16
1 David ese ororo dorina taina e rakaia hanai, bena ia na Siba, Mefiboset ena hesiai tauna, ida e hedavari. Hari Siba ese doniki rua e hakaudia, edia maduna na flaoa igabu sinahu-rua, vine huahuadia kaukaudia tako sinahu-ta, au huahuadia idau-idau sinahu-ta, bona vine ranuna kopi ta.
2 Bena hanua pavapavana ese Siba e nanadaia, eto, Dahaka dainai ini ḡau vada o mailai. Siba e haere, eto, Doniki na hanua pavapavana ena ruma taudia edia gui ḡaudia; flaoa bona au huahuadia na eregabe taudia adia; vine ranuna na tano gaḡaena ai bae manori taudia ese bae inua.
3 Hanua pavapavana eto, Biagumu natuna be edeseni ai? Siba ese hanua pavapavana e haere henia, eto, Ia na Ierusalem ai e nohomu; badina be ia na eto “Hari dina ai Israel taudia ese tamagu ena basileia na ma bae henigu lou”.
4 Bena hanua pavapavana ese Siba e hamaoroa, eto, A kamonai, Mefiboset ena ḡau iboudiai harihari na oiemu. Siba eto, Lau na na toma henimu dihomu. Egu lohia bona egu pavapava, ba lalo namo henigu hanaihanai.
5 King David na Bahurimi ai e kau, bena Saulo varavarana ta unuseni ai, ladana Simei Gera, na e raka lasi; rakana ai ia na e heuduguirai havara havara.
6 Bena ia ese David na nadi amo e hodoa, bona King David ena hesiai taudia iboudiai danu e hododia. Hanua taudia iboudiai bona tuari taudia iboudiai na David idibana kahana ai bona laurina kahana ai e gini.
7 Bena Simei e uduguirai henia, eto, Rara ihahebubuna taumu, asi emu kara namona ta taumu, a raka oho, a raka oho.
8 Iehova ese Saulo, dagina o abia tauna, mai ena iduhu taudia ida raradia davadia idoinai na oiemu amo vada e abia; bona Iehova ese basileia na natumu Absalom imana ai vada e atoa. A itaia, emu dika na vada latamu ai vada e kau; badina be oi na rara ihahebubuna tauna.
9 Bena Abisai Seruia ese hanua pavapavana e hereva henia, eto, Dahaka dainai ina sisia masena ese egu lohia bona egu pavapava e uduguiraimumu? Mani ainala, kwarana baina utua oho.
10 A hanua pavapavana eto, Seruia natuna e, lau oiemu ai be dahaka? Bema ia na e heuduguiraimu badina be Iehova ese vada e haḡania, eto “David ba uduguiraia”, bena daika baineto “Dahaka dainai unu o kara tomamu?”
11 Bena David ese Abisai bona ena hesiai taudia iboudiai e hamaorodia, eto, A itaia, natugu korikori ese lauegu mauri baine abia oho e tomamu; o, ina Beniamina iduhuna tauna ese egu mauri iabi-ohona basine ura badabada a? Aine noho, baine heuduguirai; badina be Iehova ese vada e haḡania.
12 A reana Iehova ese egu hisihisi baine itaia, bena hari dina ai Iehova ese dava namona ta baine henigu, ina heuduguirai davana.
13 Taunabunai David mai ena orea taudia ida na dala amo e raka, a Simei na ororo gabaena ai e raka, ia hegaga-hehenina ai, bena rakana ai e heuduguirai, bona nadi amo e hodoa, bona ḡahu e tahoa.
14 Bena hanua pavapavana mai bamona iboudiai ida na Ioridane sinavaina ai e kau, taudia na boboera. Unuseni ai laḡana e ania.
Absalom na Ierusalem ai
15 Absalom bona Israel taudia iboudiai na Ierusalem ai e kau, Ahitofel danu ia ida.
16 Bena Husai, tau Araki, David turana, na Absalom dekena ela. Bena Husai ese Absalom e hamaoroa, eto, Hanua pavapavana ena mauri baine daudau! Hanua pavapavana ena mauri baine daudau!
17 Bena Absalom ese Husai e hamaoroa, eto, Turamu enai emu heabidadama binai a? Dahaka dainai turamu ida asiola?
18 Husai ese Absalom e haere henia, eto, Lasi badina be Iehova bona ini taunimanima bona Israel taudia iboudiai ese vada e abia hidi tauna na lau ese danu baina abia dae, bona ia dekenai baina noho.
19 Bona ina danu, daika isiaina baina lao heni? Ia natuna, ani? Tamamu isiaina na lao heniva heḡereḡerena, oi isiaimu danu baina lao heni.
20 Bena Absalom ese Ahitofel e hamaoroa, eto, Emu lalo-hadai a gvvaurai, ede baita kara toma?
21 Ahitofel ese Absalom e haere henia, eto, Tamamu e adavadia hahinedia, ruma inarina totona e rakatanidia, na dekediai ba raka vareai; bena Israel taudia iboudiai bae kamonai, oi ese tamamu lalona vada o hadikaia emu ai, bena emu ai e taomu taudia iboudiai na imadia bae ha-aukadia.
22 Taunabunai, idia ese kalaga auta na ruma guhina latanai e haginia, Absalom ena; bena Absalom na tamana ese e adavadia hahinedia dekediai e raka vareai, Israel taudia iboudiai vairadiai.
23 Unu dinadia ai Ahitofel ena lalo-hadai e gwaurai na e kara Dirava ena hereva na heto. David bona Absalom ese Ahitofel ena lalo-hadai iboudiai na unu e abidia dae tomava.