1 Varavaragu e, lau na uramu lauma ena herahia ba diba. 2 Badina be umui dibamui, dibura ai o nohova negana ai, e hakaumui negadia iboudiai kaivakuku, asie herevamu diravadia, ediai e hakaumui oho. 3 Badina bunai na hadibamuimu, Dirava Laumana ai e herevamu tauna ese Iesu basine uduguiraia diba; bona tau ta basineto “Iesu na Lohiabada”, Lauma Helaḡa ai e herevamu tauna mo sibona.

4 Herahia be idau-idau, a Lauma be tamona. 5 Hesiai daladia na idau-idau, a Lohiabada be tamona. 6 Ḡaukara danu idau-idau, a Dirava be tamona; ia ese ḡau idoidiai taunimanima iboudiai lalodiai e karamu. 7 A Lauma ese taunimanuma vada e hahedinarai henidia hagau-hagau, namo ihavarana totona. 8 Badina be Lauma tamona ena amo, ta aonega igwauraina e heniamu, ma ta lalo-parara igwauraina e heniamu, 9 ma ta abidadama e heniamu, ma ta gorere ihanamolaidia siahuna e heniamu, 10 ma ta hoa karadia ikaralaidia siahuna e heniamu, ma ta peroveta siahuna e heniamu, ma ta lauma idibadia e heniamu, ma ta gado idaudia e heniamu, ma ta gado anidia ihahedinaraidia e heniamu. 11 Unu ḡau iboudiai Lauma tamona ese taunimanima e henidia hagau-hagaumu, ena ura heḡereḡerena.

12 Badina be tau-anina be tamona, to reḡena na momo; bona rege, ena be momo, to iboudiai tau-anina tamona reḡena. Keriso danu unuheto. 13 Badina be ita iboudai Lauma tamona lalonai e bapatisoda, tau-anina tamona ai e halaoda, Iuda tauda eiava Helene tauda, hesiai tauda eiava urakwalimu tauda; ita iboudai danu Lauma tamona e ha-inulaida. 14 Badina be tau-anina na dia reḡe tamona, a reḡe diaḡau.

15 Ae-palapala bema toma “Lau na dia ima-palapala dainai lau na dia tau-anina ena”; una dainai ia na dia tau-anina ena a? 16 Bona taia bema toma “Lau na dia mata dainai lau na dia tau-anina ena”; una dainai ia na dia tau-anina ena a? 17 Tauanina idoinai bema mata mo, kamonai vada edena? Eiava idoinai bema kamonai mo, bonabona vada edena? 18 A Dirava ese reḡe ta ta tau-anina lalonai vada e ato, ena ura heḡereḡerena. 19 Iboudiai bema reḡe tamona, tau-anina be vada edena? 20 A reḡe be idau-idau; tau-anina na tamona. 21 Benaini, mata ese ima-palapala na basine hereva henia, basineto “Asi emu ḡaukara egu ai”, kwara danu aepalapaladia basine hereva henidia, basineto “Asi emui ḡaukara egu ai”, 22 Lasi; manoka-manoka ta gwauraimu reḡedia na mai edia ḡaukara badahereadia; 23 bona imatauraidia mamaraḡi ta tomamu reḡedia na ta matauraidia badamu; bona asi hairaidia reḡedia ta hanamo badamu; 24 a tau-anida reḡedia mai hairaidia na ḡau ta ai asie dabumu. Dirava ese reḡe iboudiai vada eme habou, tau-anina tamona ai baela; e dabu reḡena danu hemataurai bada vada eme henia, 25 tau-anina ai reḡe iboudiai bae hedaro boubou bona bae henari heheni helaoreana. 26 Bena reḡe ta baine hisihisi, reḡe iboudiai na ia ida bae hisihisi hebou; eiava reḡe ta bae hanamoa, reḡe iboudiai na ia ida bae moale hebou.

27 Benaini, umui na Keriso tau-anina; umui ta ta be ia reḡena. 28 Dirava ese haida ekalesia lalonai vada e atodia: gini-gunadia be aposetolo; iharuadia be peroveta taudia; ihatoidia be hahediba taudia; idia muridiai hoa karadia ikaradia taudia; ma idia muridiai gorere ihamauridia mai dibadia taudia bona hekaha taudia bona hahekau taudia bona gado idau-idau taudia. 29 Iboudiai be aposetolo a? Iboudiai na peroveta taudia a? Iboudiai na hahediba taudia a? Iboudiai na hoa karadia e karamu a? 30 Iboudiai na gorere ihamauridia mai dibadia a? Iboudiai na gado idaudia ai e herevamu a? Iboudiai na gado anidia e hahedinaraimu a? 31 Herahia hereadia ba hekisehekise heni. A dala herea-daena be harihari aina hahedinarai henimui.