu, una na kwarana e hadikaiamu. 5 A hahine e guriḡurimu eiava e perovetamu negadia ai kwarana se kumiamu, ia danu kwarana e hadikaiamu; ia na kwarana e nauamu hahinena heḡereḡerena. 6 Badina be hahine ta ese kwarana basine kumia, ia huina do bae utua; a huina iutuna eiava kwarana inauna bema mai hemaraina, hahine ese kwarana bema kumia. 7 A tau ese kwarana baine mukoa na dia namo, badina be ia na Dirava ihaḡoina tauna bona Dirava hairaina. A hahine be tau hairaina. 8 Badina be tau na hahine ena amo se vara, a hahine hari, tau ena amo e vara; 9 bona tau na se karaia hahine ena, a hahine hari e karaia tau ena. 10 Una dainai hahine ena siahu toana kwarana ai baine mia, aneru daidiai. 11 Ḡau tamona, hahine na dia sibona, a tau ida, bona tau na dia sibona, a hahine ida, Lohiabada lalonai. 12 Badina be hahine na tau dainai vada e vara, a tau be hahine ena amo e varamu. A ḡau iboudiai na Dirava dainai e varamu.

13 Sibomui ba haeroa. Hahine be kwarana asi ikumilaina Dirava baine ḡuria namo eiava? 14 Lalomui asie pararamu a, tau huina baine lata na hemarai ḡauna ienai, 15 a hahine huina baine lata na hairai ḡauna ienai? Badina be huina latana amo kwarana baine kumia. 16 A ta ese ina hereva baine gwaua tubu, egu haere binai: ai na kara idauna ta asi dibamai, bona Dirava ena ekalesia oreadia danu asi dibadia.

17 Egu hahedua binai na henimuimu, asina hanamomuimu; badina be emui hebou amo namo ta se varamu, a dika mo e varamu. 18 Hereva gini-gunana binai: lau na name kamonai emui ekalesia heboudia lalodiai heiri-heiri e varamu bogaragimui ai. Una sivarai kahana na abia daemu. 19 Badina be lalo-hadai idau-idau bogaragimui ai bae vara; bena mai edia lalo-hadai namodia taudia emui at bae hedinarai.

20 Emui hebou negadia ai, Lohiabada ena anibou asio ania momokanimu. 21 Badina be tau ana tau ana o animu, una dainai haida e hitolomu, ma haida e kekeromu. 22 Be! Asi emui ruma a? Unuseni ai boma aniani bona boma inuinu. Dirava ena ekalesia i'ihi-ihiraina bona ogoḡami taudia ihahemaraidia o uramu a? Ede baina hereva henimui toma a? Baina hanamomui a? Lasi vaitani.

23 Badina be Lohiabada ena amo na abia bena umui na hamaorolaimui dalana binai: taona e torea hanuaboina ai, Lohiabada Iesu ese naoa atagana ta e abia; 24 e hanamoa, bena e bitua, eto “Lau taugu binai, umui daimui ai baine makohi; ini ba kara toma, lau ba lalogu”. 25 Unuhetomana danu, e aniani vaitani murinai ia ese kehere e abia, bena ma eto “Ina kehere na herohemaino matamatana, lau raragu ai; ba inua negadia ai ini ba kara toma, lau ba lalogu”. 26 Taunabunai, ina flaoa atagana bavania bona ina kehere ba inua negadia iboudiai na umui ese Lohiabada ena mase ba hahedinaraia, ela bona ia do bainema.

27 Benaini, tau ta ese ina flaoa atagana baine ania bona ina kehere baine inua kerere, ia ese Lohiabada tau-anina bona rarana baine hadika. 28 Tau ta lalona baine tahua guna; bena ataga baine ania bona kehere baine inua. 29 Badina be e ania kavamu bona e inua kavamu, se laloamu una na Lohiabada tau-anina, tauna ese ia sibona ihahemaoro-henina e aniamu bona e inuamu. 30 Badina bunai hutuma umui bogaragimui ai e manoka-manokamu bona e gorerediamu, haida danu e masemu. 31 A ita siboda laloda baitama tahu, hahemaoro na edai basinema kau. 32 Ḡau tamona Lohiabada ese e hahemaoro henidamu, matada ihakanidia, ita bona tanobada baita dika bou na garina.

33 Taunabunai, varavaragu e, anibou dainai ba hebou negadia ai, ba henari heheni. 34 Ta ben-a hitolo, ia na ena ruma ai bema aniani, hahemaoro ai ba dika bou na garina. Hereva oredia do bae mia ela bona baina vasi, bena baina hamaoromaoro.