6
Cumejtspoꞌo cudägøøgpoꞌo Jesús jim̱ ñøcxy mejyhawiimb. Mejtstuꞌu jaꞌa mejy xiøhaty Galilea møød Tiberias. Nämay Jesús hänajty pianøcxyii jäyaꞌayhajxy. Paady hänajty pianøcxyii coo hoy‑yagjuøøñäjatypä hänajty tøø yajcähxøꞌøgy, møød coo paꞌamjäyaꞌay hänajty tøø yajmøcpøcy. Mänit Jesúshajxy jim̱ wyiimbejty maa jaꞌa tuṉguhduumän møødä jiamiøødhajxy. Mänit hajxy jim̱ yhøxtaacy tuṉguhduum. Mäwiingoom̱b jaꞌa pascuaxøø hänajty, jaꞌa judíoshajxy yagjájtäbä. Mänit Jesús wyiinheeꞌppejty coo jäyaꞌay hänajty may pianøcxyii. Mänit Jesús jaꞌa Felipe ñämaayy:
―Maa jaꞌa caayyøøc hajxy nbáatämät coo yøꞌøyaꞌay hajxy nyajcáayyämät nämay.
Paadiä Jesús jaduhṉ miänaaṉ̃, yhuuc näꞌä mädiaꞌagyhixaam̱by hänajty waam̱bä Felipe hänajty yhadsowaꞌañ. Tøø Jesús hänajty hamdsoo wyiinmay nebiä jäyaꞌayhajxy hänajty yajcayaꞌañii. Mänitä Felipe yhadsooyy:
―Ni mejtsmägoꞌx denariojuy jaꞌa tsajcaagy quiaꞌa mädøyhádät, hoy hajxy tuꞌliiꞌxyjaty cu nja móoyyäm.
Andrés jaꞌa Jesús jaꞌa jiamiøød hänajty tuꞌug xiøhaty, jaꞌa Simón Pedro piuhyaꞌay. Mänitä Andrés jaꞌa Jesús ñämaayy:
―Chaadsä pigänaꞌc jaꞌa cebadatsajcaagy miøødä mägoox̱cä, møødä hacx metscä. Pero cab jaduhṉ miädøyhádät. Hix̱, majiäyaꞌay yøꞌøduhṉ.
10 Mänit Jesús miänaaṉ̃:
―Nämaꞌaw hajxy ween hajxy yhøxtaꞌagy.
Møj jim̱ miøøjiootä. Jim̱ hajxy yhøxtaacy jaꞌa mägoox̱milpä yaꞌadiøjc‑hajxy møødä toꞌoxiøjc‑hajxy hawiing. 11 Mänit Jesús jaꞌa tsajcaagy quiooṉdsooyy. Mänit Jesús Dios jaduhṉ ñämaayy: “Dioscujúꞌuyäp.” Mänit Jesús jaꞌa jiamiøød jaꞌa tsajcaagy miooyy. Mänitä jiamiøød jaꞌa tsajcaagy hajxy tiägøøyy yajwaꞌxpä maa jäyaꞌayhajxy hänajty yhäñaꞌayän. Møødä hacx hajxy yajmäwaꞌxøøbiä. Jaduhṉ̃tiä jäyaꞌayhajxy miooyyä mäduhṉ̃tiä hajxy hänajty quiayaꞌañ. 12 Coo hajxy quiaabiädøøyy, mänit Jesús jaꞌa jiamiøød ñämaayy:
―Yajpädøꞌøg tsajcaagyquiaadiuc hajxy møødä hacxtsuꞌtstuc, neby hajxy jaduhṉ ngaꞌa nähguéecämät.
13 Mänit jaꞌa tsajcaagyquiaadiuc hajxy cøjx yajpädøꞌøgy møødä hacxtsuꞌtstuc. Majmetscach hajxy yaghujch jaꞌa tsajcaagyquiaadiuc. 14 Coo jäyaꞌayhajxy yhijxy nebiä Jesús jaꞌa tsajcaagy hänajty tøø yajwaꞌañguiojjiän, mänit hajxy tiägøøyy mänaam̱bä:
―Pues tehm̱ tiøyhajt, yøꞌøds jeꞌe, jaꞌa hajxy hijty nhahíjxämbä coo hajxy hijty xñämedsáaṉäm nebiä Diosmädiaꞌagy miänaꞌañän.
15 Coo Jesús ñajuøøy coo hänajty nøcxy piädaꞌagaꞌañii gobiernä mädsibøꞌøbä, mänit jim̱ chohṉnä. Mänit jim̱ ñøcxnä nidiuhm̱ tuṉjoot.
16 Coo chuujøøyy, mänitä Jesús jiamiøødhajxy yhädaacy mejypiaꞌa. 17 Mänit hajxy tiägøøyy barcojooty. Mänit hajxy tiuꞌubøjcy. Jim̱ Capernaum hajxy hänajty ñøcxaꞌañ mejyhawiimb. Wiingoods hänajty. Cahnä Jesús jaꞌa jiamiøød hänajty piaadyñä. 18 Mänitä poj piädøꞌcy møc. Mänitä mejy chajcujy cøxp. 19 Mägoox̱kilómetro tädujkilómetro hajxy hänajty tøø ñøcxy, mänitä Jesús hajxy yhijxy coo jaꞌa barco hänajty tøø ñajtspaadøꞌøy. Yohby Jesús hänajty mejywyiing. Mänitä jiamiøødhajxy chähgøøbiøjcy. 20 Mänit hajxy ñämaayyä:
―Caꞌa hajxy mdsähgøꞌøy; Jesúshøch høøc̈h.
21 Mänit hajxy jiootcugøøyy. Mänitä Jesús yajtägøøyyä barcojooty. Mänitiä hajxy jim̱ miejtsnä mejypiaꞌa maa hajxy hänajty ñøcxiän.
22 Cujaboom, jim̱nä majiäyaꞌayhajxy hänajty mejyhawiimbnä, maa hajxy hänajty tøø yajcayiijän. Ñajuøøby hajxy hänajty coo Jesús hänajty tøø quiaꞌa møødtuꞌubøgyii jaꞌa jiamiøødhajxy quipxy. Hijxä jaꞌa Jesús jiamiøødhajxy coo hajxy tiuꞌubøjcy barcojooty jaꞌa majiäyaꞌayhajxy. Jagoo barco hänajty tuꞌug; jeꞌe hajxy hänajty tøø yajtuꞌubøcy. 23 Mänitä barco hajxy yajmejch wiingpä, jaꞌa Tiberiastsohm̱bä. Jim̱ hajxy miedsøøyy maa jäyaꞌayhajxy hänajty tøø chajcaagyquiayyän, mänaa Jesús jaꞌa Dioscujúꞌuyäp yequiän. 24 Coo jaꞌa majiäyaꞌayhajxy yhijxy coo Jesúshajxy quiaꞌa jiijän, mänit hajxy tiägøøyy barcojooty. Mänit hajxy tiuꞌubøjcy Jesúshøxtaabiä. Jim̱ hajxy ñøcxy mejyhawiimb jim̱ Capernaum.
25 Coo hajxy jim̱ miejch mejyhawiimb, mänitä Jesús hajxy jim̱ piaaty. Mänit Jesús hajxy ñämaayy:
―Wiindsǿṉ, mänaa mmejch.
26 Mänit Jesús miänaaṉ̃:
―Chaads mijts tehm̱ tiøyhajt nnämáꞌawät, páadyhøch mijts hijty xyhøxtaꞌay cooc̈h mijts jeꞌe cuꞌuxiä nyajcaayy. Cábøch mijts jeꞌe xmiäyajtøwaꞌañ tiiguiǿxpøch jaꞌa hoy‑yagjuǿøñäbä coo nyajcähxøꞌcy.
27 Paady hajxy mduṉ̃, jaduhṉä cay huꞌugy hajxy mbaady. Pero chaads mijts nnämáꞌawät jadunajtä coo hajxy mhøxtáꞌawät neby hajxy mjugyhádat nebiä Dios jiugyhatiän. Høøc̈h mijts cuhdujt nmoꞌowaam̱by coo hajxy jaduhṉ mjugyhádat. Páadyhøch mijts jaduhṉ nmoꞌowaꞌañ, cooc̈hä Dios tøø xquiuhdujtmoꞌoy, høøc̈h jaꞌa Diosquex̱ypä.
28 Mänit Jesús miäyajtøøw̱a:
―Neby højts ngudiúnät nebiä Dios choquiän.
29 Mänit Jesús yhadsooyy:
―Chojpy jaꞌa Dios cooc̈h mijts jaꞌa nmädiaꞌagy xmiäbǿjcät, jaꞌac̈h tøø xquiéx̱iäbä.
30 Mänitä Jesús miäyajtǿøw̱ägumbä:
―Tii hijxtahṉd hoy‑yagjuǿøñäbä myajcähxøꞌøgaam̱by neby højts miic̈h jaꞌa mmädiaꞌagy jaduhṉ nmäbǿjcät coo miic̈h jaꞌa Dios tøø xquiex̱y. 31 Jaꞌa hajxy hijty nhaphájtäm ndeedyhájtäm jaꞌa jecypiä, jim̱ä maná hajxy quiaayy maa hänajty pøṉ quiaꞌa tsänaꞌayän. Moisés jaꞌa maná yajwaꞌañguioj. Jaꞌa maná, nebiä tsajcaaguiän jeꞌe. Jiiby jaduhṉ myiṉ̃ cujaay maa jaꞌa Diosmädiaꞌaguiän: “Yajcaayyä jäyaꞌayhajxy jaꞌa tsajcaagyhajpä jaꞌa tsajpootyptsohm̱bä. Dios jaduhṉ quejx.”
32 Mänitä Jesús yhadsooyy:
―Chaads mijts tehm̱ tiøyhajt nnämáꞌawät: Caha Mioisésä mijts jaꞌa tsajcaagy xyajnäguejx jaꞌa tsajpootyptsohm̱bä. Dios, jeꞌeds hajxy jeꞌe xyajnäguejx. Jeꞌeds hajxy jeꞌe xquiuhdujtmoꞌowaam̱b coo hajxy jim̱ mdägǿꞌøwät tsajpootyp. 33 Jaꞌa Dios tøø quiéx̱iäbä, jim̱ tsajpootyp jeꞌe tøø chooñ. Paady jeꞌe yaa tøø quiädaꞌagy nejy mijts xquiuhdujtmóꞌowät coo hajxy mjugyhádat nebiä Dios jiugyhatiän.
34 Mänitä Jesús ñämaayyä:
―Højts yøꞌø tsajcaagy móoyyäc cøjxtaꞌaxiøøbä, jaꞌa tsajpootyptsohm̱bä.
Paady hajxy jaduhṉ miänaaṉ̃ coo hajxy quiaꞌa wiinjuøøyy coo Jesús jaduhṉ ñiñänøøm̱a hamdsoo coo jeꞌe tøø quiexyii jaꞌa Dios.
35 Mänitä Jesús miänaaṉ̃:
―Høøc̈h jeꞌe, jaꞌa Dios tøø quiéx̱iäbä. Cuhdujtyéjpøch coo hajxy jim̱ tiägǿꞌøwät tsajpootyp pønjátyhøch jaꞌa nmädiaꞌagy xmiäbǿjcäp. Cøjxtaꞌaxiøø hajxy jim̱ yhídät. 36 Pero mijts, cábøch jaꞌa nmädiaꞌagy hajxy tøø xmiäbøjcä, hoy hajxy tøø mja hix̱y cooc̈hä hoy‑yagjuǿøñäbä tøø nja yajcähxøꞌøgy. 37 Pønjátyhøch jaꞌa nDeedy jaduhṉ xyajcøꞌøwaaṉøøby, jeꞌec̈hä nmädiaꞌagy xmiäbøgáaṉäp. Nguhbøgáam̱biøch hajxy jeꞌe. 38 Páadyhøch tøø ndsooñ tsajpootyp cooc̈h ngudiúnät nébiøch nDeedy xyhaneꞌemiän, jaꞌac̈h tøø xquiéx̱iäbä. Cábøch jaꞌa nhamdsoo wiinmahñdy nyaghidaꞌañ. 39 Cábøc̈hä nDeedy miänaꞌañ coo hajxy haxøøgtuum quiáꞌawät, jaꞌac̈h hajxy tøø xyajcøꞌøwaaṉǿꞌøyäbä, coo jaꞌa xøø jumøjt jaduhṉ yhabéjnät. Pero jaduhṉ miänaꞌañ cooc̈h hajxy nyajnǿcxät tsajpootyp. 40 Jadúhṉhøch jaꞌa nDeedy miänaꞌañ coo hajxy cøjxtaꞌaxiøø jiugyhádat neby jaayaꞌay jiugyhatiän, pønjaty jaduhṉ najuøøby cooc̈hä Dios xyHuunghaty, pønjátyhøch jaꞌa nmädiaꞌagy xmiäbǿjcäp. Jeꞌec̈h hajxy jim̱ nyajnøcxaam̱by tsajpootyp coo jaꞌa xøø jumøjt yhabéjnät.
41 Coo Jesús miädiaacpädøøyy, mänit tiägøøyyä wiingapxpéjtäbä jaꞌa judíoshajxy. Paadiä wyiingapxpejtä coo hänajty tøø miänaꞌañ coo jim̱ chooñ tsajpootyp. 42 Jaduhṉ hajxy ñiñämaayyä:
―Jesús yøꞌøyaꞌay xiøhaty; José yhuung yøꞌø. Nhix̱yhájtäm jaꞌa tiaj tieedy yøꞌø. Høhṉdaacp yøꞌøduhṉ cooc tyijy jim̱ tøø chooñ tsajpootyp.
43 Mänitä Jesús jaꞌa judíos yhojy:
―Caꞌa hajxy mgapxtägooñä. 44 Pǿṉhøch jaꞌa nDeedy yajnähdijpy, jeꞌec̈hä nmädiaꞌagy xmiäbøgáaṉäp. Jeꞌec̈h nyajnøcxaam̱by tsajpootyp coo jaꞌa xøø jumøjt yhabéjnät. 45 Jiiby jaduhṉ myiṉ̃ cujaay maa jaꞌa Diosmädiaꞌaguiän coo Dios jäyaꞌay nägøx̱iä yajnähixøꞌøwaꞌañ. Pønjátyhøch jaꞌa nDeedy jaꞌa miädiaꞌagy tøø xwyiinjuøøyyä tøø xyhabøjcä, jéꞌedshøch jaꞌa nmädiaꞌagy tøø xmiäbøjcä.
46 ’Cábøch nDeedy mänaa yhixyii jäyáꞌayäm; høøc̈h nidiuhm̱ tøø nhix̱y. Jím̱høch ndsooñ Dioswiinduum. 47 Chaads mijts tehm̱ tiøyhajt nnämáꞌawät, pǿṉhøch nmädiaꞌagy xmiäbǿjcäp, jeꞌeds jugyhadaam̱b cøjxtaꞌaxiøø nebiä Dios jiugyhatiän. 48 Høøc̈h hajxy jaduhṉ jim̱ nyajtägøꞌøwaam̱by. 49 Jaꞌa nhaphájtäm ndeedyhájtämhajxy, hoꞌc hajxy jeꞌe, hoy jaꞌa maná hajxy jia caayy pactuum. Jaꞌa maná, mäjaayejc jaduhṉ. Pero paquiä jaꞌa miäjaahajxy quiøjxy.
50-51 Høøc̈h, páadyhøch tøø ndsooñ jim̱ tsajpooty nébiøch jäyaꞌayhajxy jim̱ nyajtägǿꞌøwät. Jim̱ hajxy yhidaꞌañ cøjxtaꞌaxiøø pønjátyhøch nmädiaꞌagy xmiäbǿjcäp. Nnähdugáam̱biøch jaꞌa nniꞌx jaꞌa ngopc. Nnähhoꞌtuꞌudáam̱biøch jäyaꞌayhajxy nägøx̱iä.
52 Mänitä judíoshajxy yajcapxiøøyy jaꞌa Jesús jaꞌa miädiaꞌagy:
―Nejy, xmioꞌowáaṉäm yøꞌøyaꞌay ñiꞌx quiopcädaꞌa coo ndsúꞌtsämädä.
53 Mänitä Jesús ñämaayy jaꞌa judíoshajxy:
―Chaads mijts tehm̱ tiøyhajt nnämáꞌawät, høøc̈h jaꞌa Diosquex̱ypä, cooc̈h mijts jaꞌa nniꞌx jaꞌa ngopc xquiaꞌa tsúꞌtsät, cooc̈h mijts jaꞌa nnøꞌty jaꞌa njoot xquiaꞌa húucät, cab hajxy jim̱ mdägǿꞌøwät maa Dioswiinduumän. 54 Pønjátyhøch jaꞌa nniꞌx jaꞌa ngopc xchúꞌtsäp, pønjátyhøch jaꞌa nnøꞌty jaꞌa njoot xyhúucäp, jeꞌeds jeꞌe hidaam̱b cøjxtaꞌaxiøø jim̱ tsajpootyp. 55 Tsuꞌtsǿøc‑høch jaꞌa nniꞌx jaꞌa ngopc; huucǿøc‑høch jaꞌa nnøꞌty jaꞌa njoot. 56 Pønjátyhøch jaꞌa nniꞌx jaꞌa ngopc xchúꞌtsäp, pønjátyhøch jaꞌa nnøꞌty jaꞌa njoot xyhúucäp, jeꞌec̈h jaduhṉ nnänøøm̱by jaꞌa nmädiáꞌagyhøch hajxy xmiäbǿjcäp. Jeꞌec̈h hajxy nguhdujtmoꞌowaam̱by coo hajxy yhídät cøjxtaꞌaxiøø jim̱ tsajpootyp. Tuꞌugmädiáꞌagyhøch hajxy nmøødhidaꞌañ. 57-58 Jaꞌa nDéedyhøch, jaꞌac̈h tøø xquiéx̱iäbä, jeꞌec̈h jaduhṉ tøø xquiuhdujtmoꞌoy cooc̈h jäyaꞌayhajxy jim̱ nyajnǿcxät tsajpootyp, pønjátyhøch jaꞌa nmädiaꞌagy xmiäbǿjcäp. Jim̱ hajxy yhidaꞌañ cøjxtaꞌaxiøø. Jaꞌa nhaphájtäm jaꞌa ndeedyhájtäm, hoꞌc hajxy jeꞌe jequiän, hoy jaꞌa maná hajxy jia caayy. Pero pønjátyhøch jaꞌa nmädiaꞌagy xmiäbǿjcäp, cab hajxy quiaꞌawaꞌañ haxøøgtuum mänaa.
59 Jaduhṉ Jesús jim̱ miädiaacy Capernaum coo hänajty yajnähixøꞌøy tsajtøgooty maa jaꞌa judíos jaꞌa Dios hajxy hänajty wyiingudsähgøꞌøyän.
60 Coo Jesús jaꞌa jiamiøødhajxy jaduhṉ jim̱ miädooyy, mänit hajxy näjeꞌe miänaaṉ̃:
―Cab hajxy jaduhṉ nguhbǿjcämät; tsip xex̱ yøꞌø mädiaꞌagy jaduhṉ.
61 Ñajuøøyy Jesús jaduhṉ nebiaty hajxy hänajty miädiaꞌaguiän. Mänit hajxy ñämaayyä:
―Nejy, cábøc̈hä nmädiaꞌagy hajxy xjiøjpøgøꞌøwáaṉäjä. 62 Cooc̈h mijts xyhíxät cooc̈h hänajty jim̱ nnøcxy tsajpootyp, mänítøch mijts jaꞌa nmädiaꞌagy xmiäbøgaaṉä cooc̈h jim̱ ndsooñ tsajpootyp, høøc̈h jaꞌa Diosquex̱ypä. 63 Jaꞌa mjuøhñdyhajxy, jeꞌeds hajxy yaa xyagjugyhajp. Jaꞌa mniꞌx jaꞌa mgopc‑hajxy, cab hajxy jeꞌe yaa xyagjugyhaty. Cooc̈h mijts jaꞌa nmädiaꞌagy xmiäbǿjcät, mänit hajxy mdägǿꞌøwät jim̱ tsajpootyp. 64 Pero cahnä hajxy nägøx̱iä mmäbøcyñä.
Paadiä Jesús jaduhṉ miänaaṉ̃, ñajuøøby hänajty jaduhṉ pønjaty hänajty jeꞌe caꞌa mädiaꞌagymiäbøgaam̱b. Ñajuøøby hänajty jeꞌebä pøṉ hänajty yegáaṉäp hoꞌcǿøc. Jäguem̱iä Jesús jaduhṉ ñajuøøyy mänaa jaꞌa miäguꞌughajpähajxy tiägøꞌøyän yajnähixøøbiä. 65 Mänit Jesús miänáaṉgumbä:
―Páadyhøch mijts jaduhṉ nnämaayy: “Pǿṉhøch jaꞌa nDeedy yajnähdijpy, jeꞌec̈hä nmädiaꞌagy xmiäbøgáaṉäp.”
66 Coo Jesús jaduhṉ miädiaacpädøøyy, mänitä jiamiøødhajxy nämay wyiimbijnä. Cabä Jesús hajxy hänajty miøødwäditaaṉnä. 67 Mänitä Jesús jaꞌa jiamiøød miäyajtøøyy jaꞌa nämajmetspähajxy:
―Nejy, xpiuhwaꞌadsáam̱bøch mijtspä.
68 Mänitä Simón Pedro yhadsooyy:
―Wiindsǿṉ, caj. Tii højts miic̈h coo nnäꞌä puhwáꞌadsät. Miic̈h højts jeꞌe xyajnähixøøby neby højts jim̱ ndägǿꞌøwät tsajpootyp. 69 Nmäbǿjcäp højts miic̈hä mmädiaꞌagy. Nnajuøøby højts coo jim̱ tøø mdsooñ maa Diosän, coo mGristähaty, jaꞌa højts hijty nhahijxypä, jaꞌa Dios hijty quiexaam̱biä.
70 Mänitä Jesús yhadsooyy:
―Páadyhøch mijts tøø nwiimbiy nébiøch hajxy jaduhṉ xmiøødwädítät, mijts jaꞌa nämajmetspä. Pero xii hajxy tuꞌjäyaꞌay mmøødä, jaꞌa møjcuꞌuwiinmahñdymøødpä.
71 Jaꞌa Judas jaduhṉ nänøøm̱a, jaꞌa Simón Iscariote yhuung. Jaꞌa Judas, jeꞌedsä Jesús hänajty yegaam̱b hoꞌcøøc, hoy jaꞌa Judas jaꞌa Jesús hänajty jia møødwädity møødä nämajtuꞌugpähajxy.