37
Iuda ihamaurina
King Hesekia ese hereva e kamonai, bena ena dabua e dare, puse dabuadia e hahedokilai; bena Iehova ena dubu ai e raka vareai. Bena ia ese Eliakim, ena ruma ireḡuna tauna, bona Sebna, toretore tauna, bona hahelaḡa taudia badadia, na e siaidia, puse dabuadia bae doki, bena peroveta tauna Isaia Amoso dekena baela. Idia ese e hamaoroa, eto, Hesekia na ini e gwau tomamu: Hari dina na lalo-hisihisi bona gwau-gwaubona hemarai dinana; memero edia vara negana vada e kau, to ihavaradia ai goada na vada lasi. Reana Iehova, emu Dirava, ese Rabsake, biaguna Asuria pavapavana ese e siaia Mauri Diravana baine ḡonaḡonalaia tauna, ena hereva iboudiai vada e kamonai. Reana Iehova, emu Dirava, ese e kamonai herevadia baine gwaudia tubu. Taunabunai, taunimanima kwabu-kwabudia doini e nohomu daidiai ba ḡuriḡuri.
King Hesekia ena hesiai taudia na Isaia dekenai e kau negana ai, Isaia ese e hereva henidia, eto, Baigumui ba hamaoroa, baoto “Iehova na ini e gwau tomamu: Basio gari, o kamonai herevadia, Asuria pavapavana ena hesiai taudia ese lau e ḡonaḡonalaigu herevadia, daidiai. A itaia, lau ese lauma ta ia lalonai baina atoa, bena sivarai lahulahuna ta baine kamonai, bena ena tano korikori baine lou lao. Bena ena tano korikori ai lau ese ena mase dalana na dare amo baina havaraia”.
Bena Rabsake e lou ela, Asuria pavapavana e davaria, ia ese Libna e tuari heniava; badina be vada e kamonai hanua pavapavana na Lakisi amo vada e raka oho. Bena hanua pavapavana ese Tirihaka, Etiopia pava pavana, harina e kamonai, haida eto “Ia na vada e tore isi, oi ituari-henimu e maimu”. Una hereva e kamonai negana ai, ia ese gwaukau taudia haida na Hesekia dekena e siaidia, eto, 10 Hesekia, Iuda pavapavana, ini ba hamaoroa toma, baoto: Emu Dirava, o abidadama heniamu Diravana, ese Ierusalem na Asuria pavapavana imana ai basine atoa gwauhamatana amo basine koilaimu. 11 Vada o kamonai Asuria pavapavana ede vada e kara toma; tano iboudiai vada e habuadia tari vaitani. Bena umui na ba roho mauri a? 12 Bese idau-idau, senegu ese e habuadia tari besedia, Gosan, Haran, Resef, bona Eden taudia Tel-asara ai e nohova, na edia dirava ese vada e hamauridia a?
13 Hamat bona Arapada bona Sefaravaimi hanuana bona Hena bona Iva pavapavadia be edeseni ai?
14 Hesekia ese revareva na gwaukau taudia imadia amo e abia, bena e duahia. Bena Hesekia na Iehova ena dubu ai e dae kau, bena revareva e kehoa Iehova vairanai. 15 Bena Hesekia ese Iehova e ḡuria, eto, 16 Iehova Sabaota e, Israel Diravana, oi na kerubi daediai o helaimu; oi mo sibomu tanobada basileiadia iboudiai edia Dirava; oi ese guba bona tanobada vada o karadia. 17 Iehova e, taiamu a hakala, bona ba kamonai. Iehova e, matamu a hapapa, ba roharoha. Senakerib ena hereva iboudiai, Mauri Diravana iḡonaḡonalaina totona e siaidia herevadia, na ba kamonai. 18 Momokani, Iehova e, Asuria pavapavadia ese bese idau-idau iboudiai mai ediatano ida vada e habuadia tari, 19 bona edia dirava na lahi ai vada e tahodia kau; badina be idia na dia dirava korikoridia, a taunimanima imadia ese e kara ḡaudia, au bona nadi; una dainai vada e habuadia tari. 20 Taunabunai, Iehova emai Dirava e, ia imana amo ba hamaurimai, bena tanobada basileiadia iboudiai na bae diba, Iehova e, oi mo sibomu Dirava.
21 Bena Isaia Amoso ese gwau-kau na Hesekia dekena e siaia lao, eto, Iehova, Israel Diravana, na ini e gwau tomamu: Badina be vada o ḡurigu, Senakerib, Asuria pavapavana, herevadia vada o gwaurai, dainai, 22 Iehova ese ini vada e herevalaia toma:
Siona natuna hane-ulato rami-hebouna ese
e dadaraimumu bona e ḡonaḡonalaimumu;
Ierusalem natuna hahinena ese
oi murimu ai kwarana e taiko-taikomu.
 
23 Daika vada o ḡonaḡonalaia, vada o ihi-ihiraia?
Daika ihadikana ai gadomu vada o habadaia
bona matamu o helari dae heniamu?
Israel ena Helaḡa Diravana enai.
24 Emu hesiai taudia ududia amo Iehova vada o ḡonaḡonalaia,
oto, Egu kariota momo amo
ororo doridia ai vada na dara dae,
ela bona Lebanon ena gabu hehunidia.
Ena sida audia lata-hereadia na hagaridia,
bona ena beroso audia namo-hereadia danu.
Ia doridorina ai na dara dae,
bona ena uda ahu ai danu.
25 Guri na geidia,
ranu na inu;
aegu lalona amo
Aigupto sinavaidia iboudiai na hakororodia.
 
26 Oi to kamonai a,
lau ese idau nega ai na heḡaeḡaelaia?
Harihari na havaramu karadia na
idau nega ai na lalodia, nato,
oi ese hanua mai maḡudia na
nadi senudia ai ba halaodia;
27 bena edia goada baine ore dainai
inoholaidia taudia na daradia bae doko bona bae baia;
tano avadia eiava rei matamata
heḡereḡeredia ai baela,
eiava ruma guhidia ai rei e varamu na heto,
do se huahua ai na e maraimu.
28 A lau na emu helai diho dibagu,
emu raka lasi bona emu raka vareai,
bona emu heihi-ihirai egu ai danu.
29 Vada o ihi-ihiraigu dainai,
bona emu hekokoroku herevadia vada na kamonai dainai,
lau ese egu igau na udu-baubaumu ai baina atoa,
bona egu udu-aurina danu udumu ai;
bena ma baina haloumu,
oi oma dalana amo.
30 Toana emu ai binai: ina laḡani lalonai vara kava ḡauna bavania, bona laḡani iharuana ai ma iena amo baine vara ḡauna bavania; laḡani ihatoina ai ba hadohado bona ba taboro, vine imeadia ba hado, bona anidia bavani. 31 Bona Iuda kwabukwabudia dounu mamauri na ramudia bae diho bona tuhutuhudia bae dae; 32 badina be kwabukwabudia na Ierusalem amo bae raka lasi, bona Siona ororona amo roho-mauri taudia oreana na bainela. Iehova ena ura kwalimu ese ina na baine havaraia.
33 Taunabunai, Iehova ese Asuria pavapavana na ini e herevalaia tomamu: Ia na ina hanua basinema, eiava diba ta basine kino henia, eiava mai kesina ida hanua vairanai basinema, eiava tano na hanua vairanai basine larebaia dae. 34 Ema dalana amo ma baine lou; ina hanua lalonai basine raka vareai Iehova vada e hereva. 35 Badina be ina hanua baina gimaia bona baina namauria, lau sibogu daigu ai bona egu hesiai tauna David dainai.
36 Bena Iehova ena aneru na e raka lasi, taunimanima domaga-ta gerebu-taurahani daha-ima* Asuria taudia edia taruha ai e aladia mase. Daba e rere, haida e tore isi, e itadia, unu na iboudiai mase taudia mo. 37 Bena Senakerib, Asuria pavapavana, na e raka oho, e lou lao, Nineve ai e noho. 38 Bena ena dirava, ladana Nisrok, ena dubu ai e ḡuriḡuriva negana ai, ia natuna Adram-melek bona Saresere ese dare amo e alaia mase, bena e heau mauri, Ararat tanona ela. Bena natuna ta, ladana Esarahadon, ese ia gabuna ai e lohia.
* 37:36 Domaga-ta gerebu-taurahani daha-ima = 185,000.