4
ሳሎ የዝ ጎይኖ
1 የይፕ ጉየ፥ ታኒ በኤዛ፥ ሳሎ ዶይንቴዝ ፐንገ የዛ። ማ ታ ቲና ስኤዝ ቱልቱሎ ግርስ ጋርከዛይ ታኮ፥ «Ꮊንካ ከዞባ፤ Ꮊይፕ ጉየ፥ ሀኖዳይስ የዛ ባዝ ታ ነና ቤዞዳ» ዬጌዛ።
2 የ ዎደ ታ አያናር ኩሚ የዛ። ይኬ፥ ሳሎ ዙፋነ ታ በኤዛ ዙፋናይል አፋ ፐታ በቴዛና በኤዛ።
3 የ በቴዛይ ማላይ እያስጰደኔ ሳርድዮና ግዝ አልኦ ሹቻይጋርከ። ኤ ዙፋናይ ዩሻይድ አልኦ መርገደ ሹች ኣዝዝ ዙላይ የዛ።
4 የ ዙፋናይ ዩሻይድ ላታማኔ ኦይዲ ዙፋንታይ የዛ፤ ኡንታል አፋ ቦꬅ ማኦ ማኢ፥ ኦማል ዎርቃ ዛዉደ ጋዴዝ ላታማኔ ኦይዲ ጭምታይ በቴዛ።
5 ዙፋናይፕ ዜልንꬅ፥ ዳዳ ጉምꬅኔ ሳርꬃ ከዝዛ። ዙፋነ ቲና ላፑን ፖእዛ ታማ ጾምፕታይ የዛ፤ ኡንቲ ላፑን ጾስ አያንታ።
6 ዙፋናይ ቲና ብርለ ኣዝዛ ፎጭዝ ቡርጩኮ አባይ የዛ።
ቲናራኔ ጉየር ኣፈ ኩሜዝ ሸምፖር የዝ ኦይዲ መትꬅታይ ዙፋናይ ዩሻይራኔ ዙፋናይ ጋንጨ የዛ።
7 ቲና መትꬃይ ጋሞ ኣዝዛ፤ ናምእንꬃይ ገማተ ኣዝዛ፤ ሃይꬓንꬃይ ቲናይር አስ ኣዝዛ፤ ማ ኦይድንꬃይ ፕራꬍዛ አንኮ ኣዝዛ።
8 ኦይዲ መተꬅታይ ፐታይስ ፐታይስ ኡሱፑን ቀፍታይ የዛ፤ የ ቀፍታይ አፋ ባጋራኔ ኦሞ ባጋር ኣፈ ኩሜዛ። ኡንቲ ቃማኔ ጋላስ ጋቼካዛር፥
«ጌሻዮ፥ ጌሻዮ፥ ጌሻዮ፥
ጎዳዮ፥ ኡባ ሃርዛ ጾሳዮ፥
ብንካ፥ Ꮊተካ የዛዮ፥ ቲናፕ የኦዳዮ»
ዬግዛ።
9 የ መተꬅታይ ዙፋናይል በቴዛይኔ መꬍናስ የዛይስ ሳባ፥ ቦንቾኔ ጋላታ እንጌዝ ዎደ
10 ላታማኔ ኦይዲ ጭምታይ ዙፋነል በቴዛኔ መꬍናስ የዛይ ቲና ጹጉኒ ጎይኔዛ፤ ፋ ዛዉደ ዙፋናይ ቲና ጋዲ፥
11 «ኑ ጎዳዮ፥ ኑ ጾሳዮ፥
ኔኒ ኡባ መꬌዛ፤
ኡባ ባዝ ነ ሸነ ጋርክ ሀኔዛይ ጋርክ
ኔኒ ቦንቾ፥ ቴማኔ ዎልቃ ኤኮዳይስ ቤዝዛ»
ዬጌዛ።