17
To̱ꞌon yóꞌo káꞌa̱n ña xa̱ꞌa̱ ña ndu̱kú ta̱Jesús no̱o̱ Ndios
1 Ta ndi̱ꞌi nda̱to̱ꞌon ra ñayóꞌo xíꞌin naxíka xíꞌin ra, ta saá ta̱Jesús na̱koto ndaa ra ñoyívi ni̱no, ta ni̱ka̱ꞌa̱n ra xíꞌin Ndios, káchí ra saá:
―Tata Yivá i̱, xa ki̱xaa̱ mi̱i ki̱vi̱ káꞌno ní. Ta vitin yi̱ꞌi̱, ta̱a ta̱ kúu Sa̱ꞌya ún, ndúkú i̱ no̱o̱ ún ña chinóo síkón ún ñato̱ꞌó i̱ no̱o̱ ni̱vi. Ñava̱ꞌa yóꞌo ndúkú i̱ no̱o̱ ún xa̱ꞌa̱ ña chinóo síkón i̱ ñato̱ꞌó mi̱i ún no̱o̱ ni̱vi.
2 Yóꞌó kúu ta̱a ta̱ ta̱xi nda̱yí ndaꞌa̱ yi̱ꞌi̱ ña kuu i̱ ta̱a ta̱káꞌno no̱o̱ ndiꞌi ni̱vi, xa̱ꞌa̱ ña taxi i̱ ndiꞌi saá ki̱vi̱ kutaku̱ ndinoꞌo ndiꞌi ni̱vi na kúu na ta̱xi ún ndaꞌa̱ i̱.
3 Yóꞌó kúu ñii la̱á Ndios ndinoꞌo, ta yi̱ꞌi̱ kúu Jesucristo, ta̱a ta̱ ti̱ꞌví ún ki̱xaa̱ i̱ ñoyívi yóꞌo ña saka̱ku i̱ ni̱vi. Ta saá tá to̱nda̱a ni̱vi koni̱ ndixa na yóꞌó, ta koni̱ ndixa na yi̱ꞌi̱ Jesucristo, ta ña ke̱ꞌé na saá kúu ña táxi kutaku̱ ndinoꞌo ni̱vi ndiꞌi saá ki̱vi̱.
4 ’Ta vitin xa ki̱sa ndivi i̱ ndiꞌi chiño ña ta̱xi ún ndaꞌa̱ i̱, ta xa̱ꞌa̱ ñayóꞌo kua̱ꞌa̱ ní ni̱vi kasa káꞌno ní na yóꞌó.
5 Ta vitin, Tata Yivá i̱, chinóo síkón ún ñato̱ꞌó i̱ no̱o̱ mi̱i ún. Ñii ki̱ꞌva nda̱tán ni̱xi̱yo síkón ñato̱ꞌó i̱ ki̱vi̱ xi̱taku̱ i̱ xíꞌin ún ñoyívi ni̱no siꞌna tá o̱n ta̱ꞌán ka̱ kuva̱ꞌa ñoyívi yóꞌo, saá ná koo ña.
6 ’Ni̱vi na ta̱xi ún ndaꞌa̱ i̱ ña kundiko̱n na yi̱ꞌi̱, ta sa̱náꞌa va̱ꞌa i̱ nayóꞌo ña kunda̱a̱ ini na xa̱ꞌa̱ ún. Ni̱vi na na̱ka̱xin ún kúu na, ta ta̱xi ún na ndaꞌa̱ i̱ ña kundiko̱n na yi̱ꞌi̱, ta ndixa chi̱kaa̱ so̱ꞌo na to̱ꞌon ún.
7 Ta vitin ni̱vi yóꞌo kúnda̱a̱ ini na ndí ndiꞌi ña ta̱xi ún ndaꞌa̱ i̱ kúu ña va̱xi no̱o̱ mi̱i ún,
8 chi ni̱ka̱ꞌa̱n i̱ xíꞌin na ndiꞌi to̱ꞌon ña ta̱xi ún ña ndato̱ꞌon i̱ xíꞌin na. Ta ndiꞌi to̱ꞌon yóꞌo na̱kiꞌin va̱ꞌa na ña, ta xa ku̱nda̱a̱ ini na ndí ndixa yi̱ꞌi̱ ke̱e i̱ no̱o̱ ún, ta kándixa na ndí yóꞌó kúu ta̱a ta̱ ti̱ꞌví yi̱ꞌi̱ ki̱xaa̱ i̱ ñoyívi yóꞌo.
9 ’Xa̱ꞌa̱ ni̱vi yóꞌo na ndíko̱n yi̱ꞌi̱ ndúkú i̱ no̱o̱ ún, ta o̱n vása ndúkú i̱ no̱o̱ ún xa̱ꞌa̱ ni̱vi na ndíko̱n yichi̱ o̱n váꞌa ñoyívi yóꞌo. Ndúkú i̱ no̱o̱ ún xa̱ꞌa̱ ni̱vi na ta̱xi ún ndaꞌa̱ i̱, chi ni̱vi na na̱ka̱xin mi̱i ún kúu nayóꞌo.
10 Chi ndiꞌi ni̱vi na ndíko̱n yi̱ꞌi̱ kúu na ndíko̱n yóꞌó, ta ndiꞌi ni̱vi na ndíko̱n yóꞌó kúu na ndíko̱n yi̱ꞌi̱. Xa̱ꞌa̱ ña kéꞌé nayóꞌo kúu ña kánóo síkón ñato̱ꞌó i̱.
11 ’Ta yi̱ꞌi̱, o̱n kóo ka̱ i̱ ñoyívi yóꞌo, chi saloꞌo ki̱vi̱ kúma̱ni̱ ta ndikó i̱ noꞌo̱ i̱ no̱o̱ mi̱i ún ñoyívi ni̱no, ta ni̱vi na ndíko̱n yi̱ꞌi̱ kundo̱o ka̱ na ñoyívi yóꞌo. Tata Yivá i̱, ta̱a ta̱ kúu ta̱ ndinoꞌo yi̱i̱, xáku ndáꞌví i̱ no̱o̱ ún ña xíꞌin nda̱yí ki̱vi̱ ún kundaa va̱ꞌa ún ni̱vi na ta̱xi ún ndaꞌa̱ i̱. Kundaa va̱ꞌa ún nayóꞌo xa̱ꞌa̱ ña ñii kuu na. Ñii ki̱ꞌva nda̱tán ñii kúu mi̱i yó, saá ná kuu nayóꞌo.
12 Ta ki̱vi̱ ni̱xi̱yo i̱ xíꞌin ni̱vi na ndíko̱n sa̱ta̱ i̱ ñoyívi yóꞌo, ta ndiꞌi saá ki̱vi̱ xi̱ndaa i̱ nayóꞌo na kúu na ta̱xi ún ndaꞌa̱ i̱. Ta xíꞌin nda̱yí ki̱vi̱ ún xi̱ndaa i̱ na, ta saá nda̱ ñii nayóꞌo ni̱‑ndañóꞌó na no̱o̱ i̱. Ndasaá kuiti ta̱a ta̱ ndíko̱n yichi̱ ñandiva̱ꞌa kúu ta̱a ta̱ nda̱ñóꞌó no̱o̱ i̱. Saá ni̱xi̱yo xa̱ꞌa̱ ña kundivi to̱ꞌon mi̱i ún ña ni̱taa na xi̱na̱ꞌá xa̱ꞌa̱ ta̱yóꞌo.
13 ’Vitin ndikó i̱ xaa̱ i̱ no̱o̱ ún, Tata Yivá i̱. Ta ña yóo ka̱ i̱ ñoyívi yóꞌo, káꞌa̱n i̱ to̱ꞌon yóꞌo ña koni̱ so̱ꞌo ni̱vi na ndíko̱n yi̱ꞌi̱ ña kusii̱ ini na. Nda̱tán ñii ki̱ꞌva chútú ini i̱ xíꞌin ñasi̱i̱, saá ná kutú ñasi̱i̱ ini nayóꞌo.
14 Xa nda̱to̱ꞌon i̱ to̱ꞌon ún xíꞌin nayóꞌo na kúu na ndíko̱n yi̱ꞌi̱. Ta ni̱vi na ndíko̱n yichi̱ ñoyívi yóꞌo sáa̱ ini na xíni na nayóꞌo, saá chi ni̱vi na ndíko̱n yi̱ꞌi̱ o̱n vása ñii yóo yuꞌú na xíꞌin ni̱vi na ndíko̱n yichi̱ o̱n váꞌa ñoyívi yóꞌo. Ta ñii ki̱ꞌva saá yi̱ꞌi̱, o̱n vása ñii yóo yuꞌú i̱ xíꞌin ni̱vi na ndíko̱n yichi̱ o̱n váꞌa ñoyívi yóꞌo.
15 Ta o̱n vása ndúkú i̱ no̱o̱ ún ña tava ún ni̱vi na ndíko̱n yi̱ꞌi̱ ña sandakoo na ñoyívi yóꞌo, ta ndixa ndúkú i̱ no̱o̱ ún ña kundaa va̱ꞌa ún ni̱vi yóꞌo no̱o̱ ña o̱n váꞌa ndiꞌi ki̱vi̱ táku̱ ka̱ na ñoyívi yóꞌo.
16 Ni̱vi na ndíko̱n yi̱ꞌi̱ o̱n vása ndíko̱n na yichi̱ o̱n váꞌa ñoyívi yóꞌo, chi yi̱ꞌi̱ o̱n vása ndíko̱n i̱ yichi̱ o̱n váꞌa yóꞌo.
17 Tata Yivá i̱, chindeé ún nayóꞌo ña chikaa̱ so̱ꞌo na to̱ꞌon mi̱i ún ña kúu ña ndixa nda̱a̱, ta xíꞌin ñayóꞌo, ndasa ndii ún ini na.
18 Nda̱tán yóo ña ti̱ꞌví ún yi̱ꞌi̱ kasa ndivi i̱ chiño ña kóni ún ñoyívi yóꞌo, saá yóo ña tiꞌví i̱ ni̱vi na ndíko̱n yi̱ꞌi̱ ña kasa ndivi na chiño ña kóni ún ñoyívi yóꞌo.
19 Ta táxi ndinoꞌo xíꞌin mi̱i i̱ kasa ndivi i̱ ña kóni ún. Ta xa̱ꞌa̱ ña kéꞌé i̱ saá, na ndíko̱n yi̱ꞌi̱ nduu na ni̱vi na nataxi ndinoꞌo xíꞌin mi̱i ña kasa ndivi na ña kóni ún.
20 ’O̱n si̱ví ndasaá kuiti xa̱ꞌa̱ ni̱vi na ndíko̱n yi̱ꞌi̱ vitin kúu ña xáku ndáꞌví i̱ no̱o̱ ún, ta xáku ndáꞌví i̱ no̱o̱ ún xa̱ꞌa̱ ni̱vi na kundiko̱n yi̱ꞌi̱ ki̱vi̱ ña va̱xi, chi nayóꞌo kúu na kandixa to̱ꞌon ña ndato̱ꞌon na ndíko̱n yi̱ꞌi̱ vitin.
21 Xáku ndáꞌví i̱ no̱o̱ ún xa̱ꞌa̱ ndiꞌi ni̱vi na kundiko̱n yi̱ꞌi̱ ña chindeé ún na ña ñii kuu ndiꞌi na. Nda̱tán yóꞌó táku̱ ún ini mi̱i i̱, ta yi̱ꞌi̱ táku̱ i̱ ini mi̱i ún, ñii ki̱ꞌva saá kóni i̱ ndí ni̱vi yóꞌo kutaku̱ na ini mi̱i yó. Saá ná koo ña xa̱ꞌa̱ ña kunda̱a̱ ini ni̱vi ñoyívi yóꞌo ndí ndixa yóꞌó kúu ta̱a ta̱ ti̱ꞌví yi̱ꞌi̱ ki̱xaa̱ i̱ ñoyívi yóꞌo.
22 Mi̱i ñava̱ꞌa káꞌno ña ta̱xi ún ndaꞌa̱ i̱ kúu ñava̱ꞌa káꞌno táxi i̱ ndaꞌa̱ ni̱vi na ndíko̱n yi̱ꞌi̱ xa̱ꞌa̱ ña ñii kuu ndiꞌi na, ñii ki̱ꞌva nda̱tán ñii kúu mi̱i yó.
23 Chi yi̱ꞌi̱ kutaku̱ i̱ ini ni̱vi yóꞌo, nda̱tán yóꞌó táku̱ ún ini mi̱i i̱. Ta saá ñii nduu ini ndiꞌi yó, ta xa̱ꞌa̱ ñayóꞌo ni̱vi ñoyívi yóꞌo kunda̱a̱ ini na ndí yóꞌó kúu ta̱a ta̱ ti̱ꞌví yi̱ꞌi̱ ki̱xaa̱ i̱ ñoyívi yóꞌo, ta kunda̱a̱ ini na ndí ndixa ñii ki̱ꞌva nda̱tán kíꞌvi ini ún xíni ún yi̱ꞌi̱, saá kíꞌvi ini ún xíni ún ni̱vi na ndíko̱n yi̱ꞌi̱.
24 ’Tata Yivá i̱, ndúkú i̱ no̱o̱ ún xa̱ꞌa̱ ndiꞌi ni̱vi na ta̱xi ún ndaꞌa̱ i̱, chi kóni i̱ ña xaa̱ nayóꞌo kutaku̱ na xíꞌin i̱ ñoyívi ni̱no. Ndixa kóni i̱ ña koto na ñava̱ꞌa káꞌno ña livi yéꞌe ña kómí i̱ chi ta̱xi ún ñava̱ꞌa yóꞌo ndaꞌa̱ i̱. Saá ke̱ꞌé ún xíꞌin i̱, chi siꞌna tá o̱n ta̱ꞌán kuva̱ꞌa ñoyívi, ta xa kíꞌvi ini ún xíni ún yi̱ꞌi̱.
25 Tata Yivá i̱, yóꞌó kúu ta̱a ta̱ ndinoꞌo nda̱a̱. Vará ni̱vi na ndíko̱n yichi̱ o̱n váꞌa ñoyívi yóꞌo o̱n vása xíni̱ na yóꞌó, ta yi̱ꞌi̱ xíni̱ va̱ꞌa i̱ yóꞌó, ta ni̱vi na ndíko̱n sa̱ta̱ i̱ xíni̱ na ña ti̱ꞌví ún yi̱ꞌi̱ ki̱xaa̱ i̱ ñoyívi yóꞌo.
26 Xa sa̱náꞌa i̱ nayóꞌo ndiꞌi ña kúu ña xíni̱ ñóꞌó kunda̱a̱ ini na xa̱ꞌa̱ ún, ta o̱n vása sandakoo i̱ ña sanáꞌa i̱ na ndiꞌi ña xíni̱ ñóꞌó kunda̱a̱ ini na xa̱ꞌa̱ ún. Ta xa̱ꞌa̱ ñayóꞌo nda̱tán ñii ki̱ꞌva kíꞌvi ini ún xíni ún yi̱ꞌi̱, ñii ki̱ꞌva saá kukiꞌvi ini na koni táꞌan na. Ta saá tuku yi̱ꞌi̱ kutaku̱ i̱ ini na ―káchí ta̱Jesús xíꞌin Ndios.