11
1 Iehova na abidadama heniamu; dahaka dainai o hamaorogumu, o tomu
“Ororo ba roho henia, manu na heto;
2 a itaia, kara dika taudia na peva e rohemu,
edia diba na maora ai e adaimu,
lalo-ḡoevaḡoeva taudia na dibura ai bae tarakidia totona;
3 badidia bema habua tari, kara maoromaoro taudia na ede bae kara toma?”
4 Iehova na ena dubu helaḡana ai e nohomu,
Iehova ena terono na guba ai mia;
ia matana ese taunimanima natudia e nenediamu,
ia matana kopidia ese e dibadiamu.
5 Iehova ese kara maoromaoro taudia bona kara dika taudia e dibadiamu;
ia laumana ese daḡedaḡe karadia e ura henimu tauna na e inai heniamu.
6 Ia ese lahi gidadia bona teio na kara dika taudia latadiai baine ḡiḡi dobi;
lai siahuna na edia kehere anina ai bainela.
7 Badina be Iehova na maoromaoro, bona kara maoromaorodia ia ese e ura henidiamu;
kara maoromaoro taudia ese ia vairana bae itaia.