60
Siona hairaina
1 A tore isi, a diari-diari, badina be emu diari vada e kau,
bona Iehova hairaina na emu ai vada e tata dae roha,
2 Badina be dibura ese tanobada baine gorua ahu,
dibura ḡabora ese tanobada besedia baine gorudia ahu;
a Iehova na oiemu ai baine tata dae roha,
bona ia hairaina na emu ai baine hedinarai.
3 Bese idau-idau ese diarimu bae mai henia,
bona pavapava ese emu tata-dae-roha diarina ai baema.
4 Ba roharoha, ba itaia,
idia na e heboumu, e vasimu;
natumu mamaruanedia na dauha amo baema,
bona natumu kekenidia na bae dagiradia.
5 Do ba itaia, bena vairamu baine hairai,
bona lalomu baine haraḡa-haraḡa moale dainai;
badina be davara anina loḡora na emu ai bae mailai,
bona basileia idau-idau edia taḡa na emu ai bae kau.
6 Kamelo hutuma bada ese emu tano bae hahonua,
Midian bona Efa edia kamelo natudia;
bona Sieba ena iboudiai danu baema.
Idia ese gold bona muramura mai bonana bae hua mai,
Iehova ihanamona bae gwauraia hedinarai.
7 Kedara ena mamoe seridia iboudiai na emu ai bae haboudia,
Nebaioto ena mamoe mamaruanedia ese oi isiaimu bae lao heni;
egu ihaboulaina patana baema negana ai baina abidia dae,
bona egu dubu herea-daena hairaina baina habadaia.
8 Ini be daidia, ori na heto e heaumu,
eiava pune ese edia ruma gaba-maurudia e roho henimu na heto?
9 Badina be kone tanodia ese bae narigu,
Tarasisi lagatoidia bae guna;
natumu mamaruanedia na dauha amo bae mailaidia,
mai edia silver bona edia gold ida danu,
Iehova, emu Dirava, ladana dainai,
Israel ena Helaḡa Diravana bagunai;
badina be ia ese vada e hahairaimu.
10 Idau bese taudia ese maḡumu baine larebadia,
edia pavapava ese isiaimu bae lao heni;
badina be egu badu ai na rahumu mase,
to egu lalo-namo ai vada na bogamu hisi.
11 Emu ikoukou bae hekeho hanaihanai,
dina ai bona hanuaboi ai basie hekou;
bena taunimanima ese basileia idau-idau edia taḡa na dekemu baemailai,
bona iru ta ta ai edia pavapava bae hakaudia mai.
12 Badina be isiaimu basine lao heni besena eiava basileiana na baine mase;
unu bese na bae hebua tari vaitani.
13 Lebanon hairaina na emu ai baine kau,
beroso bona tidara bona teasuru audia,
egu gabu helaḡana ihahairaina totona;
bona aegu gabuna hairaina baina habadaia.
14 E hahisihisimuva taudia natudia na
oi vairamu ai bae igo diho,
bona e dadaraimuva taudia iboudiai na
oi aemu badidiai bae toma diho;
bae gwauraimu “Iehova ena Hanua,
Israel ena Helaḡa Diravana ena Siona”.
15 Vada e rakatanimu bona e inai henimu,
bona ta na lalomu amo se raka hanai;
to lau ese lohia hairaina do baina henimu, emu ai baine mia hanaihanai,
bona uru uru iboudiai moaledia ai baina halaomu.
16 Basileia idau-idau ratadia ba inu,
pavapava ratadia ba topo;
bona ba diba, lau Iehova na Ihamaurimu Diravana,
oi Irauamu, Iakob ena Goada Diravana.
17 Auri labora-labora ibolona ai gold baina mailaia,
bona auri ibolona ai silver;
au ibolona ai auri labora-labora baina mailaia,
bona nadi ibolodia ai auri.
Maino na baina henimu, baine itamu tao,
bona kara maoromaoro baina henimu, baine biagumu.
18 Ala-ala reḡedia basio kamonai lou emu tano ai,
eiava hahevahu eiava hahebua-tari emu hetoa lalodiai;
emu maḡu ladadia ba hato “Hahemauri”,
bona emu ikoukou “Heimodai”.
19 Dina ese basine hadiarimu lou dina ai,
eiava hua kiama-kiamana ese basine hadiarimu hanuaboi ai;
a Iehova na emu mia-hanaihanai diarina ai bainela,
bona emu Dirava na hairaimu ai bainela.
20 Emu dina na basine diho lou,
bona emu hua diarina na basine maraḡi lao,
badina be Iehova na emu mia-hanaihanai diarina ai bainela,
bona emu tai dinadia bae ore.
21 Emu taunimanima iboudiai na bae kara maoromaoro,
tano na bae ḡaunaia hanaihanai,
na hadoa uhena, lau imagu ḡaukarana,
lau bae imodaigu totona.
22 Gabe tauna na iduhu ta ai bainela,
bona maragi-maragina na bese badana mai goadana ai bainela.
Lau binai Iehova;
negana korikorina ai lau ese baina havaraia haraḡa.