8
Ndiso ra Jesuu tiñu cha iyo vaha tuhun chaa
1 Chehe cuu cha cati yu chihi ndo, vati vaha xaan iyo ra cuu sutu chihin yo vitin. Iyo xaan tu ndee ini chi ra, vati ndaa ra chiyo ndaha cuaha ra chahnu Ndioo iti siqui andivi.
2 Iti nuun ra Ndioo satiñu vaha ra, ta maan ra Ndioo savaha nu satiñu ra. Ñavi ñivi savaha chi chi.
3 Ndihi ra cuu sutu―ndiso ra tiñu, vati iyo cha cua cahni ra, ta cua samani ra chi ra Ndioo. Chacan cuu cha iyo cha cua samani tahan ra Jesuu chi ra.
4 Tu iyo ra ihya nu ñuhun ñuñivi ya, ña cua cuu ra sutu, vati iyo ra cuu sutu cuenda ñuhun ñuñivi, ta samani ra cuhva cati ley chahnu cha ni chaha ra Moisee.
5 Satiñu ra sutu ta ra, soco iin cuhva cha iyo iti siqui andivi cuu nu satiñu ra ta ra. Ñavi cha ndicha ndicha ndacu ra sutu ihya. Nu ni quechaha sandaa ra Moisee vehe sahma, ta cati tuhun ra Ndioo chi ra ti cua saha vaha ra cuenda, ta cua savaha ra ndihi cuhva iyo cuhva cha ni ndehe ra cha ni chahan ra siqui yucu, cati ra.
6 Vitin satiñu ra Jesuu tiñu vaha xaan ca, vati vaha xaan ca iyo tuhun chaa, ta maan ra ndiso tiñu cuenda chacan. Vaha ca tuhun can, vati vaha xaan ca iyo cuhva cha cati ra Ndioo nu quichi quivi cha cua savaha ra.
7 Cha tiso ndico ra Ndioo inga tuhun, vati ñavi cha vaha vaha cuu tuhun ni tiso xihna ra.
8 Ndehe ra Ndioo ti ña vaha ni savaha ñivi Israel iti chata. Chacan cuu cha cati tutu Ndioo ti:
Cati ra chahnu ti cua queta quivi,
ta cua tiso ra iin tuhun chaa chi ñivi Israel chi ñivi Judá.
9 Ña cua coo cha chaa cuhva cha ni chacoo
tuhun chahnu cha ni tiso ra chi ñivi
chahnu quivi cha ni tava ra chi ñi iti
ñuhun Egipto,
vati ña ni sacuinu ñi tuhun can.
Chacan cuu cha nacoo ra chi ñi.
10 Cua yaha quivi can,
ta sa cua tiso ra tuhun chaa chi ñivi Israel.
Chehe cuu tuhun chaa can.
Cua sacoto ra chi ñi yoso cuhva iyo tuhun cha cati tuhun ra chi ñi.
Anima ñi cua taa ra tuhun can.
Ndioo sacahnu ñi cua cuu ra,
ta ñivi ra cua cuu maan ñi.
11 Ña cua cuni chi cha cua sanahan ñi chi tahan ñi yoso cuhva iyo ra.
Ña cua cuni chi cha cua cati ñi chi tahan ñi ti cua nacoto ñi chi ra chahnu.
Ña cua savaha ñi chacan,
vati ndihi ñi cua nacoto vaha chihin ra.
Cua nacoto ndihi ñivi ndahvi chihin ra,
ta cua nacoto tahan ñivi cha iyo vaha chihin ra.
12 Cua cundahvi ini ra chi ñi,
vati cua cucahnu ini ra cha ndavaha ni savaha ñi.
Cua sanaan cuii ra cuati ni savaha ñi,
cati ra chahnu.
13 Cha cati ra Ndioo ti cua coo iin tuhun chaa. Chacan chito yo ti saxini ra ti ñahni ca yavi ndaa cha chahnu, ta yatin cua naan chacan, vati ñahni ca yavi ndaa chi.