17
Absalom ese Ahitofel ena lalo-hadai e dadaraia
1 Ahitofel ese Absalom e hamaoroa, eto, Mani emu kara tatau gerebu-ta daha-rua aina abidia hidi, bena baina tore isi, hari hanuaboi ai David baina ḡavaia.
2 Bena tauna dounu e boeramu bona lalona dounu e metaumu ai baina lasia tao, bona baina hagaria; bena e bamoamu taudia iboudiai na bae heau. Hanua pavapavana mo sibona baina rahua mase;
3 a ena orea taudia iboudiai na dekemu baina hakaudia mai, headava matamata hahinena ese adavana enai e raka vareaimu na heto. Tau tamona ena mauri iabi-ohona dalana o tahuamu; bena taunimanima iboudiai na bae maino.
4 Una lalo-hadai na Absalom bona Israel tau-badadia iboudiai ese e moalelaia.
5 Bena Absalom eto, Husai tau Araki danu a boina, iena hereva baita kamonai.
6 Bena Husai na Absalom dekenai e kau negana ai, Absalom ese e nanadaia, eto, Ahitofel na unu ini e gwau tomamu; iena lalo-hadai heḡereḡerena baita karaia eiava? Bema lasi, oi na ba hereva.
7 Bena Husai ese Absalom e hamaoroa, eto, Ina nega ai Ahitofel ese vada e henimui lalo-hadaina na dia namo.
8 Husai ma eto, Oi dibamu, tamamu bona ena orea taudia na goada-herea taudia, bona e badu dikadikamu, bea hahinena tano paka ai haida ese natuna vada e dadidia oho na heto. Ina danu, tamamu na tuari mai dibana tauna; ia na ena orea taudia ida basine noho rani.
9 A laloa, ina harihan ia na guri ta ai eiava gabu ta ai vada e komumu. Bena tuari baine hematama negana ai haida bema keto, bae kamonai taudia na baeto Absalom murinai e rakamu taudia vada e mase oremu.
10 Bena goada-herea tauna, lalona na leona lalona na heto tauna, na gari ese baine butua tao; badina be Israel taudia iboudiai na dibadia tamamu na goada-herea tauna, bona ia e bamoamu taudia danu goada-herea taudia.
11 A lauegu lalo-hadai be Israel taudia iboudiai na oi dekemu bae hebou, Dan amo ela bona Bere-sieba; bae hutuma kone mirina na heto. Bena oi danu tuari baola.
12 Taunabunai ita ese ia e nohomu gabuna ai baita lasia tao, bona latanai baita diho hunu tano latanai e dihomu na heto; bena ia bona e bamoamu taudia iboudiai na tau ta basine mauri.
13 A bema hanua ta ai baine raka vareai, Israel taudia iboudiai na kwanau bae laohai, una hanua na baita veria dobi, ela bona koura lalonai, ela bona ia nadina momoruna ta basine mia.
14 Bena Absalom bona Israel taudia iboudiai eto, Husai tau Araki ena lalo-hadai ese Ahitofel ena lalo-hadai na e hereaiamu. Badina be Iehova ese dalana vada e lailaia Ahitofel ena lalo-hadai namona baine hadarerea, Iehova ese Absalom baine hadikaia helaoreana.
15 Bena Husai ese hahelaḡa taudia Sadok bona Abiatara e hamaorodia, eto, Ahitofel ena lalo-hadai Absalom bona Israel tau-badadia e henidia na unu ini e hamaorodia toma, a Iauegu lalo-hadai na henidia na unu ini na hamaorodia toma.
16 Taunabunai, hereva ba siaia haraḡa, David ba hamaoroa, baoto “Hari ina hanuaboi tano ḡaḡaena ena turu-hanai gabudia badibadidiai basio noho, a ba hanai vaitani, hanua pavapavana bona e bamoarnu taudia iboudiai bae hadonodia ore na garina”.
17 Una negana ai Ionatan bona Ahimasa na En-rogele ai e nariva; hesiai kekenina ta vaevae e laova, hereva e henidiava, bena idia ese King David e hamaoroa laova; badina be idia na hanua badana ai raka-vareaidia ai bae itadia na garina.
18 A mero ta ese e itadia, bena ia ese Absalom e hamaoroa; taunabunai raruosi na e raka oho haraḡa, Bahurimi ela, tau ta ena ruma ai e kau. Una tau na mai ena ranu gurina ta, ena maḡu lalonai; bena raruosi na ranu gurina ai e diho.
19 Bena ruma hahinena na ranu gurina e koua ahu, bena latanai uit nadinadidia e ḡiḡi eva-eva. Una kara na tau ta asi dibana.
20 Bena Absalom ena hesiai taudia na una ruma ai e dae kau; bena idia ese hahine na e nanadaia, eto, Ahimasa bona Ionatan na edeseni ai? Han hahine ese e haere henidia, eto, Sinavai maragina amo e turu hanai. Bena e tahudia, to asie davaridia; bena Ierusalem e lou lao.
21 Vada e raka oho murinai, idia raruosi na ranu gurina amo e dae; bena ela, King David e hamaoroa. Idia ese David e hamaoroa, eto, A tore isi, sinavai ba hanaia haraḡa; badina be Ahitofel ese oi ihadikamu dalana na unu ini e gwau tomamu.
22 Bena David bona e bamoava taudia iboudiai na e tore isi, Ioridane sinavaina e hanaia. Daba ai, iboudiai vada e hanai, ta se noho.
23 Ahitofel vada e diba iena lalo-hadai na asie abia dae, bena ena doniki e abia, ena hanua korikori e lou lao. Ena kohu iboudiai e atodia namonamo bena sibona e hemata. E mase; bena tamana ena gara ai e guria.
David na Mahanaim ai
24 David na Mahanaim ai e kau. Bena Absalom ese Ioridane sinavaina e hanaia, Israel taudia iboudiai ida.
25 Absalom ese Amasa vada e gwauraia, tuari oreana baine biagua, Ioab gabuna ai. Hari Amasa na Ismael tauna ta, ladana Itira, natuna; adavana na Abigail Nahasa, Ioab sinana Seruia tadina.
26 Israel taudia bona Absalom na Gilead tanona ai e taruha.
27 David na Mahanaim ai e kau negana ai, Sobi Nahasa, tau Amono, na Raba amo, bona Makiri Amiele na Lo-debara amo, bona Barasilai, tau Gilead, na Rogelim amo,
28 mahuta ḡaudia bona nau bona uro e mailaidia; bona uit, bali, flaoa, uit kakorodia, bini, lentils,
29 bada ranuna, butter, mamoe, bona cheese, boromakau ratana amo e karaia ḡauna, danu. E mailaidia David ana bona ia e bamoava taudia adia; badina be idia na eto, Ini taunimanima na tano ḡaḡaena ai e hitolodiamu, taudia e boeramu, bona e ranu masemu danu.