5
ዱራኔ ማጻፍቶ
1 የይፕ ጉየ፥ ዙፋናይል አፋ በቴዛይ ኡሻች ኩሻይድ ጋንጨራኔ አፋር ጻፍንቲ ላፑን ማታመር ጎርድንቴዝ ጻꬅ ማጻፍቶ ታ በኤዛ።
2 ፐቲ ምኖ ኪታንቻይ ፋ ቃላ ꬎቅ ኡዲ፥ «ማታማ ብሎዳይስኔ ማጻፍቶ ዶዮዳይስ ቤዝዛይ ኦኖ?» ዬጊ አዋጆዳር በኤዛ።
3 ዝን ሳሎ ማቅን ሳአ ዎይ ሳአፕ ኦሞ ማቅን የ ጻꬅ ማጻፍቶ ዶዮዳይስኔ ጋንጫ በአዳይስ ዳንዳኤዝ ኦንካ ባያ።
4 ጻꬅ ማጻፍቶ ዶዮዳይስኔ እ ጋንጫ በአዳይስ ቤዝዛ አስ ꬋቤዝ ግሾስ ታ ኢታ ዬኬዛ።
5 የ ዎደ፥ ጭምታይፕ ፐታይ ታኮ፥ «ዬክፐ! ይሁዳ ዘረꬅ ማቄዝ ጋማይ፥ ዳዉተ ሼሻይ፥ ላፑን ማታምታ ብሎዳይስኔ ማጻፍቶ ዶዮዳይስ ዳንዳኤዛ» ዬጌዛ።
6 የይፕ ጉየ፥ ዙፋናይል ኦይዲ መተꬅታይስኔ ጭምታይስ ጋንጨ፥ ሹክንቴዝ ዱር ጋርክ ኤቄዛና ታ በኤዛ። ኤስ ላፑን ካጭታይኔ ላፑን ኣፍታይ የዛ። የይትታይ ሳአ ኡባይል ኪትንቴዝ ጾስ አያና ላፑንታ።
7 የ ዱራይ ይኢ፥ ዙፋናይል አፋ በቴዛይ ኡሻች ኩሸፕ ጻꬅ ማጻፍቶ ኤኬዛ።
8 ኤ የ ጻꬅ ማጻፍቶ ኤኬዝ ዎደ ኦይዲ መትꬅታይኔ ላታማኔ ኦይዲ ጭምታይ ዱራይ ቲናይድ ጉጲንጌዛ። ኡንቲ ፐታይ ፐታይ ዲꬅኔ ጌሽታይ ዎሳ ማቄዝ እጻኔ ኩሜዝ ዎርቃ ሻተ አይኬዛ።
9 ኡንቲ፥
«ጻꬅ ማጻፍቶ ኤኮዳይስ፥
ማታመ ብልኦዳይስ ኔስ ቤዝዛ።
አብስ ጊኮ፥ ኔኒ ሹክንቴዛያ፤
ዘረꬅ ኡባይፕ፥ ዱማ ዱማ ዶናፕ፥
ያርታይፐኔ ካተትꬅ ኡባይፕ፥
ነ ሱꬃይር ጾሳይስ ዎዜዛ።
10 ኑ ጾሳይስ ካተትꬅኔ ቄሰ ማቃዳይ ጋርክ ኡዴዛ
ኡንቲ ቢታል አፋ ካዉቶዳ።
ኡንትካ ጋደ ኡባ ሞዶዳይ»
ዬጊ ኦሮꬅ ማዝሙረ የጼዛ።
11 ታ በአዳር ዙፋናይ፥ ኦይዲ መትꬅታይኔ ጭምታይ ዩሻይድ ጋመ ኪታንችታይ የዛ። ኡ ጋመትꬃይ ሙኩሎ ቶኬ ሙኩሎኔ ታጲ ሙኩሎ ቶኬ ታጲ ሙኩሎ ማቄዝ ጊርꬃ ስኤዛ።
12 የ ኪታንችታይ ꬎቅ ጌዝ ቃላር፥
«ሹክንቴዝ ዱራይ ዎልቃ፥ ዱረትꬂ፥
ኤጨትꬅኔ ምኖትꬂ፥ ቦንቾ፥ ሳባኔ
አንጆ ኤኮዳይስ ቤዝዛ»
ዬጌዛ።
13 የይፕ ጉየ፥ ሳአ፥ ሳሎ፥ ሳአፕ ኦሞራኔ አባ ጋንጨ የዝ መትꬂ ኡባይ፥
«ዙፋነል አፋ በቴዛይስኔ ዱራይስ፥
ጋላታ፥ ቦንቾ፥ ሳባኔ ዎልቃ
መꬊፐ መꬍናስ ማቆ»
ዬጊ የጾዳር ስኤዛ።
14 ኦይዲ መትꬅታይካ፥ «አምንኤ» ዬጌዛ፤ ማ ጭምታይካ ጹጉኒ ጎይኔዛ።