19
1 Bena Pilato ese Iesu e abia, e siaia lao, tuari taudia ese e dadabaia.
2 Bena idia ese havava ḡauna ḡiniḡini a e hatua, ia kwarana ai e atoa kau; bona dabua kakakakana e hakaralaia.
3 Bena e raka henia kahi, eto, Iuda taudia edia pavapava e, ba mauri! Bena imadia amo e pataia.
4 Bena Pilato ma e raka lasi, eto, A itaia, vairamui ai name hakaua lasi; ba diba, ena kerere ta asiname davaria.
5 Bena Iesu na e raka lasi; havava ḡauna ḡiniḡini a e hatua be kwarana ai, dabua kakakakana danu tauna ai. Bena Pilato eto, Tau na a itaia.
6 Hahelaḡa taudia bona edia hesiai taudia ese e itaia, bena e lolo, eto, Ba hasatauroa, ba hasatauroa! Pilato eto, Umui sibomui avabia, ba hasatauroa; badina be lau ese ena kerere ta asiname davaria.
7 Iuda taudia ese e haere henia, eto, Ai na mai emai taravatu; bena emai taravatu dainai ia na baine mase hari namo, badina be ia na sibona e hegwaurai, e tomamu ia na Dirava Natuna.
8 Pilato na una hereva e kamonai negana ai na e gari dikadika;
9 gavana ena ruma ai ma e raka vareai lou, Iesu e nanadaia, eto, Ede amo oma? A Iesu na se haere.
10 Bena Pilato eto, So hereva henigumu a? Asi dibamu lau na mai siahugu baina ruhamu nege bona mai siahugu baina hasatauromu a?
11 Iesu eto, Atai amo siahu basinema henimu, asi emu siahu boma noho; badina bunai, taogu e torea tauna ena dika ese oiemu e hereaiamu.
12 Unu amo Pilato ese ia iruha-negena dalana e tahua tohova. A Iuda taudia na e lolo, eto, Ena tau bo ruhaia negemu, oi na dia Kaisara turana. Bema tau ta e gwaumu ia sibona na hanua ta pavapavana, ia ese Kaisara e inai heniamu.
13 Pilato ese una hereva e kamonai, bena ia ese Iesu ma e hakaua lasi. Bena ia na hahemaoro gabuna ai e helai diho: una gabu ladana be “Nadi dehena”; Heberu gadodia ai ladana be “Gabata”.
14 Una na Lagau-hanai Ariana e abia heḡaeḡae dinana; negana be dina tubua. Pilato ese Iuda taudia e hereva henidia, eto, A itaia, emui pavapava binai.
15 Bena idia na e lolo, eto, Avabia oho! Avabia oho! Ba hasatauroa! Pilato ese e nanadaidia, eto, Emui pavapava baina hasatauroa a? Hahelaḡa taudia na eto, Asi emai pavapava ta, Kaisara mo sibona.
16 Bena Iesu vada e henidia, bae hasatauroa. Bena idia ese e abia, e hakaua lao.
Iese e hasatauroa
17 Iesu ese ena satauro e huaia lao, ḡabu ta ela, ladana na “Kwara koukouna gabuna”; Heberu gadodia ai ladana na “Kwara koukouna gabuna”, Heberu gadodia ai ladana na “Golgota”.
18 Unuseni ai idia ese e hasatauroa; bona tatau rarua danu, ta kahana ai ma ta kahana ai, Iesu na ihuadia ai.
19 Bena Pilato ese revareva e torea, satauro dorina ai e kapaia kau. E torea revarevana binai: IESU, TAU NASARET; IUDA TAUDIA EDIA PAVAPAVA.
20 Iuda taudia hutuma ex una revareva e duahia, badina be Iesu e hasatauroa gabuna bona hanua badana padadia na dia daudau; bona una revareva na Heberu gadodia ai bona Roma gadodia ai bona Helene gadodia ai e torea.
21 Bena Iuda taudia edia hahelaḡa taudia badadia ese Pilato e hamaoroa, eto, Basio torea “Iuda taudia edia pavapava”; ini hari ba torea toma, “Ia eto, Lau na Iuda taudia edia pavapava”.
22 Pilato eto, Na torea ḡauna be vada na torea vaitani.
23 Bena tuari taudia, hari Iesu e hasatauroa taudia, ese ena dabua e abi, e dare siri hani, bena hahaniosi ta ta ese ahudia e abi. A ena hahedoki na se turia ḡauna, idoinai vada e hatua.
24 Taunabunai, sibodia e hereva heheni, eto, Basita darea, a mari hari baita karaia, bena baita diba daika ese baine abia. Unu amo Buka Helaḡa ai e torea herevana vada e momokalli; eto,
Idia ese egu dabua e hari,
Egu hahedoki na mari amo e abia.
Hari tuari taudia na unu e kara toma.
25 Satauro badibadinai Iesu sinana bona sinana lahaina bona Maria, Klopa adavana, bona Maria, hane Magdala, gigini.
26 Bena Iesu ese sinana bona e lalokau henia hahedibana na unuseni ginidia ai e itadia. Bena sinana e hereva henia, eto, Hahine e, a itaia, natumu benai.
27 Hahediba danu e hereva henia, eto, A itaia, sinamu benai. Una negana ela, una hahediba ese ena ruma ai e abia dae.
28 Una murinai, Iesu na vada dibana ḡau iboudiai vada e haḡuḡuru, bena Buka Helaḡa herevana ihamomokanilaina e hereva, eto, Ranu vada eme masegu.
29 Hodu auta unuseni ai, vine ranuna iditana ai e honu. Bena puta na una vine ranuna iditana lalonai e urua utu, au ai e hiria kau, bena e duduia dae uduna ai.
30 Iesu ese vine ranuna iditana e abia, bena eto, Vada e ore. Bena kwarana e gelo diho, laumana e heni dae.
31 Una dina be Lagau-hanai Ariana iabi-heḡaeḡaena dinana, bena Dina Helaḡa ai mase taudia na satauro ai bae mia na garina, badina be una Dina Helaḡa tamona na helaḡa bada, Iuda taudia ese Pilato e noia, e hasataurodia taudia aedia bae hakwaidudia bona bae abidia oho.
32 Taunabunai, tuari taudia na ela, tau gunana aena e hakwaidu, ma iharuana aena danu, hari Iesu ida e hasataurodia hebou taudia.
33 Bena Iesu ma e lao henia, to e itaia vada e mase vaitani, taunabunai ia aena asie hakwaidu.
34 A tuari tauna ta ese Iesu ohena e toḡea, bena rara bona ranu e lohilohi dobi.
35 E itaia tauna ese vada eme gwauraia hedinarai, bona ena hereva na momokani. Ia na dibana ena hereva na momokani; una dainai vada bavabia dae.
36 Badina be una kara e vara, buka herevana ihamomokanilaina, eto, Turiana ta asie hakwaidua.
37 Ma ta danu, eto, Idia ese bae toḡea tauna na bae raraia.
Iesu e ḡuria
38 Unu ḡau muridiai, Iosef, Arimatea tauna, Iesu enai e hahediba hehuni Iuda taudia garidia tauna ta, ese Pilato e noia, Iesu tauna baine abia oho. Pilato e gwau maoro; bena Iosef ela, tauna e abia oho.
39 Nikodemo danu, gunaguna hanuaboi ai Iesu dekena ela tauna, muro bona aloe muramuradia e hebulo na e abi kau, metaudia na pound sinahu-ta sisivana.
40 Bena idia raruosi ese Iesu tauna e abia, dabua aukana mai muramura ida e kumilaia, Iuda taudia edia mase iguridia karadia heḡereḡeredia.
41 Iesu e hasatauroa gabuna ai be imea ta, bona una imea lalonai na gara matamatana ta, lalonai mase tauna ta do asie atoa.
42 Taunabunai, idia ese Iesu unuseni ai e atoa, badina be una dina na Lagau-hanai Ariana iabiheḡaeḡaena dinana, bona una gara na kahira-kahira.