10
Iehova e, dahaka dainai oi na dauhai o ginimu?
Dahaka dainai dika negadia ai o noho hehunimu?
Kara dika taudia ese ogoḡami taudia e hahisihisidiamu mai hekokorokudia ida;
sibodia edia lalo-hadai dikadia ai bae heidoa.
Badina be kara dika tauna ese sibona ena ura e heagilaiamu,
bona mata-ḡaniḡani tauna ese Iehova e uduguiraiamu bona e dadaraiamu.
Kara dika tauna vairana hekokorokuna ai ia se tahuamu;
ena lalo-hadai idoinai be Dirava na lasi.
 
Nega idoidiai ena dala na auka;
oiemu hahemaoro na atai ai, ia na se itamu;
ia inaina iboudiai e pururudiamu.
Lalona e hadaiamu, e tomu “Basina marere-marere,
uru iboudiai lalodiai basina dika”.
 
Uduna na heuduguirai bona koikoi bona daḡedaḡe eme honu honu dae,
malana henunai kara havara bona kara dika na mimia.
Hanua lalodiai e bani taomu,
gabu hehunidia ai asi edia kerere taudia e aladia masemu.
 
Ia matana ese manoka-manoka taudia e hasinadodiamu;
ia na komu gabuna ai e banimu, leona ese ena kohua ai e banimu na heto;
ogoḡami tauna e bani heniamu, baine dabaia tao totona;
ena huo ai e koia vareaimu, bena e dabaia taomu.
 
10 Manoka-manoka tauna e hapataia tarimu, e moru dihomu,
kara dika tauna ena goada ese e hamoruamu.
11 Kara dika tauna na lalona e hadaiamu, e tomu
“Dirava vada e helalo boio;
vairana vada e hamuea, egu kara dika basine itaia”.
12 Iehova e, a tore isi! Dirava e, imamu a duduia isi!
Hisi e animu taudia na basio lalodia boio.
13 Badina be dahaka kara dika tauna ese Dirava e dadaraiamu?
Dahaka dainai lalona e hadaiamu, e tomu “Anina basio tahua”?
14 Hekwarahi bona hisihisi vada o itaia, oibe, vada o haeroa,
oi imamu ai bavabia totona;
manoka-manoka tauna ese oiemu ai e taomu;
oi ese ihareha o kahadiamu.
 
15 Kara havara bona kara dika tauna imana na ba hakwaidua;
ena dika ba tahua ela bona ta basio davaria.
16 Iehova baine pavapava hanaihanai;
bese idau-idau na iena tano amo bae ore.
 
17 Iehova e, manau taudia edia noinoi ba kamonai, ani;
Ialodia ba hagoadadia, bona ba hakala henidia,
18 ihareha bona hisihisi taudia ba kara maoromaoro henidia totona;
unu amo tanobada tauna na hahegari karadia basine kara lou.