17
Iesu ena Ḡuriḡuri
1 Iesu unu e gwau toma, bena guba ai e gaga dae, e ḡuriḡuri, eto, Tamagu e, horana binai: Natumu ba heatolaia, bena Natumu ese oi baine heatolaimu.
2 Badina be oi ese siahu vada o henia, ia ese taunimanima iboudiai baine lohiadia, bona o henia taudia iboudiai na ia ese mauri hanaihanai do baine henidia.
3 Mauri hanaihanai binai: idia ese oi Dirava Korikori tamona bae dibamu, bona Iesu Keriso danu, oi ese o siaia tauna.
4 Lau ese tanobada ai vada na heatolaimu, vada o henigu ḡaukaradia danu vada na kara ḡuḡuru.
5 Tamagu e, harihari oi vairamu amo ba heatolaigu, tanobada do se vara negana ai oi vairamu ai na abia hairaina.
6 Tanobada ai o henigu taudia na oi ladamu vada na hadibalaidia. Guna idia na oiemu; bena oi ese lau o henigu; idia ese danu emu hereva vada e badinaia.
7 Harihari idia na dibadia, vada o henigu ḡaudia idoidiai na oiemu amo ema.
8 Badina be o henigu herevadia vada na henidia; bena idia ese e abi dae, bona e diba momokani lau na oiemu amo nama, e kamonai lava dae danu oi ese o siaigu.
9 Idia daidiai na nounumu; dia tanobada dainai asina noimumu. O henigu taudia daidiai na nounumu, badina be idia na oiemu.
10 Egu ḡau idoidiai be oiemu, oiemu danu lauegu, bona idia edia amo lau hairaigu vada na abia.
11 Harihari lau na tanobada ai basina noho; idia na tanobada ai bae noho, a lau be oi dekemu baina vasi.
Tamagu helaḡa e, vada o henigu taudia na ladamu ai ba dogodia tao; bena idia na bae tamona, ita raruosi na tamona heḡereḡerena.
12 Idia ida a nohova ai, o henigu ladana ai, oi ladamu bunai, na dogodia taova; na gimadiava, idia ta se mase, e baia tauna mo sibona, buka herevana ihamomokanina.
13 Harihari ba vasimu. Taunabunai ini hereva tanobada ai na gwauraimu, egu moale na egu hahediba lalodia ai bae abia dae ḡuḡuru helaoreana.
14 Emu hereva vada na henidia; bona tanobada ese vada e inai henidia, badina be idia na dia tanobada nea, lau heḡereḡeregu, lau na dia tanobada ena.
15 Asina noimumu tanobada amo bavabidia oho, a na noimumu Tau Dikana ena amo ba hamauridia.
16 Idia na dia tanobada ena, lau heḡereḡeregu, lau danu dia tanobada ena.
17 Hereva momokani ai ba hahelaḡadia: emu hereva na hereva momokani.
18 Vada o siaigu tanobada ai heḡereḡerena ai, lau ese danu vada na siaidia tanobada ai.
19 Bona idia daidiai sibogu name helaḡa, idia danu hereva momokani ese baine hahelaḡadia helaoreana.
20 Dia idia mo sibodia daidiai na noimumu, a edia hereva amo bae abiabiraigu taudia danu daidiai na noimumu.
21 Tamagu e, iboudiai na bae tamona; oi na lau lalogu ai bona lau na oi lalomu ai heḡereḡerena, idia danu ita laloda ai bae noho. Unu amo tanobada ese baine abia dae oi ese o siaigu.
22 Vada o henigu hairaina danu idia vada na henidia; taunabunai, idia na bae tamona, ita raruosi ta tamonamu heḡereḡerena.
23 Lau na idia lalodia ai, oi danu lau lalogu ai; taunabunai idia na bae hatamona ḡuḡuru. Bena tanobada na baine diba, oi ese vada o siaigu, bona oi ese o ura henidiamu, lau o ura henigumu heḡereḡerena.
24 Tamagu e, lau na uramu lau baina noho gabuna ai o henigu taudia danu bae noho, bena vada o henigu hairaina na bae itaia; badina be tanobada do so karaia negana ai oi ese o ura heniguva.
25 Tamagu e, kara maoromaoro Diravana, tanobada na asi dibana oi, a lau be mai dibagu. Ini danu vada eme diba oi ese vada o siaigu.
26 Oi ladamu danu vada na hadibalaidia, bona ma baina hadibalaidia; bena o ura henilaigumu ura-henina na idia lalodia ai baine mia, bona lau danu idia lalodia ai baina noho.