13
Maduna metauna Babulono latanai
1 Maduna metauna Babulono latanai, Isaia Amoso ese e itaia ḡauna.
2 Ororo gagaena ai toa ta ba duduia isi,
ba boi lolo henidia;
ba kalodia, bae raka vareai,
lohia edia ikoukou lalodiai.
3 Lau sibogu ese egu helaḡa taudia vada na haḡanidia,
bona egu goada taudia, egu heaḡi herea taudia, vada na boiridia,
egu badu karadia bae kara totona.
4 A hakala, heloḡo-heloḡo na ororo ai,
hutuma bada reḡedia na heheto.
A hakala, basileia idau-idau e heloḡo ahu-ahumu,
e heboumu besedia na e heloḡo-heloḡomu.
Iehova Sabaota ese tuari oreana ta e habouamu;
5 tano daudau amo e maimu,
bona guba dokona amo,
Iehova bona ena badu ḡaudia,
tanobada idoinai ihabua-tarina totona.
6 A tai lolololo, badina be Iehova ena dina eme kahikahi;
ia na do baine kau, Siahu-idoinai Diravana ena hahebua-tari dinana ai bainela.
7 Taunabunai, ima iboudiai bae manoka-manoka;
taunimanima iboudiai kudoudia bae hetaha,
8 bona gari ese baine butudia tao.
Hisihisi ese baine gugubadia, hisihisi badadia;
idia na hisi bae ani, hahine ena hekamonai hisina na heto.
Bae heita heheni mai gari badadia ida;
vairadia bae kakakaka, lahi na heto.
9 A itaia, Iehova ena dina e maimu,
mai dagedagena bona mai baduna ida,
mai badu ḡaraḡarana ida;
tanobada na baine havahua,
bona kara dika taudia na ia latana amo baine habuadia tari.
10 Badina be guba hisiudia edia orea lalodiai na basie diari;
daba ai dina na baine dibura,
bona hua basine rara.
11 Tanobada na ena dika davana baina henia,
kara dika taudia na edia kara havara davadia baina heni;
heaḡi taudia edia hekokoroku baina hadokoa,
bona asi edia hebogahisi taudia edia heaḡi baina hamaraḡia.
12 Taunimanima baina hagadoidia:
idia na bae gadoi, gold namo-hereana baine momo;
idia na bae gadoi, Ofiri gold-na baine momo.
13 Taunabunai, guba baina haheude-heudea;
bona Iehova Sabaota ena badu ese
tanobada na ena gabu amo baine bibia oho,
ena badu baine ḡaraḡara dinana ai.
14 E labanaiamu diana na heto,
eiava mamoe asi ireḡudia na heheto,
taunimanima ta ta ese ena bese taudia ena bese taudia bae haḡeredia,
bona taunimanima ta ta na ena tano korikori ena tano korikori bae lou lao.
15 Bae davaria tauna na bae gwadaia uru,
bona bae dabaia tao tauna na dare amo bae alaia mase;
16 natudia karukarudia na vairadiai bae huaridia,
edia ruma kohudia bae dadidia,
bona adavadia bae hadikadia.
17 A itaia, lau ese Mede taudia lalodia baina hasiahudia, bae hadikadia totona;
idia na silver asie laloamu, bona gold asie moalelaiamu.
18 Edia peva ese eregabe taudia bae aladia mase;
hahine bogadia anidia na basie hamauridia;
matadia ese memero bona kekeni na basie bogadia hisi.
19 Babulono danu, basileia herea-daena,
Kaldea taudia edia hairai bona edia heaḡi ḡauna,
na Sodoma bona Gomora heḡereḡeredia ai bainela,
Dirava ese e habuadia tari negana ai.
20 Haida ese basie noho henia,
bona basie noholaia ela bona uru iboudiai;
Arabia tauna ta unuseni ai basine taruha,
bona mamoe ireḡudia taudia haida ese edia seri basie hahekuredi: unuseni ai.
21 A uda boromadia na unuseni ai bae hekure,
rumadia na e ḡoumu ḡaudia ai bae honu;
unuseni ai kokokoko bae noho,
bona huika-huika ḡaudia na unuseni ai bae mavaru.
22 Tano ḡaḡaena sisiadia na kohorodia ai bae turo,
bona uda sisiadia danu lohia rumadia lalodiai;
ena nega vada eme kahikahi,
bona ena dina na basie hoho.