16
Hahetoni herevadia
1 Ita taihuda Foibe e vasimu; ia na Kenkrea diakono hahinena ta.
2 Lohiabada bagunai bavabia dae, ani, helaḡa taudia o abidia daemu na heto; bona ena ḡaukara ai ba durua. Badina be ia ese hutuma vada e durudia; bona lau danu eme durugu.
3 Priskila bona Akula, Keriso Iesu bagunai lau ida a ḡaukara hebouva taudia, ba hanamodia.
4 Idia na lau daigu ai mokona e mase. Lau ese na hanamodiamu; a dia lau mo, bese idau-idau edia ekalesia oreadia iboudiai danu.
5 Bona edia ruma ai e heboumu oreana danu ba hanamodia.
Na lalokau heniamu tauna, Epaineto, danu ba hanamoa; ia na anina roboana Keriso ena, Asia ai.
6 Maria danu ba hanamoa; ia na umui daimui ai vada e hekwarahi bada.
7 Varavaragu Androniko bona Iunia danu ba hanamodia; idia be lau ida dibura rumana ai e koumai bou. Haridia na bada aposetolo taudia bogaragidiai. Idia danu Keriso ena orea lalonai e vareai guna, lau be gabe ai.
8 Amplia, Lohiabada bagunai na lalokau heniamu tauna,
9 bona Urebano, lau ida a ḡaukara hebouva tauna, bona Staku, egu lalokau tauna,
10 bona Apele, Keriso enai e gini tutukatutukamu tauna, iboudiai ba hanamodia.
Aristobulo ena ruma taudia ba hanamodia.
11 Varavaragu Herodion ba hanamoa. Narakiso ena ruma taudia ba hanamodia; idia na Lohiabada ena orea taudia.
12 Trufena bona Trufosa ba hanamodia; idia na Lohiabada ena orea hahinedia; Peresi, lalokau hahinena, ba hanamoa; ia na Lohiabada ena ḡaukara vada e heckwarahilaia.
13 Rufo, Lohiabada ese e abia hidi tauna, ba hanamoa; ia sinana danu, natuna ai e halaogu hahinena, ba hanamoa.
14 Asunukrito bona Flegon bona Hereme bona Patroba bona Herema, mai bamodia ida, ba hanamodia.
15 Filologo, bona Iulia, bona Nerea, mai taihuna ida, bona Olumupa, bona helaḡa taudia iboudiai idia ida e nohomu, ba hanamodia.
16 Ba hahenamo heheni; ba haherahu heheni. Keriso ena ekalesia oreadia iboudiai ese e hanamomuimu.
17 Varavaragu e, heai taudia bona hekwakwanai ihavaradia taudia nahuada ba toho. Hahediba herevadia vada a henimui na idia ese e tata utumu; edia amo ba raka ohu.
18 Taunimanima unuhetomadia na Keriso iseda Lohiabada isiaina asie lao henimu, a bogadia mo e lalomu; bona idia ese danu hereva manau bona ere namo amo asi dibadia taudia na e koidiamu.
19 A umui emui haheauka harina na taunimanima iboudiai ese vada e kamonai; taunabunai, lau na umui daimui ai na moalemu. To lau na uramu umui na ḡau namodia ai ba aunega, ḡau dikadia ai ba kavakava.
20 Asi vanahana Maino Diravana ese Satana baine moia patapata umui aemui henudiai. Iseda Lohiabada Iesu ena harihari-bada ese baine bamomui.
21 Timoteo, lau ida a ḡaukara heboumu tauna, bona varavaragu Luka bona Iason bona Sosipatro, hahaniosi ese e hanamomuimu.
22 Lau Teretio ese imagu amo ina revareva name torea: Lohiabada ladana ai na hanamomuimu.
23 Gaio, lauegu badiholo tauna bona ekalesia taudia iboudiai edia badiholo tauna, ese e hanamomuimu. Erasto, hanua monina inarina tauna, bona Koato, ekalesia tauna ta, ese danu e hanamomuimu.
24 Eda Lohiabada Iesu Keriso ena harihari-bada na iboumui ai emui ai baine mia. Amen.
25 Dirava aita hanamua, ia na mai goadana baine haginimui tutuka-tutuka, egu sivarai namo bona Iesu Keriso ena haroro herevadia heḡereḡeredia. Hereva hehunidia ihahedinaraidia heḡereḡerena danu, nega gunadia amo e hehuni,
26 a harihari vada eme hedinarai; noho hanaihanai Diravana ena hahegani dainai, peroveeta taudia edia buka ese bese loḡora ibuudiai vada e hadibalaidia, edia abidadama ihavarana.
27 Aonega Diravana tamona aita imodaia, Iesu Keriso bagunai; ia hairaina baine mia hanaihanai. Amen.