16
Jounkouwa Mwoarjuwed
1 Jesus pel pwehng Nah sohnpadahkkok, “Woal koapwoahpwoa men mine, ma nah lidu men kin kohwahki ah koapwoahk. Woal koapwoahpwoahu rongda pwa jounkouwahu kin wia koauwehla ah koapwoahk.
2 Ih pangindo nah jounkouwahu idoak ipoa, ‘Imdoahr rong pase ma pid koawoa? Kajalehda me ohroj doahroar oamw apwali oai koapwoa kan, pwa koawoa ne johla wia noai jounkouwa.’
3 Jounkouwahu pwehng pein ih pwa, ‘Dahkij ngoahi en wia? Pwa oai koaunno ne pirin kihjang oai kouwa doadoahk. A ngoahi jasihkei in doadoahk nehn pwirej, ngoahi mehk in poakpoakjili.
4 Apkas ngoahi ne kidal pwa da ngoahi en wia! Pwa ma ngoahi ne johla doadoahk, oai pirien kan en kak kajamwo ngoahi oang nehn umwarai kan.’
5 Ih pangindo armaj ohroj ma pwaipwanid oang ah koaunno. Ih idoak ipen armajjo ma indoa keiou, ‘Ia woahr oamw pwaipwanid oang koaunno?’
6 A ih japoang, ‘diroam in oail olip epwiki.’ A ih pwehng, ‘Oaloa nihmw pukken pwaipwanid en, mwindi insingehdi diroam limeijek.’
7 A ih pel idoak ipen emen, a koawoa, ‘Ia woahr oamw pwaipwanid?’ A ih japoang, ‘Pehk in pilahwa kid.’ A ih pwehng, ‘Oaloa nihmw pukken, mwindi insingehdi pehk walipwki.’
8 Nehn en koaunno kidalda, ih kapngahla loalkoang mwoarjuwed in jounkouwahu; pwa armaj kan ma kijehn jampah, irai ma kin lemlemehr pein irai koalikjang armaj kan ma kijehn maram.”
9 Jesus pel pwa, “Ngoahi pwehng kamwai, kamwai en doadoahkkihoang armaj kan amwai koapwoahn jampah kan, pwa irai en wiahla amwai pirien, pwa nehn amwai koapwoa kan nen johla, Koahs pirin kajamwo kamwai oang nehn dohiamwai joahsuk.
10 Inje ma kin mehlel oang mehkij ma siksik, ih pirin pel mehlel oang mehkij ma koalik; apel ih ma kin joah mehlel oang mehkij ma siksik, ih pirin pel joah mehlel oang mehkij ma koalik.
11 Ma kamwai johpwa pirin mehlel oang pai in jampah kan, a inje pirin mehlel oang kamwai in pai mehlel kan in puwoa?
12 Apel ma kamwai joah mehlel oang doadoahk in kouwahki oang emen ah dipwjoau, a inje ma pirin kioang kamwai mehkij pwa en wia uhdahn amwai?
13 “Joh lidu men kak papah koaun roahmen, pwa ih pirin lioassoang emen a ipwilki emen; ih pirin kajampwalki emen, a mwamwahlki emen. Doari, kamwai johkak papah Koahs apel mwani.”
En Jesus Lal pwi
14 Pharisee‑ok pwili rongrong mehpwiai ohroj; irai kin kapkapiski Jesus, pwa ahr kajampwalki mwani.
15 Jesus pwehng irai, “Kamwai kin akpwungki pein kamwai mwohn mijen armaj kan, a Koahs pwen kidal nehn mohngiongimwai kan. Dahkij ma armaj kin kajampwalki, kin wiahla mehkij mwahl mwohn mijen Koahs.
16 “Manmanin Kojonned in Moses apel padahk in joukohppok ne mine jang kawahu indoa lel nehn mwein John jounpoapdaij; a jang nehn anjoauwo Rongmwehu doahroar Wein Koahs lolohkjili apel armaj ohroj kin engdehnki en dildahng nehn Wein Koahs.
17 A pwen moangoai oang nehnloannge apel jampah en johrla jang iroa keiou siksik kij in Kojonneddo en johrla.
18 “Ma woalmen mweijang pahioa, painkihda emen li sohrohr, ih wiahda dipen kamwahl; apel emen ma painkihda li ma pahioahu ne mweijang, ih pel wiahda dipen kamwahl.”
Woal Koapwoahpwoa men apel Lazarus
19 “Anjoau oau woal koapwoahpwoa men mine ma kin likkoauki likkoau keiou mwehu apel mourki mour koalik dupkoa rehn ohroj.
20 Pel mine woal joamwoahmwoa men oadoa Lazarus, ohla kilin, ma kin wijiklahng in wanihmw in umwen woal koapwoahpwoahu;
21 pwa ih kin nimen kang mwoarmwoar in mwinge ma ki kipdihjang pohn en woal koapwoahpwoahu ah sehpillo. Doahkkok kin pel samwsamwe ah ohlahk.
22 Woal joamwoahmwoahu mehdi, sohnloanngok wahdahla ih nehnloannge ipen Abraham. Woal koapwoahpwoahu pel mehdi joajjoardi,
23 nehn ah weiweiroak nehn Hades, ih jipwoaldahla kapangda Abraham wija doh, a Lazarus mine ipoa.
24 Ih poangpoangdahla pwa, ‘Pahpa Abraham, ipwilkihda ngoahi! Kadardo Lazarus pwa en kadu jandin poah nehn pil, ih kamwolouwihki loawoaioa, pwa ngoahi ne inenin pwidengla nehn oai oauwe.’
25 Abraham japoang, ‘Noai jeri, lemleme pwa koawoa ne oaloa me mwehu ohroj nehn oamw mour, a Lazarus oaloa joang nauna ohroj, ioar mehwa ih injenmwahuki anjoau oauwe, a koawoa mine nehn oamw moadoak.
26 A pel oau, wahu koalik oau mine nehn pwungasai; ihr ok ma nimen doauwe jang loappoauwe johkak, pel ihr ok ma nimen doaudo jang men pel johkak.’
27 Woal koapwoahpwoahu japoang, ‘A ngoahi poaki ipoamw, pahpa Abraham, kadarla Lazarus in umwen joamoaiho,
28 ipen rioai jermwein limmenno. Kadarla ih en kaperki irai pwa irai en joah indoahng wija kamoadoak kije.’
29 “Abraham pwehng ih, ‘Moses apel joukohppok mine ipen rioammwok pwa en kaperki irai joang ohroj; rioammwok en rong da irai pwa.’
30 Woal koapwoahpwoahu japoang, pwa, ‘Maing, Pahpa Abraham, joang oauwe johpwa isar! Ma emen jang ipen irai ma ne mehdi kan iejda inla iparai, a irai nen pwurjang diparai kan.’
31 A Abraham japoang, ‘Ma irai joah rong Moses apel joukohppok, irai pel jehpirin kamehlele emen ma pirin iejda jang ipen ihr ma ne mehdi.’ ”