20
Ioab ese Amasa e alaia
1 Kara-kava kara-kava tauna ta e nohova, ladana na Sieba Bikri, Beniamina tauna ta. Ia ese kibi e hiriria, bena eto,
Ita na asi ahuda David enai,
Asi ahuda ta Iese natuna enai.
Israel e, ta ta ena kalaga ena kalaga a lou heni.
2 Taunabunai, Israel taudia iboudiai ese David e rakatania, Sieba Bikri murina amo ela; a Iuda taudia ese edia hanua pavapavana e ḡavaia, Ioridane sinavaina amo ela bona Ierusalem.
3 David na ena ruma ai e kau, Ierusalem ai; bena hanua pavapavana ese e adavadia hahinedia gwautaosi, hari ruma inarina totona e rakatanidia hahinedia, na e abidia, ruma ta ai e koudia ahu mai igimadia; unuseni ai e ubudia, a dekediai se raka vareai. Taunabunai idia na e hekou ahu, e nohova vabu na heheto, ela bona e mase.
4 Bena hanua pavapavana ese Amasa e hamaoroa, eto, Iuda taudia ba boiridia, dina toi do basie ore idia na lau dekegu ai bae hebou iniseni ai, bona oi danu baoma.
5 Taunabunai, Amasa na Iuda taudia iboiridia ela, to e halahe, vada e gwauraia hamata dinadia ai se lou mai.
6 Bena David ese Abisai e hamaoroa, eto, Absalom ese e hadikada maraḡi, a hari Sieba Bikri ese baine hadikada bada. Emu lohia ena hesiai taudia bavabidia, ia ba ḡavaia, hanua mai magudia haida baine abidia bena baine hahekwarahida na garina.
7 Bena Ioab bona Kerete taudia bona Pelete taudia bona goada taudia iboudiai na Abisai murinai ela; Ierusalem amo e raka lasi, Sieba Bikri bae hahavaia totona.
8 Nadi-bada Gibeon ai enai e kau negana ai, Amasa na ema, idia ida e hedavari. Ioab ese tuari dabuana e hahedokilaia, Iatanai dare mai iudalaina ḡauna mai varona ida na gabana ai e ḡeḡea; bena rakana ai dare na iudalaina ḡauna amo e moru.
9 Bena Ioab ese Amasa e hereva henia, eto, Tadigu, oi namo a? Bena Ioab ese imana idibana amo Amasa aukina huina e abia, baine harahua totona.
10 A Amasa na dare se itaia, Ioab imana ai. Taunabunai, Ioab ese ia bogana e gwadaia, bona bogarauna na tano ai e heḡiḡi dobi; ma se gwadaia harua. A tau na e mase.
Bena Ioab bona tadina Abisai ese Sieba Bikri ma e hahavaia.
11 A Ioab ena orea tauna ta ese Amasa badibadinai e gini, eto, Daika ese Ioab bona David e lalo namo henidiamu, ia na Ioab murina amo baine raka.
12 Hari Amasa na sibona rarana lalonai e hekure, laolao dalana ai; raka-hanai taudia na e itaia, bena e gini. Bena una tau ese e itadia, idia na vada e gini, bena ia ese Amasa e abia, laolao dalana amo e huaia lao, rei lalonai e atoa, bena dabua amo e tarua ahu.
13 Laolao dalana amo vada e abia oho murinai, taunimanima iboudiai na Ioab murina amo ela, Sieba Bikri e hahavaia.
Sieba e mase
14 Sieba na Israel iduhudia iboudiai bogaragidia amo e raka hanai ela bona Abele, Bete-maka kahana hanuana ta; bena Bikri ena taunimanima iboudiai e hebou, ia murina amo ela, hanua lalonai e didi vareai.
15 Bena Ioab ena orea idoinai ema, Sieba e koua ahu, Abele, Bete-maka hanuana, lalonai. Bena tano e senua hanua vairanai, hanua maḡuna hegaga-hehenina ai, bena maḡu iḡiḡi-dobina ai e gugu mase.
16 Bena aonega hahinena ta hanua lalona amo e boiboi, eto, A kamonai, a kamonai; Ioab a hamaoroa, aine raka mai, baina hereva henia.
17 Ioab na dekena e raka kahi lao, bena hahine na eto, Oi na Ioab a? Ia na e haere, eto, Oibe. Bena hahine ese e hereva henia, eto, Emu hesiai hahinena egu hereva ba kamonai. Ia na e haere, eto, Na hakalamu.
18 Hahine na eto, Sene negadia ai ini e gwau tomava “Abele ai lalo-hadai namona ba tahua”, bena unu e kara tomava.
19 Lau be maino bona heabidadama Israel ai e badinadiamu taudia ta; a oi na Israel hanuana gunana ta ihabua-tarina dalana o tahuamu. Dahaka dainai Iehova ahuna ba hadonoa?
20 Ioab e haere, eto, Unu asina ura tomamu, asina uramu ḡau ta baina hadonoa eiava baina habuaia tari.
21 Una na koikoi. A tau ta Efraim ororodia amo, ladana Sieba Bikri, ese King David vada e tuan henia; ia mo sibona ba henigu, bena hanua amo baina raka oho. Una hahine ese Ioab e hamaoroa, eto, Benaini, ia kwarana na magu amo baia tahoa hanai emu ai.
22 Bena hahine ese hanua taudia iboudiai dekedia ela, mai aonegana ida e hereva henidia. Bena idia ese Sieba Bikri kwarana e utua oho, e tahoa lasi Ioab enai. Taunabunai, ia ese kibi e hiriria, bena idia na una hanua amo e raka oho, ta ta ena hanua ena hanua ela. Bena Ioab na Ierusalem e lou lao, hanua pavapavana dekena ela.
David ena heitatao taudia
23 Ioab ese Israel tuari oreana idoinai e biaguava; Benaia Iehoiada ese Kerete taudia bona Pelete taudia e biagudiava;
24 Adorama ese e haḡaukaradiava taudia na e biagudiava. Iehosafat Ahilud na e tore pepadia inaridia tau;
25 Seva na toretore tauna; Sadok bona Abiatara na hahelaḡa taudia;
26 bona Ira, tau lairi, na David ena hahelaḡa tauna danu.