21
Naboto ena vine imeana
1 Naboto, tau Iesrele, na mai ena vine imeana ta Iesrele ai, Ahaba, Samaria pavapavana, ena pavapava rumana badinai.
2 Bena Atlaba ese Naboto e hereva henia, eto, Emu vine imeana a henigu, egu uma ai baina halaoa, ia na egu ruma badinai; bena lau ese vine imeana namo-hereana ta amo baina bodohilaia, eiava ba ura davana na moni baina henimu.
3 A Naboto ese Ahaba e haere henia, eto, Iehova na se uramu senegu edia amo na abia tanona na oi baina henimu.
4 Bena Ahaba na mai lalo-ḡaraḡarana bona mai baduna ida ena ruma ai e raka vareai, Naboto tau Iesrele ena hereva dainai; badina be ia na eto, Senegu edia amo na abia tanona na basina henimu. Bena ena mahuta ḡauna ai e hekure, vairana e hunia, bona se aniani.
5 A adavana Iesebel na ia dekena ela, e nanadaia, eto, Badina be dahaka lalomu e hisihisimu bona so anianimu?
6 Bena ia ese e haere henia, eto, Badina be Naboto tau Iesrele na hereva henia, nato “Emu vine imeana a henigu moni davana, eiava ba ura lau ese vine imeana ta baina henimu, ia ibodohilaina”; bena ia na e haere, eto “Egu vine imeana basina henimu”.
7 Bena adavana Iesebel ese e hamaoroa, eto, Oi na harihari Israel o lohiaiamu a? A tore isi, bavaniani, lalomu na baine moale; lau ese Naboto tau Iesrele ena vine imeana baina henimu.
8 Taunabunai, una hahine ese revareva haida e tore Ahaba ladana ai, bona ena toa amo e hamomokanidia; bena ia ese unu revareva na Naboto ena hanua tau-badadia bona lohiadia, ia ida e noho hebouva taudia, dekedia e siai lao.
9 Revareva lalodiai ini e torea toma: Anivaga ba gwauraia, bona Naboto na atai ai ba hahelaia kau, taunimanima bogaragidiai;
10 bona kara dibaka taudia rarua na ia vairanai bavatodia. Bena raruosi ese ia bae habadelaia, baeto “Oi na Dirava bona hanua pavapavana o uduguiraidia”. Bena ba hakaua lasi, nadi amo ba hodoa mase.
11 Bena ena hanua tau-badadia bona lohiadia, ia ida e noho hebouva taudia, ese Iesebel e siaia herevana heḡereḡerena e karaia. Dekediai e siai lao revarevadia ai e torea heḡereḡerena ai,
12 idia ese anivaga e gwauraia, bona Naboto na atai ai e hahelaia, taunimanima bogaragidiai.
13 Bena kara dibaka taudia raruosi na e raka vareai, ia vairanai e helai; bena hari kara dibaka taudia ese Naboto e habadelaia, taunimanima vairadiai, eto, Naboto ese Dirava bona hanua pavapavana na e uduguiraidia. Taunabunai, idia ese hanua murimurinai e laohaia, nadi amo e hodoa mase.
14 Bena hereva na Iesebel dekena e siaia lao, eto, Naboto na nadi amo vada e hodoa, vada e mase.
15 Iesebel na e kamonai Naboto vada e hodoa mase, bena maoromaoro ia ese Ahaba e hamaoroa, eto, A tore isi, Naboto tau Iesrele ena vine imeana, e rua moni davana ai basine henimu eto ḡauna, na bavabia oiemu; badina be Naboto na dia mauri, ia na vada e mase.
16 Ahaba na Naboto ena mase harina e kamonai, bena maoromaoro e tore isi, Naboto tau Iesrele ena vine imeana baine lao henia, baine ḡaunaia eto.
17 Una negana ai Iehova ena hereva na Elia, tau Tisbe, enai e kau, eto,
18 A tore isi, aola, Ahaba, Israel pavapavana, ida ba hedavari. Ia na Samaria ai, Naboto ena vine irneana vada e lao henia, baine ḡaunaia totona.
19 Ba hamaoroa, baoto, Iehova na ini e gwau tomamu: Vada o ala-ala bona vada o ḡaunaia a? Ma ba hamaoroa, baoto, Iehova na ini e gwau tomamu: Sisia ese Naboto rarana e demaria gabuna ai oi raramu danu bae demaria.
20 Ahaba ese Elia e hereva henia, eto, Inaigu e, vada o davarigu a? Elia ese e haere henia, eto, Vada na davarimu; badina be sibomu vada o hehoi, Iehova vairanai kara havara ba karaia totona.
21 A kamonai, lau ese dika baina hadihoa latamu ai; baina negemu daure vaitani, Ahaba ena amo mamaruane iboudiai Israel ai, e ḡuidia taudia bona asie ḡuidia taudia, baina utudia oho.
22 Emu iduhu na Ieroboam Nebata ena iduhu bona Baasa Ahia ena iduhu heḡereḡeredia ai baina halaoa, badina be lau vada o habadugu, bona Israel vada o hakaraia dika.
23 Iesebel danu Iehova ese e herevalaia, eto, Sisia ese Iesebel bae ania, Iesrele tano-hetoana lalonai.
24 Ahaba ena iduhu tauna ta hanua ai bema mase, sisia ese bae ania; eiava ena iduhu tauna ta tano paka ai bema mase, atai manudia ese bae ania.
25 Tau ta sibona se hehoi, Iehova vairanai kara havara ikarana totona, Ahaba heḡereḡerena; ia lalona na adavana Iesebel ese e ania.
26 Kara dikahereadia danu e karava, dirava koikoidia igavadia ai, Amoro taudia, Iehova ese Israel taudia vairadiai e luludia lasi besena, e karava heḡereḡerena.
27 Ahaba ese unu hereva e kamonai, bena ia ese ena dabua e dare, puse dabuadia e dokilaidia, e anivagava, puse dabuadia ai e hekureva, bona mai lalo-metauna ida e loava.
28 Bena Iehova ena hereva na Elia, tau Tisbe, enai e kau, eto,
29 Ahaba vada o itaia, lau vairagu ai e hahemanaumu a? Lau vairagu ai e hahemanaumu dainai lau ese dika basina hadihoa iena nega ai, a natuna ena nega ai lau ese dika baina hadihoa, ena iduhu latanai.