44
Dirava tamona na Iehova
1 Iakob e, egu hesiai tauna,
Israel e egu abi-hidi tauna, a kamonai!
2 Iehova, ikaramu Diravana,
sinamu bogana ai e hadudumu
bona do baine durumu Diravana,
ini e gwau tomamu:
Iakob e, egu hesiai tauna,
Iesurunu e, egu abi-hidi tauna, asio gari.
3 Badina be lau ese ranu na tano haura-haurana latanai baina seia diho,
bona sinavai na tano kaukauna latanai danu;
egu Lauma na oi garamu latadiai baina seia,
bona egu hahenamo na oi vevemu latadiai danu.
4 Idia na bae tubu, rei na heto, ranu gabudia ai e tubumu,
eiava au na heto, e arumu sinavaidia badibadidiai e tubumu.
5 Ta baineto “Lau na Iehova ena”,
ma ta be sibona Iakob ladana baine henemailai;
ma ta ese imana ai baine torea “Iehova ena”,
bona sibona ladana baine hehato Israel.
6 Iehova, Israel pavapavana,
bona Ihamaurina, Iehova Sabaota,
ini e gwau tomamu:
Lau na gini-gunana bona gini-gabena;
asi dirava ta, lau mo sibogu.
7 Daika na lau heḡereḡeregu? Ia ese baine gwauraia hedinarai;
lau vairagu ai baine herevalaia bona baine hahedinaraia.
Daidia ese do bae vara ḡaudia na nega gunadia amo e gwaurai?
Idia ese do bae vara ḡaudia na ma bae gwaurai henida.
8 Asio gari, kudoumui basie hetaha;
nega gunadia amo asina hamaoromui bona asina gwauraia hedinarai a?
Bona umui na egu hereva ihamomokanidia taumui.
Dirava idauna ta e nohomu a?
Asi Nadi-ginina ta; ta asi dibagu.
Kaivakuku
9 Kaivakuku e karamu taudia na asi anidia, bona e moalelaimu ḡaudia ese asie hanamodiamu; ihamomokanidia taudia ese ḡau asie itamu bona asie dibamu, taunabunai bae hahemaraidia.
10 Daika ese dirava asi anina ta e karaiamu eiava laulau asi anina ta e hahetariamu?
11 A itaia, ia bamona iboudiai na bae hahemaraidia; bona ima idibaka taudia na taunimanima mo. Iboudiai na bae hebou, bae gini lasi; gari ese baine butudia tao, bona bae hemarai bou.
12 Auri iḡaukaralaina tauna ese gida mai lahidia latadiai e gaukaralaiamu; hodohodo auridia amo e hodoamu, bona imana goadana amo oromana e karaiamu; e hitoloamu, bena ena goada e oremu; ranu se inumu, bena tauna e manorimu.
13 Kamuta tauna ese ena hahetoho varona e veria roromu, bona puri amo toana e toremu; naunau auridia amo e nauamu, bona kuboro-hahetohona aurina amo e hahetohoa heḡeḡemu. Bena e koroamu, tau oromana ai, tau raho-namona heḡereḡerena ai, ruma ai baine hamiaia e tomu.
14 Ia ese sida audia e hagaridiamu; eiava budabuda eiava diharoha e abia hidimu, e nariamu ela bona baine kiriri, uda audia padadiai; sida auna ta danu e hadoamu, bena medu ese e hatubuamu.
15 Bena tau ta ese ena lahi auna ai e halaoamu; kahana e ha-araiamu sibona e heganamu, makahana e ha-araiamu, flaoa e gabulaiamu. Bena ena dirava ta e karaiamue toma henia dihomu; laulau ta e koroamu, vairanai e igo dihomu.
16 Kahana na lahi ai e araiamu; ma kahana latanai ana vamu e gabuamu; e gabuamu ḡauna e aniamu, bogana e kunumu. E heganamu danu, e tomu “Aha! Taugu na e siahumu, lahi vada name itaia.”
17 Bena au orena na dirava ta e karalaiamu, ena kaivakuku; bena vairanai e igo dihomu, e toma henia dihomu; e guriamu, e tomu “A hamaurigu, badina be oi na egu dirava”.
18 Idia na asi dibadia, lalodia na asie pararamu; badina be ia ese matadia vada e hakapudia, bena basie itaia diba, bona lalodia vada e haduhudia, bena lalodia na basie parara diba.
19 Ta ese lalona se hadaiamu, ta asi aonegana eiava asi lalo-pararana, bena e tomu: Kahana na lahi ai vada na araia; bona gida latadiai ilaoa bona vamu vada na gabudia, vada na aniani; matona, orena amo ḡau dika-hereana baina karaia a? Au kavakava vairanaibaina toma diho a?
20 Ia na kahu e animu; ena lalo-duhu ese vada ehakaua kerere. Asi ena dala sibona baine hahemauri, eiava baineto “Imagu idibana ai koikoi na dia mia a?”
Iehova na Israel Ihamaurina
21 Iakob e, ini ḡau ba lalodia tao;
Israel e, ba lalodia tao, badina be oi na egu hesiai tauna.
Lau ese vada na karamu; oi na egu hesiai tauna;
Israel e, basina lalomu boio.
22 Emu kara kereredia vada na abidia oho, ori na heto,
bona emu kara dikadia, ninoa na heto;
a lou henigu,
badina be lau ese vada na hamaurimu.
23 Guba e, ane avabia, badina be Iehova ese vada e haḡuḡurua;
tanobada ena dobu gabudia e, a lolo!
Ororo e, ane a lada isi;
oi danu, uda e, mai aumu iboudiai.
Badina be Iehova ese Iakob vada e hamauria,
bona Israel lalonai bae imodaia.
24 Iehova, oi Ihamaurimu Diravana,
sinamu bogana ai e hadudumu Diravana,
ini e gwau tomamu:
Lau binai Iehova; ḡau iboudiai na karadia;
lau sibogu ese guba na idia roro;
lau ese tanobada na idia roro;
daika na lau ida?
25 Lau ese koikoi taudia edia toa na gwau tubumu,
bona mari-abi taudia na hakavakavadiamu;
aonega taudia na haloudiamu,
bona edia aonega na kavakava ai na halaoamu.
26 Lau ese egu hesiai tauna ena hereva na hamomokaniamu,
bona egu gwaukau taudia edia hahealo heḡereḡerena ai na karaiamu.
Ierusalem na herevalaiamu, na tomu
“Haida ese bae noholaia”;
bona Iuda hanuadia na herevalaidiamu, na tomu
“Do bae gini; vada e heḡiḡi rohoroho ḡaudia na
lau ese baina haginidia lou”.
27 Gadobada na hamaoroamu, na tomu
“A kororo; emu sinavai baina hakororodia”.
28 Lau ese Kurese na herevalaiamu, na tomu
“Ia na egu mamoe ireḡudia tauna,
bona ia ese egu lalo-hadai idoinai baine haḡuḡurua”;
bona Ierusalem na herevalaiamu, na tomu “Baine gini”,
bona Dubu Helaḡa na hamaoroamu, na tomu “Badimu baine heato”.