15
Hahegoada herevadia
1 Ita goada tauda na manoka taudia edia manoka baita huahai, dia ita siboda eda moale basita tahua.
2 Iboudai ta ta dekeda taudia baita hamoaledia, edia namo bona edia goada ihavaradia.
3 Badina be Keriso danu sibona se hahemoale; Buka Helaḡa ai e torea heḡereḡerena, eto, Gwaugwau herevadia oi e gwau henilaimu na lau latagu ai vada eme kau.
4 E tore guna ḡaudia na ita ihadibalaida totona e tore, bena Buka Helaḡa ese haheauka bona tauhalo bae havara, ela bona helaro baita davaria.
5 Bena haheauka bona tauhalo Diravana ese lalomui baine hatamonadia, Keriso Iesu bagunai;
6 bena mai lalomui tamona bona mai eremui tamona ida Dirava, iseda Lohiabada Iesu Keriso Tamana, ba imodaia.
7 Taunabunai ba heabi-dae heheni, Keriso ese umui e abimui dae heḡereḡerena, Dirava iheatolaina.
8 Na tomu Keriso na Israel edia hesiai tauna ai e halaoa, Dirava ena hereva momokani dainai, seneda e gwau henidia hamata herevadia ihamomokanidia;
9 bona bese idau-idau ese danu Dirava bae imodaia, ena hebogahisi dainai; buka ai e torea heḡereḡerena eto,
Ina dainai bese idau-idau bogaragidiai baina imodaimu;
Oi ladamu na egu ane ai baina hanamoa.
10 Ma eto,
Idau bese taumui e, ia besena ida ba moale hebou.
11 Ma eto,
Bese idau-idau taumui iboumui ai, Lohiabada ba imodaia;
Taunimanima iboumui ai, ia ba hanamoa.
12 Ma Isaia eto,
Iese ramuna amo ta baine gara kau,
Bese idau-idau lohiadia ai bainela;
Bese idau-idau taudia ese ia bae abidadama henia.
13 Helaro Diravana ese emui abidadama dainai moale bona maino idoinai baine hahonulaimui, Lauma Helaḡa siahuna amo baine habadaia.
Egu ḡaukara bona egu laolao
14 Varavaragu e, lau dibagu umui na kara namo ai o honumu, diari ai o honuhonu daemu, hesisiba heheni na mai dibamui.
15 Taunabunai, mai goadagu ida na tore henimuimu, ihahelalolaimui totona, Dirava ese e henigu hariharina dainai.
16 Lau be Keriso Iesu ena hesiai taugu, bese idau-idau ediai; Dirava ena sivarai namo na harorolaiamu, bena Lauma Helaḡa ena hahelaḡa dainai bese idau-idau na boubou ḡaudia namodia ai baela.
17 Dirava ena ḡaukara na karaiamu bona na heaḡilaiamu, Iesu Keriso bagunai.
18 Keriso ena ḡaukara idaudia haida basina herevalai; a lau daigu ai bese idau-idau taudia vada e kamonai, bona edia kamonai amo hereva bona kara vada e vara, una mo na herevalaiamu.
19 Toa bona hoa karadia danu vada eme hedinarai, Dirava ena Lauma ena siahu dainai; taunabunai Ierusalem amo ela bona Iluriko, Keriso ena sivarai namo vada na harorolaia ḡuḡuru.
20 Egu lalo-hadai tamona binai: sivarai namo baina harorolaia, Keriso ladana do asie hatoamu gabudia ai. Asina uramu ta ena du latadiai egu ruma baina haginia.
21 Buka ai e torea heḡereḡerena eto,
Asie hadibalaidia taudia na bae ita,
Bona sivaraina asie kamonai taudia na bae diba.
22 Una dainai vada name helao ahu, asina vasi itamui ema bona hari.
23 A harihari lau na asi egu ḡaukara inikaha ai; bona laḡani hoho vada na ura bada baina vasi.
24 Taunabunai, Spania baina lao henia negana ai baina vasi; badina be na uramu egu laolao ai baina itamui, umui ida baita noho nega taina, bena dala ai ba hakaugu.
25 A ina harihari lau na Ierusalem ba laomu, helaḡa taudia ikahadia totona.
26 Badina be Makedonia bona Akaia taudia ese edia harihari ḡaudia vada e habou ogoḡami taudia Ierusalem ekalesiana ai edia.
27 Idia na unu e kara toma mai moaledia ida; e haeroa, idia na ima-doa taudia na heheto. Badina be lauma ḡaudia vada e abi; bena tau-ani ḡaudia ma bae heni lao eto.
28 Ina ḡaukara baina karaia vaitani, ina huahua baina henidia vaitani, bena baina vasi itamui, ma Spania bainala.
29 Lau dibagu danu, baina vasi negana ai Keriso ena hahenamo idoinai baina vasilaia.
30 Varavaragu e, na noimuimu, iseda Lohiabada Iesu Keriso bagunai bona Lauma ena uraheni bagunai, Dirava ba ḡuria goadagoada lau daigu ai, sibogu daigu ai na ḡuriḡurimu heḡereḡerena;
31 gwau-edeede taudia Iudea ai imadia amo baine hamaurigu, bona egu ḡaukara Ierusalem ai helaḡa taudia ese bae abia dae mai lalo-namodia ida.
32 Bena Dirava ena ura heḡereḡerena ai, lau baina vasi mai moalegu ida, bena baita hahealo heheni.
33 Maino Diravana ese aine bamomui. Amen.